2
أفوكا أخاتار
1 خف ؤياد، ئخصّاخ أد نرار لبال مليح يي ؤينّا مي نسلّا، حما ؤر نتّاشكا.
2 مش ئس ئصحا واوال نّا د-ئوين لمالايكا يي ئمزوورا. هان ونّا ئتعدّان نغد ئدنب، دا يومژت ؤموتّل نّا ئستاهل.
3 ئوا ميمشي نتݣا أنراح نكني يي ؤموتّل-اد مش ؤر تنيوي ݣ نّجاياد أمقران؟ هان مولانا س-ئخف نّس ئخبّر ئس زݣ تيزويري. فّير ن-ؤياد، وكدن غيفس ميدن نّا س-ئسلان،
4 ݣ لوقت نّا، ئسصحوياخ ربّي أوال س لعجايب د لموعجزات د تميتار زݣ مايد ئݣان شا د توكّيوين نّا ئفرّق رّوح لقدس س لموراض نّس.
نّا ئحريين مدن غر أفوكّا
5 د دّونيت نّا ئدّان أد ت تدو تنّا خف نساوال، ؤر ت-ئݣي ربّي دّاو ن تنباطّ ن لمالايكا.
6 شا ن يون ئسيول ݣ شا ؤدغار ݣ لشتاب أها ئنّا: «مايد ئݣا بنادم ألّيݣ أس توسيد أنزݣوم؟ د مايد ئݣا ممّيس ن بنادم ألّيݣ ديكس تتّاويد؟
7 تسژمژيت زݣ لمالايكا شا ن لوقت ئدروسن، تݣيد-اس لعزّ د شّان أها توشيد-اس تانباطّ خف ؤينّا تݣيد.
8 كولشي تݣيت دّاو ن-ئضار نّس». مش ئݣا ربّي كولشي دّاو ن تنباط ن مميس ن بنادم، هاتين كول مايد ئݣان شا ئلاّ دّاو ن تنباطّ نّس. واخّا نسول دغي ؤر دا نتانّاي كولشي دّاو ن تنباطّ نّس.
9 والاينّي عيسى نّا ئتّوسمژيين زݣ لمالايكا شا ن لوقت ئدروسن، نانّايت دغي ئتوݣاس لعزّ د شّان، علاحقّ ئتّومرّت أها ئمّت. ئنعم ربّي غيفنخ ئدّخ يودجا عيسى أد ئمّت خف ميدّن كول.
10 هان ربّي أيد ئخلقن مايد ئݣان شا أها ئس أس ئلّا مايد ئݣان شا، لّيݣ ئرا أد ياوي شيݣان ن-ئشيرّان أد-أمّون ݣ لعزّ نّس، خف ؤياد، يودجا ونّا تن ئحرين غر أفوكّا أد-ئشمّل لخدمت نّس س تمارا نّا غيفس ئكّان.
11 عيسى نّا ئسزديݣان بنادم زݣ لمعصييات د وينّا ئزدّيݣن، ئبّاتسن ئݣا يون. خف ؤياد، ؤر دا ئتحشّام أد-اسن ئقّار أيتما.
12 ئنّا يي ربّي: «أربّي، ريخ أد سيولخ غيفش يي أيتما، ريخ أد-اش ݣخ لعزّ ݣ وامّاس ن-ؤݣراو كول».
13 ئنّا ألّو: «نكّين، ݣيخ ليقين ئنو ݣ ربّي». أها ئنّا لمرت ياضن: «هايي د-ئشيرّان نّا يي ئوشا ربّي».
14 لّيݣ تواݣن ئشيرّان-اد زݣ ؤكسوم د-ئدامّن، أود عيسى س-ئخف نّس يامّو أݣّيدسن ݣ-ؤكسوم د-ئدامّن أها ياغول ئݣا أم نيتني، حما س لموت نّس أد ئخلو شّيطان نّا غر تلّا تنباطّ خف لموت،
15 أها ئفوكّا وينّا ݣانين ئسمغان تودرت نّسن كول، علاحقّ ݣّدن زݣ لموت.
16 يّيه، ئضهر ئس ؤر د-ئدّي أد ئعاون يي لمالايكا، والاينّي ئدّاد أد-ئعاون يي ترّيكا ن براهيم.
17 خف ؤياد أخف-اس ئخصّا أد-ئرويس أيتماس ݣ مايد ئݣان شا، حما أد ئݣ ؤرحيم، أها ئݣ أنمغور ن-ئخاتارن ن دّين د ونّا ݣ-ئلّا لامان ݣ-ؤينّا ئݣان وين ربّي، حما أد ئمحو دّنوب ن ميدّن.
18 علاحقّ نتّا س-ئخف نّس ئتّوجرّب أها ئتّومرّت، دغي، ئغي أد-ئعاون وينّا ئتّوجرّبن.