10
لمسيح أيد ئتفوكان ماشي شرع
1 هان شّرع ن موسى ؤر ئد نتّا أيد ئݣان لخير ئحقّان، والاينّي ئݣا غاس أمالو ن لخير نّا ئدّان أد د-ئدّو. خف ؤياد، ؤر ئتّيغي شّرع أد ئرار ميدّن د وينّا شمّلنين س تمغراص نّا تݣّين يي ربّي كو ياسݣّاس.
2 مور دا تّومحونت دّنوب س تمغراص، ؤر تن تݣّين ميدّن، علاحقّ أغولن زدّيݣن ݣ يوت ن لمرت أها أغولن ؤر دا تحسّان ئسّن ݣ لعقول نّسن.
3 والاينّي تيمغراص-اد، دا شتّينت كو ياسݣاس يي ميدّن دّنوب نّسن.
4 علاحقّ ئدامّن ن-ئزݣارن د-ئعتراس ؤر تّيغين أد محون دّنوب أبدا.
5 ݣ لوقت ݣ د-ئدّا لمسيح غر دّونيت، ئنّا يي ربّي: «شݣّين ؤر تريد تامغروصت ؤلا توكي، والاينّي تݣيدييي دّات ن بنادم.
6 علاحقّ ؤر دا ش سّفراحن تيمغراص نّا ئغوسن، ؤلا تنّا ئغرصن خف دّنب.
7 داي نّيخ: ها يي أربّي دّيخد أد ݣخ لموراض نّش، ئمشينّا ئتوارين غيفي ݣ لشتاب نّش».
8 هان لمسيح ئنّا ݣ-ؤمزوارو: «ؤر دا تّيريد تيمغراص، ؤلا توكيوين، ؤلا تيمغراص نّا ئغوسن خف ؤسغرص، ؤلا تنّا ئغرصن خف نّيرت ن دّنب». واخّا تواݣنت ئمشينّا ئتّيني شّرع.
9 أها ئنّا ألّو: «ها يي دّيخد حما أد ݣخ لموراض نّش أربّي». س واوال-اد، دا ئسبطال تيمغراص تيمزوورا حما أد تن ئبدّل س تمغروصت تيسنات.
10 عيسى لمسيح ئݣا لموراض ن ربّي. ئوشا دّات نّس ݣ يوت ن لمرت. أها نتوسزديݣ زݣ دّنوب.
11 كو أخاتار ن دّين دا ئتكّر أر ئتݣّا لخدمت نّس كوياس، أر ئتݣّا يي ربّي تيمغراص نّا س-ئخف نسنت شيݣان ن لمرّات، مغار ؤر دا تمحونت دّنوب أبدا.
12 والاينّي لمسيح، ئݣا غاس يوت ن تمغروصت خف دّنوب أبدا، داي ئقّيم خف ؤفاسي ن ربّي.
13 دغي، دا ئتراجا أر تواݣن ئعداون نّس دّاو ن-ئضارن نّس.
14 علاحقّ س يوت ن توكي ئرورا وينّا ئفوكّان زݣ دّنوب د ميدّن بلا لعيب غر ربي أبدا.
15 أود رّوح لقدوس دا ئتشاهاد خف ؤياد، علاحقّ ئنّا ياد:
16 «هان لعاهد نّا دّيخ أد ݣخ أݣّيدسن فّير ن-ؤسّان-اد. أياد أيدا ئتّيني مولانا: أد ݣخ شّرع ئنو ݣ-ؤلاون نّسن، أروخت ݣ لعقول نّسن».
17 داي ئنّا ألّو: «ؤسار شتيخ دّنوب نّسن ؤلا لعار نّسن».
18 خف ؤياد أدّاي تّوغفرنت دّنوب، ؤسار نحدادجا يي توكي غيفسنت.
تبتات ݣ ليمان
19 ئوا أيايتما، هاتين غورنخ لحقّ أد نكشم س لامان غر أنسا نّا مي تّينين: «قدس الاقداس» س-ئدامّن ن عيسى.
20 هاتين ئرژماخ يي يون ؤبريد ؤجديد نّا ئتّاوين غر تودرت، لّيݣ تتّوشرّݣ لخاميت نّا ئݣان صّاحت نّس.
