8
لعاهد ؤجديد
1 هان أوال نّا ئصحان زݣ ؤينّا ئتّونان: هاتين غورنخ يون ؤنمغور ن-ئخاتارن ن دّين أم ونّا ئقّيمين ݣ-ئݣنوان خف-ؤفاسي ن لكرسي ن ربّي أمقران.
2 أر ئتݣّا لخدمت نّس ݣ-ؤدغار نّا ݣ-ئتوعباد ربّي، ݣ-ؤخام ئحقّان نّا ئبنا مولانا ؤر ئد بنادم.
3 كو أنمغور ن-ئخاتارن ن دّين ئتواݣ حما أد ئوش توكّيوين أها ئݣ تيمغراص يي ربّي. خف ؤياد ئخصّا يي ؤنمغور نّخ ن-ئخاتارن ن دّين أد ييلي غورس ماݣ-أكّا أود نتا.
4 مور-ئلّي لمسيح خف واشال، ؤر-ئتّاغول أد ئݣ أخاتار ن دّين. علاحقّ، لّان ياد داد ئخاتارن ن دّين نّا ياكّان توكّيوين خف لحساب ن-ؤينّا ئتّيني شّرع ن موسى.
5 ئخاتارن-اد ن دّين دا خدّمن ݣ تادّارت ن ربّي أم تنّا ئلّان ݣ-ئݣنّا. لّيݣ ئرا موسى أد ئعديل تاخامت ن ربّي. ئوصّات ربّي ئنّاياس: «رار لبال! ئخصّاش أت تعديلد كولشي أم ؤينّا ش سنعتخ ݣ جبل»
6 والاينّي دغي، لمسيح يومژ لخدمت ييفن لخدمت ن-ئخاتارن ن دّين ياضن. علاحقّ، نتّا أيد ئݣان أمازان ن لعاهد ؤجديد نّا ئتواݣن ئنݣر ربّي د ميدّن، ييفن لعاهد أقديم. ئتوبنا س-ؤينّا ئغودان شيݣان زݣ ؤينّا ئقاول ربّي.
لعاهد أمزوارو د لعاهد ؤجديد
7 مور ؤر-ئلّي لعيب ݣ لعاهد امزوارو، ؤر نتحدادجا يي لعاهد ياضن ݣ وانسا نّس.
8 والاينّي ربّي ئلامّا شّعب نّس د-ؤياد ئباين ݣ لكتاب: «أياد أيدا ئتّيني مولانا: هاتين دّان أد ددّون شا ن-ووسّان، نّاݣ ديخ أد ݣخ لعاهد ؤجديد د-أيت إسرائيل د-أيت يهوذا.
9 لعاهد اد ؤجديد، ؤر ئݣي أم لعاهد نّا ݣيخ د لجدود نّسن، ݣ واسّ نّا ؤمژخ-اسن أفوس أت تن سّوفّغخ زݣ تمازيرت ن مصر. علاحقّ ؤر ݣين س لعاهد ئنو. داي سامحخ ديكسن أود نكّين، أياد أيدا ئتّيني مولانا.
10 هان لعاهد نّا دّيخ أد ݣخ د-أيت إسرائيل فّير ن-ؤسّان نّا، أياد أيدا ئتّيني مولانا: «أد-اسن وشخ لعقل حما أد-ئسين لوصييات ئنو، أت تن-أريخ ݣ-ؤلاون نّسن، أد ݣخ ربّي نّسن أها ݣين نيتني شّعب ئنو.
11 أود يون زّيكسن ؤر ئسقرا ممّيس ن تمازيرت نّس ؤلا ؤماس، أد-اس يينّي: "ئخصّا أت تيسيند مولانا"، علاحقّ دّان أد يي ئسين كول نسن، زݣ ؤمژيّان أل-أمقّران.
12 أد-أسن سامحخ ݣ لمعصييات نّسن، أها ؤسار شتيخ دّنوب نّسن».
13 لّيݣ ئسيول ربّي خف لعاهد ؤجديد، هاتين ئرار لعاهد أمزوارو اقديم، د مايد ئݣان أسكّين أقديم د-أمرشو دا ئتدّو ئبردان نّس.