11
ليمان
1 ئد ليمان، نتّا أݣّان ليقين ئس ئدّا أد-ئجرو ؤينّا نترجا، أها نامن ئد ئسكّين نّا ؤر دا نتّانّاي ئس لّان ستيت.
2 هاتين س ليمان أس ئرضا ربّي خف وينّا زرينين.
3 س ليمان، أس نسّن ئس تّوخلق دّونييت س واوال ن ربّي، د-ئسكّين نّاݣ نسموقّول دّاند زݣ ئسكّين نّا ؤر دا نتّانّاي.
4 س ليمان، ئݣا هابيل تامغروصت يي ربّي نّا ييفن توكّي نّا ئݣا قايين. س ليمان نّس، أس ئقبل ربّي تامغروصت نّس أها ئشاهداس ئس ئمنا. س ليمان نّس، مغار ئمّوت ئسول دا ئساوال.
5 س ليمان، ئتواسي أخنوخ ممّيس ن يارد س-ئݣنّا تاما ن ربّي باش أد ئراح يي لموت. ؤر ئقّيم خف واشال علاحقّ ييويت ربّي غورس. لشتاب ن ربّي دا ئتّيني دات ن واساي ن أخنوخ، ئرضا غيفس ربّي.
6 بلا ليمان أود يون ؤر ئتّيغي أد ئسّرضو ربّي، ئتخ ونّا ئران أد غورس ديدو ئخصا أد يامن ئس ئلّا أها أر ياكّا يي وينّا ت يورزّون.
7 س ليمان، ئݣا نوح س واوال ن ربّي لّيݣ-اس ئعلم خف ئسكّين نّا ئدّان أد جرون أها ؤر دا توانّاين. ئبنو أغرّابو باش أد ئسراح أيت ؤخام نّس. س-ؤياد، ئحكم خف دّونيت، أها ئورت صّلاح نّا د-ئتدّون زݣ ليمان.
8 س ليمان، ئضاع براهيم ربّي لّيݣ-اس ئغرا، ئفّغ غر تمازيرت نّا س-ئقاول ربّي أت ت-ئورت. ئفّغ أها ؤر ئسّين ما غر ئتدّو.
9 س ليمان، ئݣا أبرّاني ݣ تمازيرت نّا س-ئقاول ربّي. ئزدغ ݣ-ئخامن د-إسحاق د يعقوب. أود نيتني ئقاولاسن ربّي أينّا ئقاول يي براهيم.
10 علاحقّ براهيم أر ئتراجا تامدينت نّا غر ئلّا لّساس ئصحان. ربّي أيد ت-ئفصّلن أها ئبنوت.
11 س ليمان، سارة تامطّوط ن براهيم، ئوشاس ربّي لجهد أت تارو، داي تارو يون ؤربا مغار تݣا تيݣّرت أها تمقّور ݣ لعمر. علاحقّ، تومن س ربّي، ئس ئدّا أد ئݣ أينّا س-ئقاول.
12 خف ؤياد زݣ يون ؤرݣاز نّا ئدّان علاحال أد ئمّت، تلولاد تاروا ئعدّان أم ئتران ݣ-ئݣنّا، ئݣّوتن أم رّمل تاما ن لبحر، أود يون ؤر ئتّيغي أت تن ئحاسب.
13 ميدّن-اد كول مّوتن لّيݣ سولن دا تّامن. ؤر ؤميژن لخير نّا سن-ئقاول ربّي، والاينّي أنّاينت زݣ تّاسيع، فرحن ئس أها قرّان ئس ݣان ئبرّانيين د-ئنجدا ݣ واشال.
14 ميدّن نّا ئتّينين ئمشيد دا سبايان ئس دا ؤرزّون شا ن تمازيرت.
15 مور ئد-ئس تن ئنغا فاد ن تمازيرت نّا زݣ فّغن، أد غورسن تيلي لوقت أد-أغولن غورس.
16 والاينّي ݣ تاسّاعت نّا، ئلا ديكسن فاد ن يوت ن تمازيرت ئغودان، تامازيرت نّا ئلّان ݣ-ئݣنّا. خف ؤياد ؤر ئحشّيم ربّي أد-اس قّارن ربّي نّسن، أها ئسوجداسن يي يوت ن تمدينت.
17 س ليمان، ئݣا براهيم ممّيس إسحاق أم تامغروصت، لّيݣ ت-ئتّوجرّب. ونّا مي ئوشا ربّي لقول نّس، ئدجاور أد ئغرص ئ ممّيس أفرضي.
18 مغار أس ئنّا ربّي: «هاتين زݣ إسحاق أد غورش تيلي تّرّيكت».
19 والاينّي براهيم، يومن ئس ئغي ربّي أد ئسكّر ئمتّين. ئمشيد أس ئرار ربّي يي براهيم ممّيس إسحاق أمّي ت-ئسكّر زݣ لموت.