21 أها غورنخ يون ؤنمغور ن-ئخاتار ن دّين نّا ئݣان أنبّاض خف تادّارت ن ربّي.
22 خف ؤياد ئلازم أد ندّو غر ربّي س وول ئصفان د ليمان ئصحان د وولاون نّخ زدّيݣن زݣ ئخمّيمن ن لعار د صّاواحات نّخ أريدن س وامان ئزدّاݣن.
23 أها ئخصّاخ أد نامژ مليح ݣ رّجا نّا س نتبرّاح، علاحقّ ربّي دا ئتݣّا دّيما أينّا ئقاول.
24 ئلازم أد نمرارا لبال ئنݣراتنخ حما أد نمسزعيم خف تايري د توݣّي ن لخير.
25 ؤر نزرّي تيݣراوين نّخ ئمشينّا تݣّين ئتس ن ميدّن. والاينّي أد نمسزعيم خف توادا غر تݣراوين، ئدّخ ها كونّي دا تّانّايم ئس ئدجاور واسّ ن ربّي.
26 علاحق مش نسول دا نتݣا شا ن دّنب علا ؤعلم فّير ماي نسّن لحقّ، هاتين ؤر تقّيم شا ن تمغروصت ن غا ئمحون دّنوب،
27 أها ؤر-أخ ئقّيم غاس أد نراجا س تيݣّتّ أسّ ن لحساب د لعافيت ئحرّين ن غا ئسغوسن ئعداون ن ربّي.
28 ونّا ؤر دا ئتݣّين س شّرع ن موسى دا ئتمتات بلا رّحمت، مش غيفس شاهدن سين نغد شارض ن ميدّن.
29 مايد ئدّان أد ئجرو يي ونّا ئتحقّارن ممّيس ن ربّي، ونّا ؤر دا ئتوقّارن ئدامّن ن لعاهد نّا ت-ئفوكّان زݣ دّنوب د ونّا ئرݣّمن رّوح ن ربّي نّا ياكّان رحمت؟
30 هاتين نسّن مايد ئنّان: «نكّين أيدا ئتّامژن لحقّ د نكّين أيدا ياكّان يي كو يون أينّا ئستاهل». أها ئنّا ألّو: «مولانا أد ئحكم خف شّعب نّس».
31 أويها نّس يي ونّا ئضرن ئنݣر ئفاسّن ن ربّي نّا ئدّرن!
32 والاينّي شتييات أينّا غيفون ئكّان ݣ-ؤسّان نّا ئزرين، فّير ن مايد ئسّيد غيفون ؤسيد ن ليمان. تجاهدم أها تصبرم يي شيݣان ن تمارا.
33 زݣ يوت ن تنيلا رݣمنكون أها سكّين غيفون أخوب دات ن ميدّن كول، زݣ تنيلا ياضن تامّوم د وينّا ئلّان ݣ-ؤخوب أم كونّي.
34 هاتين تامّوم د-ئحبّاسن ݣ تمارا نّسن، داي لّيݣ كسناون لمال نّون تصبرم أها تفرحم، علاحقّ تسّنم ئس تدّام أت تامژم أينّا ييفن أها ئدام.
35 ئوا، أد ؤر زلّات لامان نّون. هاتين ئݣّوت ؤينّا تدّام أد غيفس تامژم.
36 هاتين تحدادجام يي صّبر حما أت تݣيم أينّا ئرا ربّي أها تامژم أينّا س-ئقاول.
37 علاحقّ، دا ئتّيني لشتاب ن ربّي: «فّير ن شا ن لوقت ئدروسن بزّاف، ونّا ئخصّا أد د-ئدّو، أد د-ئدّو أها ؤر-ئتعطّار.
38 هان ونّا ئصلحن، س ليمان أس ئدّا أد ييدير، والاينّي ونّا ئفغن أبريد، ؤر دّيخ أد-ئس فرحخ».
39 ئد نكني ؤرنݣي زݣ وينّا ئتوهلكن نّا ئفغن أبريد، والاينّي نݣا زݣ وينّا ؤمنّين نّا ئتّوفوكّان.