يعقوب 3

تيخّوت ن ييلّس

‏1 أد ؤر ديݣون تّيلين شيݣان ن لمعلّيمين، أيايثما! ئدفاراخ يان لحساب ؤݣار ن-ويض.

‏2 ئدّخ دانتّݣّا دّنب كول نّخ ݣ شيݣان ن-ئسكّين. ئد مش ئلّا ونّا ؤر دايتّݣّين دّنب س واوال، هاثين أرݣاز ئيشملّن أيد ئݣا، ئغيي أد ئݣ ألݣام يي صاحث كول ديخ ألتو.

‏3 هان ئيْسان داسن نتݣّا ألݣام ݣ ئقما نّسن أكّ أداخ ضاعن أها نحريثن أك ماݣ نرا.

‏4 هان أود ئغرّوبا مغار مقّورن أنشت دا تن ئتّاوي ؤزݣو ئݣان شّوط، أر ثن تحرّي غاس يوت ن تالواحت ئمژّيين شيݣان غر ماني غر ئرا ونّا ثن ئحرّين.

‏5 ئمشيد أود ئيلس ألثو، نتّا غاس يون طّرف ئيمژين ݣ دّات، و لاينّي دايتعنّا س شيݣان ن-ئسكّين. راعاث أود لوقيد ئمژّين هاثين ئغي أد ئسغوس لغابت ئخاثرن!

‏6 د ييلّس ئݣا أم لعافيت! ئلين ديكس كول دّنوب. نتّا ئدج زݣ صّاحث نّخ أها أر تيتوسّاخ كول. أر ئسغوس تودرث نّخ كول س لعافيت دينّا ديدّان زݣ لعافيت ن جاهنّام.

‏7 ئدّخ أد ييغي بنادم أد ئنبض خف كول لوحوش د ئجضاض د وينّا ئتّمرورودن د-ؤينّا ئلّان ݣ لبحر.

‏8 ئد ئيلس، أود يون ن-ؤرݣاز ؤر ئتّيغي أد غيفس ئنبض. ؤر ئحلي، ؤر دا غيفس ئتّونباض، ئعمّر س سّم نّا ئنقّان.

‏9 د نتّا أس دانتباراش ربّي بّاثنخ، د نتّا أس دانرݣّم ميدّن نّا ئخلق ربّي خف سّيفت نّس.

‏10 أينّا ئغودان د لحاشت ؤر ئحلين زݣ يون ن-ؤقمو أزݣ دا د تّفّغن! هاثين ؤر ئعديل أيايثما أد ئتّواݣ أم ئيمشيد.

‏11 ئس غين أد فغن وامان ياطفوثن د وامان ئمّيرغن زݣ يون ن-ؤغبالو؟

‏12 مّاخ أيايثما، ئس تغيي يوت ن ثازارت أتّارو زّيتون، نغد دّيليث ن واضيل أد تّارو ئقورّان؟ أود أغبالو ن وامان ئمّيرغن ؤر دايسّوفوغ أمان ياثفوتن!

لحكما ديدّان زݣ غور ربّي

‏13 ماتّا وا غر تلّا ديݣون لحكما أها ئيفهم؟ أد ئسباين لفعايل نّس س-ؤمصاراف ئغودان ݣ لحكما د بلا لكيبر.

‏14 ماشان مش ديݣون ئلّا لحسد ݣ ؤول د لغْنان، أد ؤر تݣّام شّان يي ئخفاون نّون أها ثسحيلّيلم خف لحقّ!

‏15 أياد ؤر ئݣي لحكما ن وافلّا، ماشان لحكما ن ميدّن ن واشال أيد تݣا د ثين شّيطان.

‏16 ئدّخ ماني ݣ ئلّا لحسد ن وول د ئمنغي داتّيلي ثيريت د ؤسكين ؤر ئحلين.

‏17 ئد لحكما نّا ديدّان زݣ ربّي، نتّاث أفلّا ن كولشي، تصفا، دا تّݣّا لهنا، ترطب، أر تمسفهام، أر تّاݣّا رّحمت، أر تاكّا لغلت ئژيلن، ؤر داتّݣّا ثودماوين ؤر داتنافاق.

‏18 د لغلّث ن صّلاح دا تّوزراع ݣ لهنا س-ؤينّا ئتݣّان لهنا.