13
لوصييات ياضن
1 أدجات تايري نّون يي أيتماتون ئمومن أت تدام.
2 أد ؤر تتّويات أت ترحبم س-ئبرّانيين، علاحقّ ئتّس ݣان أياد، رحبن س شا ن ميدّن د نيتني ؤر سّين ئد لملايكّا أينّا.
3 شتييات ئحبّاسن، أمّي تلّام ݣ لحبس أݣّيدسن. خممات ݣ ئمضلومن، أمّي كونّي أيد ئتّوضلمن.
4 ئخصّا كو يون زّيݣون أد-ئوقّر ئول. ييلي لامان ئنݣر ؤرݣاز د تمطّوط نّس، علاحقّ ئدّا ربّي أد ئعاقب وينّا ئفسّدن د وينّا ئتزنون.
5 ؤر ئتّݣ ؤمصاراف نّون تايري ن لفلوس. قنعات س-ؤينّا غيرون ئلّان. علاحقّ ربّي ئنّا: «ؤر دّيخ أش أدجخ، ؤر دّيخ أش زريخ أبدا!»
6 خف ؤياد، دّيخ أد ئنيخ س زّعامت: «مولانا أيد ئݣان أمعيون ئنو، ؤر تݣدخ والو! ما ݣ دّا بنادم أد يي ئݣ؟»
7 شتيات وينّا أون ئسنعتن أها سيولن-اون س واوال ن ربّي. سموقلات ميمشي تݣا تودرت نّسن د لموت نّسن أها تݣيم أم نيتني ݣ ليمان.
8 عيسى لمسيح، نتّا س-ئخف نّس وين ن واسنّاط د واسّاد د وابدا.
9 أد-ؤر كون ئسّيشك ؤسغري أبرّاني. ييف أد نسّزعيم ؤلاون نّخ س نّعمت ن ربّي، ؤر ئد س-لفرايض ن ؤتشي نّا ؤر دا تنفاعنين وينّا غيفسن عوّلنين.
10 ئد نكني ئلّا غورنخ يون ؤسغرص ن تمغراص، د-ئخاتارن ن دّين نّا ئخدمن ݣ تخامت ن ربي ؤر-أسن ئزري أد زّيكسن تّشين.
11 ئتّخ أنمغور ن-ئخاتارن ن دّين دا ئتّاوي أݣّيدس ئدامّن ن تمغراص، ئكشم غر أنسا نّا مي تّينين «قدس الأقداس»، ئݣتنين د توكّي يي ربّي خف دّنوب، مشان تيمغراص دا تغوسين برّا ن-ؤسون.
12 خف ؤياد، أود عيسى ئمّوت برّا ن تمدينت ن لقدس، باش أد ئفوكّا ميدّن زݣ لمعصييات نّسن س-ئدامّن نّس.
13 كرات أد-اس نݣر عرّاض برّا ن تمدينت، ناسي لعار نّا يوسي.
14 علاحقّ ݣ دّونيت-اد، دا نزدّغ ݣ تمدينت نّا ؤر ئدامن، والاينّي دا نورزّو تنّا ئدّان أد ت تدّو.
15 أمْ ؤُيْنَّا أَر تْݣِّينْ مِيدّنْ مْشْتا أَيَا تَامْغْرُوصْتْ يِي رَبِّي كُويَاسْ، دْغِي نْكنِي دا نْتْسْبَّاحْ رَبِّي سْ ئِسمْ نْ لمسِيحْ دِّيمَا، تَادْ أَݣَّانْ تَامْغْرُوصْتْ ئشملن.
16 والاينّي أد ؤر تتّويات أت تݣّيم لخير أها تمعاوانم ئنݣراون، ئوا هان تيمغراص نّا ئسّفراحن ربّي.
17 ئخصّا أد تضاعم ئنبّاضن نّون أها تݣيم س واوال نّسن. علاحقّ، داون تراران لبال دّيما، أمّي دّان أد وشين لحساب دات ن ربّي خف ؤياد، باش أد ݣين لخدمت نّسن س-ؤفراح، ؤر ئد س-ؤجميل، ئدّخ أياد ؤر أون ديكس ئلّي نّفع.
18 تّرات ربّي زݣ تنيلا نّخ. هاتين نصّوحا ئس صفان وولاون نّخ، علاحقّ دا نورزّو أد نݣ لخير ݣ مايد ئݣان شا.
19 أها أر زّيݣون تتّرخ أت تتّرم ربّي، باش أد-أغولخ فيمرّا غورون.
20 أر تتّرخ يي ربّي نّا ياكّان لهنا، نتا أيد ئسكّرن زݣ لموت أمكسا أختار ن-ئشروان، مولانا نّخ عيسى. أها س-ئدامن نّس ئݣا ربي أݣيدنخ لعاهد ن وابدا.
21 دا س تتّرخ أد-أون ئوش لجهد أت تݣيم أينّا ئژيلن، تݣيم لموراض نّس! أها ئݣ ديݣنخ أينّا ت-ئسّرضون س عيسى لمسيح، أد غورس ييلي لعزّ دّيما! أمين.
22 أيايتما، دا زّيݣون تتّرخ أت تقبلم أوال-اد ن-ؤسّزعم س صّبر. هاتين دروسن ئواليون ن تبرات-اد نّا أون ؤريخ.
23 ئخصّا أت تيسينم ئس ئفّغ ؤماتنخ تيموتاوس زݣ لحبس. مش د-ئدّا غوري فيمرّا، دّيخ أد مّونخ أݣّيدس حما أد كون أنّايخ.
24 بلّغات سّلام ئنو يي ئنبّاضن نّون د-ئمومن كول. أيتماتنخ نّا ئݣان زݣ طّاليان دا غيفون تسلّامن كول نّسن.
25 أد-أون ئوش ربّي كول نّون نّعمت نّس.