3
أدور لمسيح يوݣر وين موسى
1 خف ؤياد أيايتما ئمومن، كونّي نّا مي ئغرا ربّي. سموقلات غر عيسى، أمازان ن ربّي نّا ئݣان أنمغور ن-ئخاتارن ن دّين، نتّا أس دا نتّقرّا.
2 نتّا ئݣا نّيشان لخدمت نّا خف ت-يسّرس ربّي، ئمشينّا ئݣا موسى نّيشان لخدمت نّا غيفس ئلّان ئ-شّعب ن ربّي.
3 والاينّي عيسى ئستاهل لعزّ ؤݣار ن موسى. علاحقّ ونّا ئبنان تادّارت غورس لعزّ ؤݣار ن تادّارت س-ئخف نّس!
4 ئدّخ، كو تادّارت ئبنات شا ن حدّ، والاينّي ربّي أيد ئبنان كولشي.
5 موسى أر ئتݣّا نّيشان لخدمت نّا س-ئنّا ربّي ئ-شّعب ن ربّي كول، حما أد-ئشاهد خف ؤينّا ئدّا ربّي أد ييني.
6 ئد لمسيح ئݣا أينّا غيفس ئلّان، علاحقّ ئݣا ممّيس ن ربّي نّا ئلّان خف تادّارت نّس. نكني أيد ئݣان تادّارت نّس مش نومژ ݣ ليقين د رّجا نّا س-أخ ئبورز.
أد ؤر تسغارات ؤلاون نّون
7 خف ؤياد، دا ئتّيني رّوح لقدوس: «أسّ-اد، مش تسلّيم يي واوال ن ربّي،
8 أد ؤر تسغارات ؤلاون نّون، ئمشينّا ݣان لوالدين نّون لّيݣ غوّغن ݣ واسّ ن-ؤجرّب ݣ صّحرا.
9 داد ݣ صّحراياد، جرّبنييي أد أنّاين أينّا دّيخ أد ݣخ. مغار أنّاين ياد أينّا ݣيخ ربعين ن-ؤسݣّاس.
10 داي تطْيرييي شيݣان خف ميدّن-اد أها نّيخ: "ؤلاون نّسن دا تن حرّين دّيما غر لمعصييت. ؤر سّين ئبردان ئنو".
11 خف ؤياد، لّيݣ يي تسطيّرن، ݣولّيخ: ؤسار كشمن غر تمازيرت نّا ݣ-اسن سّوجدخ يي ؤسݣنفو».
12 ئوا، أيايتما، رارات لبال مليح، حما ؤر ئتّيلي ݣار ؤل غر شا زّيݣون ئعمّرن س لعار، ؤر ديكس ليمان، أها أر ت-ئحرّي أد ئزري ربّي نّا ئدّرن.
13 والاينّي مسزعيمات ئنݣراون كوياس، زݣ واسّ-اد، حما ؤر تغرّان دّنوب شا زّيݣون أها ئقّار ؤل نّس.
14 علاحقّ، نݣا ئسمون ن لمسيح، مش نقّيم أر تينݣيرا ݣ ليقين نّا غورنخ ئلّان ݣ-ؤمزوارو.
15 هان لشتاب ن ربّي دا ئتّيني: «أسّ-اد، مش تسليم يي واوال ن ربّي، أد-ؤر سغرات ؤلاون نّون ئمشينّا ݣان لوالدين نّون لّيݣ يي عصان».
16 والاينّي، ماي مسين وينّا ئسلّين يي واوال ن ربّي أها عصانت؟ ئس ؤر-ئد وينّا ئسّوفغ موسى كول زݣ تمازيرت ن مصر؟
17 ما خف مي ئحرق ربّي ربعين ن-ؤسݣاس؟ ئس ؤر-ئد خف وينّا دنبنين أها مّتن ݣ صّحرا؟
18 يي ماي مي ئݣّولّا، لّيݣ-ئنّا: «ؤر تّاكمن تامازيرت نّاݣ مي أسن سّوجدخ ئ-وسݣنفو أبدا». ما خف دا ئسّاوال؟ دا ئسّاوال خف وينّا ؤر ئضاعن.
19 ئوا، ها نكني دا نتّاناي ئس ؤر غيين أد كشمن غر تمازيرت ن-ؤسݣنفو، علاحقّ ؤر ؤمين.