7
ملكي صادق
1 ملكي صادق، نتّا أيد ئݣان أݣلّيد ن تمازيرت ن سالم أها ئݣ أخاتار ن دّين ن ربّي ئعولان. لّيݣ د ياغول براهيم زݣ ئمنغي نّاݣ-ئرنا ئݣلّيدن. ئحاطر ملكي صادق يي براهيم أها ئبارشت.
2 ئوشاس براهيم لعشور زݣ ؤينّا د ييوي. لمعنا ن ملكي صادق: ݣ-ؤمزوارو: «أݣلّيد نّا ئحكمن س-لحقّ». زݣ تنيلا ياضن «أݣلّيد ن سالم» لمعنا نّس «أݣلّيد ن لهنا».
3 أݣلّيد-اد ؤر غورس ئبّاس، ؤلا مايس ؤلا لاصل. ميدّن ؤر دا سّاوالن خف تلاليت نّس، ؤلا خف لموت نّس. ئݣا أم ممّيس ن ربّي. أها ئݣا أخاتار ن دّين خف دّوام.
4 سموقلات مشحال أيد ئمقّور وادّور ن-ؤرݣاز-اد! ئبّاتنخ براهيم ئوشاس لعشور زݣ لمال نّا د ييوي زݣ ئمنغي.
5 شّرع ن موسى دا ئتوصّا ئخاتار ن دّين نّا ئݣان زݣ أيت لاوي أد-امژن لعشور زݣ ميدّن ن-إسرائيل نّا ئݣان أيتماتسن، مغار ݣان أود نيتني زݣ تاروا ن براهيم.
6 والاينّي ملكي صادق ؤر ئݣي زݣ أيت لاوي، يومژ لعشور زݣ براهيم، أها ئبارش براهيم نّا غر ئلّا ؤقاول ن ربّي.
7 هاتين ؤر ئلّي شّك ئس ونّا مي ئمقّور وادّور أيدا ئتباراشن ونّا مي ئمژّي.
8 ئخاتارن ن دّين نّا ئتّامژن لعشور، ݣان ميدّن نّا ئدّان أد مّتن يون ن واسّ، ئد لشتاب ن ربّي دا ئتيني خف ملكي صادق نّا يومژن لعشور زݣ براهيم، ئس-ئسول ئدّر.
9 مش ئزري واوال-اد، نغي أد نيني: لّيݣ ئوشا براهيم لعشور خف لمال نّس، هان تاروا ن-أيت لاوي نّا ئتّامژن لعشور، وشان أود نيتني لعشور.
10 علاحقّ، مغار سولن ؤر لولين أيت لاوي، ئݣا براهيم ئبّاتسن لّيݣ-اس ئݣرا ملكي صادق عرّاض.
لمسيح أم ملكي صادق
11 هان لخدمت نّا ئتݣّا ؤخاتار ن دّين نّا ئݣان زݣ أيت لاوي، تݣا لّساس ن شّرع نّا ئتموشين يي أيت إسرائيل. والاينّي مور ݣين ئخاتارن ن دّين ن-أيت لاوي شا ن لخدمت ئشمّلن، ؤر تحدادجان يي شا ؤخاتار ن دين ياضن أم ملكي صادق نّا ؤر ئݣين أم هارون نّا ئݣان زݣ أيت لاوي.
12 علاحقّ أدّاي تبدّل لخدمت ن-ؤخاتار ن دّين، ئلازم أد ئبدّل أود شّرع.
13 ونّا خف سّاوالن ئواليون-اد، ئݣا زݣ تقبيلت ياضن، نّا ؤر دجين ئݣي شا ن حدّ زّيكس لخدمت ن ؤخاتار ن دين ݣ-ؤسغرص.
14 ئدّخ ئتواسّن ئس ئلولا مولانا نّخ ݣ تقبيلت ن يهوذا، د موسى ؤر ئنّي ئس دّان أد ئلين ئخاتارن دّين ݣ تقبيلت-اد.
15 د-ؤينّا ئسبايان أسكّين-اد مليح: أد ئضهر يون ؤخاتار ن دين ياضن أم ملكي صادق.
16 هاتين ؤر ئݣي أخاتار ن دّين خف لحساب ن تاݣمات، والاينّي س لجهد ن يوت ن تودرت نّا غر ؤر-ئلّي لحدّ.
17 علاحقّ، لشتاب ن ربّي دا ئتّيني: «تدّيد أت تݣد أخاتار ن دّين أبدا أم ملكي صادق!»
18 هاتين ئمشيد أس ئتّوبطل شرع نّا ئسّوالن خف ئخاتار ن دّين، علاحقّ ؤر ئشمّيل أها ؤر ديكس ئقّيم نّفع.
19 شّرع ن موسى ؤر-أخ د ييوي شا ؤسكّين ئشمّلن. والاينّي ئتموشاخ يون ن رّجا ييفن شّرع أها ئس أس ندّا أد نقرّب غر ربّي.
20 ؤݣار ن-ؤياد، تلّا تݣالّيت ن ربّي. ئد أيت لاوي دا تّاغولن أد ݣين ئخاتار ن دّين بلا تݣالّيت.
21 والاينّي عيسى ياغول ئݣا أخاتار ن دّين س تݣالّيت ن ربّي نّا س-ئنّان: «ئݣّول مولانا أها ؤر دا ئتفّغ زݣ واوال نّس، شݣّين أيد ئݣان أخاتر ن دّين أبدا».
22 خف تݣالّيت نّا، ياغول عيسى ئݣا ضّامن ن لعاهد نّا ييفن لعاهد أمزوارو.
23 ؤݣار ن-ؤياد، كّان شيݣان ن-ئخاتارن ن دّين، علاحقّ لموت ؤر دا سن تّادجا أد قّيمن ݣ لخدمت نّسن.
24 ئد عيسى ئݣا أخاتار ن دّين نّا ؤر دا ئتبدّالن، علاحقّ ئدّر أبدا.
25 خف ؤياد، ئغي أد ياوي أفوكّا ئشمّلن يي وينّا ييس ئتقرّابن غر ربّي. علاحقّ نتّا ئدّر خف دّوام حما أداسن ئشافع.
26 عيسى أيد ئݣان أنمغور ن-ئخاتارن ن دّين نّا نحدادجا، نتّا أيد ئژيلن غر ربّي، ؤر دجين ئݣي شا ن لمعصييت، ؤر ديكس لعيب، ؤر تݣي تودرت نّس أم تي ئمعصان أها ئهزّات ربّي نّيݣ ن-ئݣنوان.
27 ؤر-ئحدادجا أد ئݣ تيمغراص كوياس خف لمعصييات نّس د لمعصييات ن ميدّن أم ؤينّا تݣين ئنمغورن ن ئخاتارن ن دّين، علاحقّ ئݣا نتّا أياد كولشي ݣ يوت ن لمرت، لّيݣ ئوشا تودرت نّس غيفنخ.
28 هان شّرع ن موسى دا ئعزّل ميدّن نّا ؤر ئشمّيلن أد ݣين ئنمغورن ئخاتارن ن دّين. والاينّي تاݣالّيت ن ربّي نّا د-ئدّان فّير ن شّرع، تعزل ممّيس ن ربّي ئشمّلن، حما أد ئݣ أنمغور ن ئخاتارن ن دّين أبدا.