6
ررات لبال ؤرتفغم أبريد لمسيح
1 خف ؤياد، ئخصّاخ أد نخاتر ݣ لعقل، ؤر نتبداد غر تيغري تامزواروت نّا خ-ئعلّم لمسيح، ؤر نتّاغول منّا ؤجديد أد نݣ لّساس ن ليمان نّخ نّا خ-ئتّوسعلّم تيزويري أم تّوبت زݣ لفعايل نّا ئحرّين غر لموت، د لفعايل نّا ئحرّين غر ليمان س ربّي،
2 د-ؤعلّم خف ؤغطّس ݣ وامان د-ؤسراس ن-ئفاسّن د تنكرا ن-ئمتّين د واسّ ن لحساب.
3 ندّا أد نݣ أياد كول، مش ئرا ربّي!
4 ئد ميدن نّا د-ئدان غر أسيد ن ليمان س لمسيح، ؤرمن توكّي ن-ئݣنّا، أمژن أمور زݣ رّوح ن لقدوس
5 أها أرمن تاضفي ن واوال ن ربّي د لموعجيزات ن زّمان نا ئدّان أد-ئدّو.
6 فّير ن-ؤينّا، وينّا ؤر ؤمينّ. ؤر نتّيغي أت تن نرار غر أبريد ن ربّي. علاحقّ نيتني س-ئخفاون نّسن دا صلّبن مميس ن ربّي لمرت تيسّنات أها أر غيفس تقبّاضن بطايطاي.
7 ئدّخ تامازيرت نّا ئسوان أمان ؤنژار نّا غيفس ئكّاتن كو لمرت، دا تسّمغاي لغلت نّا ئتنفاعن ونّا ت-ئكرزن أها أر ديكس ئتݣّا ربّي لباراكا.
8 والاينّي مش تسّمغي تمازيرت-اد ئسنّان د-ؤزݣّار، هاتين ؤر ديكس لفايت، تستاهل سّخض ن ربّي، غر تنݣيرا تدّا أت تغوس.
9 مغار-اون نتّيني أوال-اد أيايتما، هاتين نسّن ئس تلّام ݣ-ؤبريد ئمنان نّا ئتّاوين غر نّجا.
10 ربّي ؤر ئݣي ضّالم حما أد ئتّو لخدمت نّون، ؤلا تايري نّون نّا س تسضهرم، لّيݣ تعاونم ئمومن أها تسولم دا سن تعاوانم.
11 هاتين نرا أد ئسباين كو يون زّيݣون أم لحراشييت-اد أر تينݣيرا، حما أد ئجرو ؤينّا ترام.
12 أد-ؤر تݣّات ئمعݣازن، والاينّي ݣات أم وينّا ئتامزن س ليمان د صّبر لورت نّا ئقاول ربّي.
أقاول ن ربي
13 هاتين لّيݣ ئقاول ربّي يي براهيم، ئݣّولّا س-ئخف نّس، علاحقّ ؤر ئلّي ماي تْييفن حما أد-ئس ئݣّال.
14 ئنّا يي براهيم: «دّيخ أك باركخ أها سعدّوخ ترّيكا نّك».
15 ئقّيم براهيم أر ئتݣانّاي س صّبر، ألّيݣ يومژ أينّا س-ئقاول ربّي.
16 ميدّن دا تݣالّان س ونّا تن يوݣرن، تاݣالّيت تݣا ضّمانت نّا ئتݣّين لحدّ يي مايد ئݣان أمخالاف ئنݣراسن.
17 خف ؤياد، لّيݣ ئرا ربّي أد ئسباين يي وينّا ئدّان أد-أمژن أينّا ئقاول، ئس ؤر-ئتبدّال واوال نّس أبدا، ئسرصّات س تݣالّيت.
18 أقاول د تݣالّيت، ئسكّين-اد سّين ؤر دا تبدّالن أها ؤر دا ديكسنت ئسحيلّيل ربّي أبدا. أياد دا خ-ئسزعيما شيݣان، نݣا ليمان نّخ ديكس حما أد نامژ مليح ݣ رّجا نّا خ-ئوشا.
19 رّجاياد ئݣا يي تودرت نّخ أم ؤݣلزيم ئصحان نّا س ترصّان ئغرّوبا. دا ئتّاكم ؤرين ئ-لخاميت ن تادّارت ن ربّي.
20 ݣ-ؤدغار-اد أيد ئكشم عيسى تيزويري خف سّيبت نّخ، أها ياغول ئݣا أنمغور ن-ئخاتارن ن دّين خف دّوام أم ملكي صادق.