2
هان أد تݣّيم تودماوين.
1 أيايتما، ئتخ كونّي ثومنم س مولانا، عيسى لمسيح ئݣان مولانا ن لعزّ. أد-ؤر تݣّام ثودماوين.
2 داي مش ئكشم يان ن-ؤرݣاز غر ثادّارت ن ربّي نّون ئݣان تيلخوتام ن دّهب ئلس ملسيوث ئغودان، أها ئكشم يون ن-ؤرݣاز ديخ ألتو ئݣان أمژلوض س ملسيوث ئݣان ئبردوزن.
3 داي ثراعام غر ونّا ئلسان ئعبان غودانين أها ثينيماس: «شݣّين قّيم ݣ ؤدغار ئژيل!» ثينيم ئ-ومژلوض: «شݣّين قّيم دينّا، نغد قّيم ݣ وشال غر ئضارن نّخ».
4 ئس ؤر ئد ثودماوين أيدا تݣّام ئنݣراتون؟ تعايدم دا تحكمم س نّيث ؤر-ئحلين.
5 سفلدات أيايثما ئعزّين، ئس ؤر ئخثار ربّي ئمژلاض ن دّونيت ئرارثن طرحن س ليمان؟ ݣين ئورّاثن ن ثݣلّيت نّا ئقاول يي وينّا ثيتّيرين.
6 د كونّي داتحقّارم ئمژلاض! ئس ؤر ئد ئمطرّحن أيد غيفون ئتّنباضن أر كون تّاوين غر لمحاكيم؟
7 ئس ؤر ئد نيثني أيدايتّينين أوال ن لكفر خف ئسم ئژيلن نّاس داون قّارن؟
8 ماشان أدّاي دا تݣّيم لوصيث ئهمّان ن شّرع ن ربّي، ئمشينّا ئلّان ݣ لشتاب: «أد تيريث أدجّار نّش ئمشينّا دا تّيريث ئخف نّش»، هاثين ئژيل ؤينّا دا تݣّيم.
9 ماشان مش دا تݣّيم ثودماوين، هات دّنب أيدا تݣّام، هاثين ئدّا أد ئيحكم غيفون شّرع ن ربّي، ئدّخ ثفغم أبريد نّس.
10 ئدّخ هان ونّا ئݣان أينّا ئنّا شّرع ن موسى كول، ماشان ؤر ئݣي غاس يون ؤسكين، ئݣا أمّاني ئفغ أبريد ن شّرع كول.
11 ئدّخ ونّا ئنّان: «أد-ؤر تفساد»، ئنّا ديخ ألثو: «أد-ؤر نقّا». داي مش ؤر ثفسيد ماشان ثنغيث هاثين ؤر ثݣيث أينّا ئنّا شّرع.
12 سيولاث أها ثمصرافم أم ميدّن نّا ئدّا ربّي أد غيفسن ئحشم س شّرع ن-ؤفوكّا.
13 ئدّخ لحكام ؤر دا يتّرحام وينّا ݣ-ؤر ثلي رحمث، والاينّي رحمث ثرّا لحكم.
ليمان د لخير
14 ماتّا نّفع أيايثما، مش دا ئتّيني يون ديݣون ئس ئلّا غورس ليمان، ماشان ؤر دا ئتّݣّ لخير؟ ماخ ئس ئدّا أد ييغي ليمان أت ت-يفوكّا؟
15 داي مش ئلّا يون ن ݣماش نغد يوث ن-ؤتماش حژّوضي أها ئنغثن لاژ.
16 أها ئنّاياسن شا ديݣون: «ربّي أد غيفون ئسهّل! لساث ئعبان رغانين ثتشيم أينّا ئژيلن». ماتّا نّفع ن-ؤياد، مش ؤر-اسن توشيم أينّا حدادجّن يي صّاحت نسن؟
17 ئمشيد أود ليمان وحدو، بلا لفعايل ئمّوث.
18 والاينّي شان يون أد ييني: «شݣ غورش ليمان، ئد نك غوري لاعمال»، أداس ئنيخ: «نعثي ليمان نّش بلا لاعمال، ئد نك أداش نعتخ ليمان ئنو س لفعايل ئنو».
19 شݣّين دا تّامنث س ربّي ئݣا يون. ئژيل ؤينّا تّينيث، أود شّياطين دا تّامنن س ربّي، أراس تّݣّدن أها أرترݣيݣين!
20 ماشان أيارݣاز أوار لعقل! ئس ثريث أتيسينث ليمان بلا لعامال ن لخير ئمّوث؟
21 ئس ؤر ئتّاقا بّاثنخ إبْرَاهِيم ربّي س لافعال نّس، ألّيݣ يومژ ممّيس إسحاق أد-آس ئغرص خف ؤدغار ن-ؤسغرص؟
22 هاثين ثانّايت ليمان نّس ئمون د لاعمال، ألّيݣّ ئشمّل س لاعمال ليمان.
23 داي ئجرو ؤينّا ئنّا لشثاب: «أها يامن إبْرَاهِيم س ربّي ئحاسباست د صّلاح». أراس قّارن: «أمدّاكل ن ربّي».
24 ئس ؤر ثانّايم ئد س لفعايل ألتو أس دا يتعاياد بنادم ئتّاقا ربّي، ؤريد غاس ليمان بوحدو.
25 ئمشيد أيتݣا راحاب نّا دا يتّفسادن ديخ ألتو، ئس ؤر تعايد تتّاقا ربّي س لخير نّا تݣا، ألّيݣ ترحب س ئمازان ن-اسرائيل ݣ أسن تنعث يون ن-ؤبريد ياضن؟
26 ئدّخ أود دّات بلا رّوح هاثين تمّوث، ئمشيس أود ليمان بلا لعمال هاثين ئمّوت.