9
لعيبادا ݣ ئݣنّا د لعيبادا ݣ واشال
1 ستيت ݣ لعاهد أمزوارو لّان لفارايض ن لعيبادا د يوت ن تخامت نّاݣ تعبادن ميدّن ربّي خف واشال.
2 تاخامت-اد تبضا خف سين، أنسا أمزوارو دا س تّينين: «لقدس»، تيلي ديكس لحسكا د-لميدا د-ؤغروم نّا ئتّموشين يي ربّي.
3 أنسا ويسّين ئلّا فّير ن-لخاميت دا-س تّينين: «قدس الاقداس»،
4 ديكس يون ن لمجمر ن دّهب يي ؤسغوس ن لجاوي د صّندوق ن لعاهد ئجوّا س دّهب. صّندوق-اد ديكس يون ن لماعون ن دّهب ئعمّر س-ؤغروم ن لمن د أمعراض ن هارون نّا ئسّمغين ئݣدجݣن، د سنات ن تالْواحين ن-ؤژرو نّا خف توارين لوصييات ن لعاهد.
5 أفلّا ن صّندوق، لّان سين ن-ئد لموخليقات، نّا مي تّينين كروبيم، دا سنعاتن أحاضر ن ربّي. س وافريون نّسن سمالون خف تغطّايت ن صّندوق. والاينّي ؤر ئد لوقت-اد أݣ غا نسّفرو لومور-اد مليح.
6 أدّاي سّوجدن ئخاتارن ن دّين يي ئسكّين-اد ئمشيد، دا كشمن غر أنسا أمزوارو كو لوقت حما أد ݣين لخدمت نّسن.
7 والاينّي غاس أنمغور ن-ئخاتارن ن دّين أيد ئتّاكمن غر أنسا ويسّين ن تخامت، غاس يوت ن لمرت ݣ-ؤسݣّاس. ئلازم أد ياوي ئدامّن ن شا ن تمغروصت يي ربّي خف دّنوب نّس د دّنوب نّا ݣان ميدّن د دنوب نّا خف ؤرعالمن.
8 هان أينّا ئرا رّوح ن ربّي أد ئسنعت س-ؤياد: أبريد نّا ئتّاوين غر أنسا نّا مي تّينين: «قدس الاقداس» نّا ئحقّان ئسول ؤر ئرژيم، ماحدّ تسول تخامت خف واشال.
9 تخامت-اد تسول تݣا تاماتارت أر دغي، نّاݣ دا تمْوشين توكّيوين د تمغراص، نّا ؤر ئغيين أد سزديݣن ؤلاون ن وينّا تن ياكّان.
10 علاحقّ ݣان غاس لفرايض ن صّاحت أها حدّان خف ؤتشي، تسّي د تاردا، لومور-اد زرين غاس أر لوقت نّا ݣ-ئدّا ربّي أد-ئعديل كولشي.
11 والاينّي، لمسيح ياغول ئݣا أنمغور ن-ئخاتارن ن دّين. باش أد-اخ ئوش لباركا نّا ئدامن. ئكشم غر تخامت تامقرانت نّا ئشمّلن، ؤر تعديلن ميدّن أها ؤر تݣي زݣ دّونييت-اد.
12 ئكشم يوت ن لمرت غر أنسا نّا مي تّينين: «قدس الاقداس»، ييوي أݣّيدس ئدامّن نّس، ؤر-ئد ئدامّن ن-ئعتراس د ئعجلين، س-ؤياد ييوياخد أفوكّا ن وابدا.
13 مش ئلا ؤرشّا ميدّن نّا ؤر ئصفين س-ئدامن ن-ئعتراس د-ئزݣارن د ئغد ن تعجليت ئغوسين، دا ئسزديݣا صّواحات نّسن.
14 ؤݣارن ؤيا، هان ئدامّن ن لمسيح نّا ئوشان تودرت نّس يي ربّي س رّوح ن وابدا، أم تمغروصت نّا ݣ-ؤر ئلّي لعيب. ئدامّن نّس دّان بلا شك أد سزديݣن ؤلاون نّخ زݣ لفعايل نّا ئتّاوين غر لموت، حما أد نعبد ربّي نّا ئدّرن.
