3
تاروا ن ربّي
1 حقّايات شحال أيداخ ئتّيري بباتنخ ألّيݣ نعايد نݣا أرّاو ن ربّي! هاثين نݣا أرّاو نّس س نّيت. د ؤوياد أس ؤوراخ سّين ميدّن ن دّونيت، ئتخ ؤر سّين ربّي.
2 أيايثما ئعزّن، دغي، نكني نݣا ثاروا ن ربّي، والاينّي نسول ؤر نسّين مايد ئنّان أداخ ئجرو غر داث، ئتخ دا نتّيسين ݣ لوقث نّاݣ ئدّا أد ئعايد لمسيح، ندّا أنيݣ أم نتّا، ننّايت أم ؤينّا ئݣا.
3 كول ونّا غر ئلّا رجاياد ݣ لمسيح، ئخصّات أد ئسزديݣ ئخف نّس أم لمسيح ئيزدّيݣن.
4 كول ونّا دا ئتݣّان دّنب دا ئتعدّا خف شّرع ن ربّي، ئتخ دّنب نتّا أݣان أتعدّا خف شّرع ن ربّي.
5 كُنّي دا تّيسينم ئد لمسيح ئدّاد حما أد ياسي دّنوب نّخ، ئتخ نتّا ؤر ديݣس دّنوب.
6 كول ونّا ئتبتن دييس، ؤر دا يخطّو. ئد ونّا دا يخطّون، ؤر دجين ثيانّاي ولا ئسّنث.
7 أييفراخ، أد ؤر كن ئسّخضو أود يون، ونّا دا ئتݣان لفعايل نّا ئرا ربّي، هاثين ئتّاقّا ربّي أم لمسيح.
8 ونّا ئتݣان دّنوب نتّا زݣ إبليس، ئتخ إبليس زݣ تيزوري ئفّغ أبريد. خف ؤيا أس ديدّا ممّيس ن ربّي حما أد ئهدم لفعايل ن-إبليس.
9 كول ونّا ئلولان زݣ ربّي ؤر دا ئتݣّا دّنوب، ئتخ أينّا ديݣس ئزرع ربّي دا ئتغيما ديݣس. ؤر دا ئتّيغيي أد ئݣ دّنوب، ئتّخ ئلولا زݣ ربّي.
10 ئيمشيس أس دا تضهارن ورّاو ن ربّي د ورّاو ن-إبليس: كول ونّا ؤر دا ئتݣان أينّا ئرا ربّي، ؤر ئݣي زݣ ربّي. أود ونّا ؤر دا ئتّيرين ݣماس ؤر ئݣي زݣ ربّي.
مراياث يراون
11 ئتخ واد أݣّان لخبار نّا مي تسلام زݣ ثيزويري: ئخصّياخ أنتمييري ݣراخ.
12 أد-ور نتݣا أم قَايِينْ نّاݣ نغان ݣماس. قايين ئݣا زݣ تاروا ن-إبليس: ماخ ألّيݣ ئنغا ݣماس؟ ئتخ لافعايل نّس ؤر حلينث، ئد لفعايل ن ݣماس هابيل زيلنث.
13 أد-ور تعجّاباث أيايثما، مش كُن شرهن ميدّن ن دّونيت.
14 نكني نسّن ئس نموتّي زݣ لموث غر تودرت، ئتخ دا نتّيري أيثماثنخ. ونّا ؤر دا ئتّيرين ݣماس دا ئتغيما ݣ لموث.
15 كول ونّا دا ئشرهن ݣماس هاثين ئݣا ونّا دا ئنقّان، كنّي تسّنم ئد ونّا دا ينقّان ؤر غورس ثلّي تودرت ن وابدا.
16 س-ؤياد أس نسّن مايد ئݣان ثايري: لمسيح ئشا تودرت نّس غيفنخ، أود نكني، ئخصّاياخ أنش تودرت نّخ خف أيثماثنخ.
17 مش ئلاّ شان يون غورس لمال ن دّونيت، يانّاي ݣماس ئحلادجا أها ؤر غيفس ئحنّا، ميمش ئتّيغي أد ييني دا ئتّيري ربّي.
18 أيارّاو ئنو، ؤر ئخصّا ثايري نّخ أت تيلي غاس س واوال د ييلس، والاينّي س لافعال د لحقّ!
19 س-ؤوياد أس ندّا أنّيسين ئد نكني زݣ لحقّ. أها ئلين ؤلاون نّخ هنّان داث ن ربّي.
20 أود مش-اخ لامّان ؤلاون نّخ. هان ربّي يوݣرثن أها ئعالم خف كولشي.
21 أيايثما ئعزّن، مش ؤراخ لامّان ؤلاون نّخ، هاثين غورخ لامان ݣ ربّي.
22 حما أينّاس نسّوثر أتناف زّيكس، ئتخ دا نتݣا س لوصيّاث نّس أها أر نتݣّا أينّا ئرى ربّي.
23 ثاد أݣّان لوصيث نّس: ئخصّا أنّامن س-ئسم ن ممّيس عيسى لمسيح. ئخصّا أنتمييري ݣراتنخ أم ئمشينّاخ ئوصّا.
24 ونّا ئتݣان س لوصيّاث ن ربّي، دا ئثباث ديكس ربّي أها ئتبث نتّا ݣ ربّي. س-ؤياد أس دا نتّيسين ئس ئثبث ديݣنخ: س رّوح ن ربّي نّاخ ئشفا.