2
1 أياراو ئنو، داون تّاروخ أياد حما ؤر تݣّام دّنوب. داي مش ئݣا شان يون دّنب، هاثين ئلّا غورّخ يون ؤشفيع نتّا أݣّان عيسى لمسيح ئتّوبرّان، نّا ئتّشفاعن غيفنخ دات ن بابا ثنخ.
2 نتّا أيد ئݣان تامغروصت خف دّنوب نّخ، ؤر ئد غاس دّنوب نّخ، والاينّي أود وين دّونيت كول.
3 ئمشيس ئلّا غورّخ ليقين ئس نسّن لمسيح: مش نݣا س لوصيّات نّس.
4 ونّا ئتّينين: «سّنخت» أها ؤر دا ئتݣا س لوصيّات نّس، ئݣا بو ئحلّالن، ؤر ديكس لحقّ.
5 ماشان ونّا ئتݣان س واوال نّس، س نّييث تشمّل ديكس ثايري ن ربّي. س-ؤياد أس دا نتّيسين ئس نتبث ديݣس.
6 ونّا ئتّينين: هاثين ئتبث ديكس، ئيخصّاص أم ؤينّا ئݣا لمسيح، أت تيݣ أود نتّا.
لوصيث ثوجديت.
7 أيايتما، هاثين ؤر داون تّاروخ شا ن لوصيت ئݣان توجديت، والاينّي ثقديمث أيثݣا غورّون زݣ ؤمزوارو. ئد لوصيث-اد ثاقديمث نتّاث أݣان أوال نّا مي تسلّام.
8 واخّا ئيمشيس، هاثين داون تّاروخ ياث لوصيت تسول تݣا ثوجديت. د لحقّ ن لوصيات-اد دا يتبيان ݣ لمسيح د ديݣون: هان ثالّسث دا تياكّاس، ئد أسيد نّاݣ حقّان دا يسّادّا زݣ قبل.
9 ونّا ئنّان ئلّا ݣ ؤسيد، أر ئشرّه ݣماس، هاثين ئسول ݣ ثالّسث.
10 ئد ونّا دا يتّيرين ؤماس، نتّا أدّا يتعيشن ݣ ؤسيد، ؤر ئقّيمي ماس ئتݣّان لعثرث.
11 والاينّي ونّا ئشرّهن ؤماس، هاثين ئلّا ݣ تيلّاس. أر ئتدّو ݣ تيلّاس أها ؤر ئسّين ما غر ئدّا، ئتخ تيلّاس عمانثاس ألّن نّس.
12 داون تّاروخ أئيشيرّان، حما أت تيسينم ئس-اون تّوغفرنث دّنوب نّون س لفضل ن-ئسم ن لمسيح.
13 دا تّاروخ يي بّا نس ن كّو يون ديݣون، حما أد ييلي غورّون ليقين ئس تسّنم ماݣ لّان زݣ ثيزويري، أراون تّاروخ أييعرّيمن حما أت تيسينم ئس ثرّام إبليس.
14 أروخاون أييمزيان حما أد ييلي غورّون ليقين ئس تسّنم بابا ثنخ. أروخاون أييد بابا ثنخ حما أت تيسّنم لمسيح نّاݣ لاّن زݣ ثيزويري. أروخاون أييعرّيمن ئتخ تجهدم د واوال ن ربّي ئيتبث ديݣون أها ترّام إبليس.
أد ؤر تّيريياث دّونيت
15 أد ؤر تّيرياث دّونيت، ؤلا ئسكّين لّانين ديݣس. مش ئرا شان يون دّونيت، ؤر ديݣس ثلي ثايري ن بابا ثنخ.
16 ئتخ كول ما ݣلّان ݣ دّونيت: شهواث ن دّات د شهوى ن والّن د كول أينّا س دا يتعنّا بنادم ݣ دّونيت. د ئسكّين-اد كول ؤر ݣين زݣ بابا ثنخ، والاينّي زݣ دّونيت.
17 د دّونيت د شهواث نّس دّانث أد فنونث، ئد ونّا دا يتݣّان أينّا ئرا ربّي دا يتغيما أبدا.
رراث لبال نّون زݣ ئعداون ن لمسيح.
18 أئشيرّان، تاد أݣّين ثسّاعت ثانݣاروت! تسلام ئس أدّيدّو ؤعداو ن لمسيح. هاثين أود دغي، ضهرند شيݣان ئعداون ن لمسيح ئنݣراتنخ. س ؤياد أس دا نتّيسين ئد تاد أݣّين ثسّاعت ثانݣاروت.
19 زّيݣنخ أزݣ فغن، والاينّي ؤر ݣين زّيݣنخ، ئتخ أموريد ئس ݣان زّيݣنخ ثالي قّيمان غورخ. والاينّي س-ؤياد دا سبيان ئس ؤر ئݣي أود يون ديݣسن زّيݣنخ.
20 ئد كنّي ئفياون ربّي رّوح نّس حما أت تفهمم كولشي.
21 ئد نك ؤر داون تّاروخ ئتخ ؤر تسّينم لحقّ، والاينّي داث تّسينم، ئتخ ثيحلّال كول ؤر دا د تدّونث زݣ لحقّ.
22 ماݣّان بو ئحلّال، غاس ونّاݣ ئنكرن عيسى ئد نتّا أݣان لمسيح. ونّا أݣان ضد لمسيح، نّاي ئتّنكارن بابا ثنخ د ممّيس.
23 ونّا ئنكّرن لعيل هاثين ئنكّرن أود بّانس، ئد ونّا ئقرّان س لعيل أمّي ئيقرّا س بّانس أود نتّا.
24 ئد كنّي، أينّا مي تسلام زݣ تيزويري. ئخصّا أد ئيتبث ديݣون. مش ئثبث ديݣون واوال-اد أود كنّي أت تبثم ݣ ممّيس د بابا ثنخ.
25 واد أيد ئݣان لقاويل نّاخ ئقّاول ربّي: تودرت ن وابدا.
26 أراون تّاروخ أياد خف وينّا ئران أداون زلن أبريد.
27 والاينّي كنّي، هان رّوح نّا ديݣزن زݣ ربّي ئسكن ديݣون، دغي ؤر-اون ئخصّا ما كون ئسعلّامن ئتخ رّوح ئلّان ديݣون داون ئسعلّام كولشي، ئتخ ديݣس لحقّ ؤر ديݣس ثيحلّال، ثبثاث ݣ لمسيح س-ؤينّا آون ئيعلّم رّوح لقدس.
28 دغي أ-ئيشيرّان، ثبثاث ديݣس حما أدّاي ديضهر أتّيلي غورون تّيقا، حما أد ؤر نتحشّام أدّاي ديعايد لمسيح.
29 مش تسّنم ئس ئݣا لحق، ئخصّاكن أت تيسينم ئد كول ونّا ئتݣان لموراض ن ربّي ئتيارو زّيݣس.