15 أياد أخف ئݣا لمسيح أمازان ئنݣر ربّي د ميدّن حما أد ئتبّت لعاهد ؤجديد، ئس أس دّان وينّا مي ئغرا ربّي أد-ورتن لخير ن وابدا نّا سن ئقاول. علاحقّ، ئمّوت لمسيح حما أد-ئفوكّا ميدّن زݣ لمعصييات نّا ݣان ݣ-ؤسّان ن لعاهد أمزوارو.
16 أدّاي تيلي شا ن لوصيت، ئلازم خف ميدّن أد صّحون ئس ئمّوت ونّا ت-ئݣان.
17 علاحقّ، ؤر دا تزرّي لوصيت ماعدا مش ئمّوت باب نّس. مش ئسول ئدّر لوصيت ؤر تواتا والو.
18 خف ؤياد، أود لعاهد أمزوارو ؤر ݣين ئس ميدّن ألّيݣ نّغلين ئدامّن.
19 موسى ئبرّح يي ميدّن س لوصييات كول، أم ؤينّا ئلّان ݣ لشتاب ن شّرع. داي يامژ ئدامّن ن-ئعجلين د-ئعتراس د وامان، أها ئروشّا لشتاب ن شّرع د ميدّن كول س تسطّا ن-ؤحشلاف ن زوفا د تاضوت تازݣّاغت.
20 أها ئنّا: «ويد أيد-ئݣان ئدامّن ن لعاهد نّا خف كون ئوصّا ربّي أد-ئس تݣيم».
21 فّير-اس ئروشّا موسى س-ئدامّن تاخامت ن لعيبادا د-ئسكّين نّا ديكس ئلّان.
22 خف لحساب ن شّرع، كولشي علاحال دا ت نسزديݣ س-ئدامّن. د لمعصييات ؤر دا تّومحونت ماعدا س-ؤنغال ن-ئدامّن.
23 مش ئخصّا أد نسزديݣ تاخامت نّا ئلّان خف واشال ئخصّا أت ت نروشّا س-ئدامّن ن تمغراص، ئد تاخامت ئحقّان لابدّا أت ت نروشّا س-ئدامّن ن شا ن تمغروصت نّا ييفن ئعجلين دئعتراس.
24 علاحقّ لمسيح ؤر ئكشيم غر أنسا نّا مي تّينين: «تاخامت ن ربّي» نّا ئلّان خف واشال، نّا عديلن ميدّن أها ئرويس أنسا ئحقّان، والاينّي ئكشم س-ئݣنّا س-ئخف نّس، هاتين ئبدّ دغي دات ن ربّي حما أد-اخ ئشافع.
25 لمسيح ؤر ئكشيم حما أد ئوش ئخف نّس شيݣان ن لمرّات، أم ؤنمغور ن-ئخاتر ن دّين نّا ئكشّمن كو أسݣّاس غر أنسا نّا مي تّينين: «قدس الاقداس» س-ئدامّن ن تمغراص.
26 مش ئݣا لحال ئمشيد، ئخصّا أت تكّ تمارا خف لمسيح شيݣان ن لمرّات زݣّوس تّوخلق دّونييت. والاينّي دغي، ئبايند يوت ن لمرت غر تنݣيرا ن زّمان أها ئݣ ئخف نّس د تامغروصت، حما أد ئمحو لمعصييت.
27 هان ميدّن دا تمتاتن يوت ن لمرت، فّير-اس دا د-ئتدّو واسّ ن لحساب.
28 أود لمسيح، ئوشا ئخف نّس يوت ن لمرت حما أد ياسي لمعصييات ن شيݣان ن ميدّن. أها ئدّا أد ياغول لمرت تيسنات ؤر ئد حما أد ئمحو لمعصييت، والاينّي حما أد ئفوكّا وينّا ت-ئتراجان.