12
ربّي دا ئسربّا أراو نّس
1 خف ؤياد أود نكني، هاتين ئضوراخ يون ؤربيع ن شّهود أم ئسيݣنو أمقران. ئوا ئخصّاخ أد نݣر س واݣّا ئژّاين نّا ؤر دا خ-ئتدجا أد ندّو غر دات، د لمعصيات كول نّا خ-ئنّضن، أها نازّل س صّبر تازلا نّا ئݣا ربّي داتاخ.
2 ئخصّاخ أد نسرس ألّن نّخ خف عيسى نّا ئݣان لّساس ن ليمان نّخ أها ئس أس ئشمّل. هاتين خف سّيبت ن-ؤفراح نّا ت-ئتراجان، ئصبر يي تمارا ن صّاليب أها ؤر تييوي ݣ لعار. ئقّيم خف ؤفاسي ن لعرش ن ربّي.
3 خمّمات ݣ عيسى نّا ئصبرن يي ؤمرّت ن وينّا ئفّغن أبريد، باش ؤر توحيلم أها ؤر كون تّاكم دهاشيت.
4 هاتين دا تناغم د لمعصييات، والاينّي تسولم ؤر تمّوتم.
5 ئس تتّوم أوال نّا كون ئسزعيمان ونّا س-اون ئساوال ربّي أمّي تݣام أراو نّس؟ ليݣ ئنّا: «أممّي، أد ؤر تحقّار أسّݣم ن مولانا، أها ؤر-اش ئتطيّار مش غيفش ئسغوي.
6 علاحقّ ونّا ئرا مولانا دا ت-ئسّݣما، أر ئكّات كول ونّا ئݣان ممّيس!»
7 ئوا، صبرات أدّاي دا كون ئسّݣما ربّي. هاتين ئݣاكون أم واراو نّس. ئس ئلّا شا ؤربا ؤر دا ت-ئسّݣما ئبّاس؟
8 مش ؤر دا كون ئسّݣما، ئمشينّا ئسّݣما أراو نّس، هاتين تݣام ئعزيزن ؤر تݣيم أراو نّس نّا ئحقّان.
9 هاتين غورنخ لوالدين خف وشال ؤوروناخ أها سّݣمناخ أر تن نتوقّار. ؤݣار ن-ؤيا، ئس ؤراخ ئخصّا أد نضاع ئبّاتنخ نّا ئلّان ݣ-ئݣنّا حما أد غورنخ تيلي تودرت؟
10 علاحقّ لوالدين نّخ سّݣمناخ شا ووسّان دروسنين خف ؤينّا سن ئضهرن ئس ئژيل. والاينّي ربّي دا خ-ئسّݣما دّيما خف نّفع نّخ، باش أنݣ زݣ وينّا ئقدسن أم نتّا.
11 ستيت، مايد ئݣان أسّݣم دا د-ئتّاوي ݣ-ؤمزوارو أحراق، أر-اخ ئتبايان ئس ؤر دا ئسفراح، والاينّي فّير شا ن لوقت، وينّا ئتّوسّݣمن كول دا تمنون أها أر غورسن ئتّيلي لهنا.
12 خف ؤياد سصحويات ئفاسّن نّون نّا ئموحولن د-ئفادّن نّون نّا يولوان.
13 حبّلات ئبردان منانين يي ئضارن نّون، باش ئضارن ن-ؤحيزون ؤر فرّغن، والاينّي أد جّين!
دويات ݣ ؤبريد ن ربي
14 ݣات لمجهود نّون أد ييلي لهنا ئنݣراتون د ميدّن كول أها تݣيم لمجهود نّون ألتو أت تصلحم دات ن مولانا. علاحقّ، أود يون زّيݣون ؤر ئدّي أت ت يانّاي مش ؤر ئصليح.
15 أويات بعيت، أود يون ؤر ئزرّي نّعمت ن ربّي أها ؤر تّادجات أد ئمغي ئنݣراتون شا ؤژور ئحرّين ن لحسيفات داي ئسخسر زّيݣون شيݣان.
16 ؤر-ئتّيلي ئنݣراتون أود يون ؤنفساد، أد ؤر تحقّارات ئسكّين ن ربّي أم عيسو، نّائيݣان أمنزو ئزّنز لحقّ نّس س يون ؤتشي!
17 كونّي تسّنم مايد ئجران فّير ن-ؤياد، لّيݣ ئرا أد ئورت لباراكا ن-ئبّاس، والاينّي ئتواژّع. ئتّرت س-ئمطّاون، علاحقّ ؤر ئلّي شا ؤبريد ما س غا ئعديل أينّا ئݣا.
18 ستيت ؤرد تدّيم غر عاري أها ؤر ئتيغي أود يون أد ئيحادا مانيݣ تلّا لعافييت ئحرّين، تالّست تابخّانت، تاݣوت د لعجاج،
19 د-ئغويّان ن لبوق، سّداع ن واوال. لّيݣ سلّين أيت إسرائيل يي سّداع-اد، تّرن ؤر دزيادن أد سلّان يي أود يون واوال.
20 علاحقّ، ؤرغيين أد صبرن يي لامر نّا سن ئتّمْوش: «مغار تݣا لبهين أيد ئحادان عاري ئخصّا أد تّورجم س-ئژرا أر تمّت».
21 أينّا أنّاين دا ئسّاݣّاد شيݣان ألّيݣ ئنّا موسى: «ݣّدخ شيݣان أها أر ترݣيݣيخ».
22 والاينّي هاتين تدّامد غر عاري ن صهيون د تمدينت ن لقدس نّا ئلّان ݣ-ئݣنوان، نّا ئݣان تامدينت ن ربّي نّا ئدّرن ماني ݣ مّون ألف ن-ئد والف ن لمالايكا ݣان لفرح،
23 تدّامد غر أݣراو ن-ئمنزا نّا مي توارين ئسماون نّسن ݣ-ئݣنوان. تدّامد غر ربّي نّا ئتنباضن خف مايد ئݣان شا د رّوح ن ميدّن نّا ئمنان أها ئݣتن ربّي د ميدّن شمّلنين.
24 هاتين تدّامد غر عيسى، نتّا أݣ سقرّبن ميدّن غر ربّي. س لفضل نّس ئݣا ربّي لعاهد ؤجديد د ميدّن، تدّامد غر ئدامّن ن عيسى نّا س-ئروشّا ميدّن. ئدامّن-اد دا ساوالن س واوال ييفن أوال ن-ئدامّن ن هابيل.
25 رارات لبال، ها كونّي ؤر تّيريم أد تسغدم يي ونّا ئساوالن أݣّيدون. وينّا ؤر ئرين أد سّغدن يي ونّا تن ئتنهون ݣ أشال، ؤر راحن يي ؤموتّل. ئوا ميمشي نتّݣ أد نراح نكني مش ؤر نسّغيد يي ونّا خ-ئساوالن زݣ ئݣنّا؟
26 ݣ لوقت نّا، أوال نّس ئحرّش أشال، والاينّي دغي، ئقاولاخ أها ئنّا: «لمرت ياضن ؤر دّيخ أد حرّشخ غاس أشال، والاينّي أود ئݣنّا!»
27 ئواليون نّس: «لمرت ياضن» ئرا أد ييني س واوال نّس ئس ئرا أد ئكّس ئسكّين نّا ئتّوخلقن نّا ئترݣيݣين، باش أد قّيمن غاس ئسكّين نّا ؤر دا ئترݣيݣين.