5
1 كو أنمغور ن-ئخاتارن ن دّين دا ئتّوختار زݣ ئنݣر ن ميدّن، حما أد ئنوب خف ميدّن ݣ لخدمت ن ربّي، أر ياكّا توكّيوين د تمغراص خف لمعصييات.
2 أر ئسبايان رّحمت نّس يي وينّا ؤر ئسّين والو د وينّا ئفّغن أبريد، ئدّخ أود نتّا س-ئخف نّس دا ئتݣّا دّنوب.
3 أياد أخف-اس ئخصّا أد-ئݣ تيمغراص أود خف دّنوب نّس، ئمشينّا دا ئتݣّا تيمغراص خف دّنوب ن ميدّن.
4 أود يون ؤر دا ئتّامژ لخدمت-ن ؤخاتار ن دّين زݣ ئخف نّس، والاينّي دا ت-يتّامژ ونّا مي ئغرا ربّي، ئمشينّا ئغرا يي هارون ئݣماس ن موسى.
5 لمسيح، أود نتّا ؤر ئݣي لعزّ يي ئخف نّس حما أد-يݣ أنمغور ن-ئخاتارن ن دّين، والاينّي ربّي أيدا س-ئنّان: «شݣّين أيد ئݣان ممّي، زݣ واسّ-اد نكّين أيد ئݣان ئبّاش».
6 أها ئنّاياس ربّي ألّو: «شݣّين أخاتار ن دّين أيد تݣيد أبدا أم ملكي صادق».
7 ݣ-ؤسّان لّيݣ ئلّا لمسيح خف واشال، أر ئتتّرٍ يي ربّي أها أر ديكس ئتزاواݣ س-ئغويّان د-ئمطّاون أت تيفوكّا زݣ لموت. داي ئنعماس ربّي خف طّاعت نّس.
8 مغار ئݣا لمسيح ممّيس ن ربّي، ئربّا طّاعت س تمارا نّا غيفس ئكّان.
9 لّيݣ ئشمّل لخدمت نّس، ياغول أر ياكّا نّجا نّا ئدامن يي ميدّن كول نّا ت-يتضاعن.
10 يّيه، ربّي أي ت-ئݣان أنمغور ن ئخاتار ن دّين أم ملكي صادق.
ررات لبال أتفغم زݣ ليمان س ربّي
11 خف ؤسكّين-اد، ئلّا غورنخ شيݣان ن-واوال، والاينّي ئشقّا ؤسفرونّس غيفون! علاحقّ ئژّاياون ؤنلي أت تفهمم أسكّين-اد.
12 هاتين تزري شيݣان ن لوقت حما أد تݣيم لموعلّيمين، والاينّي كونّي تحدادجام يي ماي كون ئسقران ئسكّين ئمزوورا ن واوال ن ربّي. كونّي تسولم تحدادجام يي وغو، ؤر-ئد يي ماتتشا ئقسحن.
13 د ونّا ئسّان أغو، ئݣا تاسلميا. ؤر دا ئتفهام أوال ن لحقّ.
14 ئد ؤتشي أقورار يي ئخاتارن، علاحقّ علّمن مليح ميمشي أد بضون ئنݣر لخير د لعار.