20 س ليمان، ئبارش إسحاق يعقوب د عيسو خف لومور نّا ئدّان أد د دّون.
21 لّيݣ ئدجاور يعقوب أد ئمّت، س ليمان ئبارش أراو ن يوسف سّين أها ئبندق يي ربّي د نتّا ئسنّد خف ؤعكّاز نّس.
22 لّيݣ ئدجاور يوسف أد ئمّت، س ليمان ئسيول خف واسّ نّاݣ دّان أيت إسرائيل أد فّغن زݣ تمازيرت ن مصر أها ئوصّاتن أد-أوين ئغصان نّس أݣّيدسن.
23 لّيݣ ئلال موسى، س ليمان خزنت لوالدين نّس شراض ئيّورن، علاحقّ أنّاين ئس ئݣا يون ؤربا ئغودان أها ؤر ݣّدن أد عصون لامر ن-ؤݣلّيد.
24 لّيݣ ئمغور موسى، س ليمان ؤر-ئقبيل أد-اس قّارن ميدّن ممّيس ن-ئلّيس ن فرعون.
25 يوفاس أد ياسي تامدّالّوت د ميدّن ن ربّي، ؤلا أد-ئبرّع شا ن لوقت ئدروسن س-دّنب.
26 هاتين ئحاسب لعار نّا غيفس ئتكّين أݣّيتسن خف نّيرت ن لمسيح نّا ئدّان أد د-ئدّو، لعار أد ئݣا لكنز نّا يوݣرن لكنوز كول ن تمازيرت ن مصر، علاحقّ نتّا أر ئسموقّول غر أينّا ئدّا أت تيامژ زݣ ربّي.
27 س ليمان، ئفّغ زݣ تمازيرت ن مصر ؤر ئݣّيد زݣ ؤحراق ن-ؤݣلّيد. ئزايد ݣ-ؤينّا ئرا أد ئݣ أمّي دا ئسموقّول ݣ ربّي نّا ؤر دا ئتّانّاي أود يون.
28 س ليمان، ئݣا لعيد ن لفصح، أها يامّر أيت إسرائيل أد روشّان تيفلْوين ن تيدّار نّسن س-ئدامّن، حما ؤر ئنقّا لمالاك ن لموت ئمنزا ن أيت إسرائيل.
29 س ليمان، شوقّان أيت إسرائيل لبحر أزݣّاغ أمّي ئݣا واشال أقورار. والاينّي لّيݣ ران أيت مصر أد زرين غلين ݣ لبحر.
30 س ليمان، ضورن أيت إسرائيل سبعا ن ووسّان ئ تمدينت ن-أريحا أها تّوتين ئݣودار نّس.
31 س ليمان، ترحّب راحاب تانفساتّ س-أيت إسرائيل، نّا د-ئدّان أد راقبن تامدينت أها ؤر تمّوت د-ئمعصان.
32 ئوا، مايد أون تّينيخ ألّو؟ هاتين ؤر غوري لوقت حما أد أون سيولخ خف جدعون، باراق، شمشون، يفتاح، داود، صموئيل د لانبييا.
33 س ليمان، رنان ئرݣزن-اد تيݣلّيدن ن-ئعداون، حكمن س لحقّ، أمژن أينّا سن-ئقاول ربّي أها قّن ئقما ن-ئزماون،
34 سخسين لعافيت ئجهدن أها راحن زݣ منغيوت س سّيف. س ليمان، أغولن ݣان ئصاطّن ݣ-ئمنغان ياغول ضّعف نّسن ئݣا لجهد أها رنون لعسكر ن-ئبرّانيين.
35 س ليمان، أغولند ئ توتمين ئمتّين نّسنت. والاينّي ئتس ن-ئمتّين تّومرّتن شيݣان أها ؤر قبيلن نّجا. علاحقّ، ران أد كّرن زݣ لموت أها تيلي غورسن تودرت ئغودان ݣ ليخرا.
36 ئتس صبرن يي ؤقبّض د-ؤسوّض، صبرن يي ؤشاريف أها تّوݣرين ݣ لحبس.
37 ئتس ياضن تورجمن س-ئژرا، نغد توابّين س لمنشار، نغد تّونغن س سّيف. د وينّا ئتحوفن ݣ مايد ئݣان أنسا، لسان ئسليخن ن وولّي نغد وين تغطّن، زلضن، تّوحقرن أها أر غيفسن تعدّان ميدّن.
38 ميدّن-اد ؤر تن تستاهل دّونييت، ؤشكان ݣ صحرا د لعواري د-ئفران د-ئحفراون.
39 ميدّن-اد ؤمن كول نّسن س ربّي، والاينّي ؤر ؤميژن أينّا سن ئقاول.
40 علاحقّ، ئسوجداخ ربّي شا ييفن أينّا سن ئقاول، أها ؤر ئري أد ݣين ميدّن بلا لعيب غاس مش أݣّيدسن نلّا.