2
لوصييات ن بولس يي ئمومن
1 ئد شݣّين، ئخصّا أت تسّقرات أينّا ئمساسان د-ؤسقرا نّا ئمنان.
2 تّر يي ئفقّيرن أد ݣين ؤنژيژن، ئمْوقّرن، رژّنن، أد ئصحو ليمان نّسن د تايري نّسن د صّبر نّسن.
3 تينيت يي تفقّيرين أت تݣّين أينّا ئسّرضون ربّي، ؤر سّاوالنت ݣ ميدّن س ݣار أوال، ؤر دا سّانت شّراب أر دوّخنت، ماشان أد سّقرانت ئسكّين نّا ئژيلن.
4 ئمشيد دّانت أد سنعتنت يي تيعيّالين تيمژيانين أد ئرينت ئرݣزن نّسنت أها ئرين ئشيرّان نّسنت،
5 رژّنت، زدّيݣنت، تنهلّانت مليح ݣ تخامين نّسنت، ژيلنت ݣ ؤمصاراف نّسنت، أر تضاعنت ئرݣزن نّسنت، حما أود يون ؤر ئترارا أوال ن ربّي د تاقبّاطّ.
6 وصّا ألّو ئعرّيمن أد ݣين ؤرژينّ.
7 شݣّين س-ئخف نّش، ئخصّا أد ئژيلنت لفعايل نّش ݣ مايد ئݣان شا، حما أد ݣين ميدّن أم شݣ، د ؤسقرا نّش أد ديكس ييلي لحيا د لمعقول.
8 ئخصّا أد ئصحو واوال نّش ؤر ديكس ئتّيلي لعيب، حما أد حشّمن ئنضليبن نّخ أها ؤر تّيغين أد ئنين أود يان واوال ن لعار غيفنخ.
9 وصّا ئسمغان أد ضاعن ئد بابين نّسن ݣ مايد ئݣان شا، ݣين-اسن لخاضر ݣ لخدمت نّسن، ؤر غيفسن تراران أوال،
10 أها ؤر تن تّاكرن، ماشان ئخصّا أد سباين ئس ديكسن شايݣان ن لامان دّيما، ئمشيد أس دّان أد سخيترن س ؤسقرا ن ربّي أمفوكّو نّخ ݣ مايد ئݣان شا.
11 يّيه، ئسضهر ربّي رّحمت نّس نّا ئݣان أغبالو ن ؤفوكّا يي ميدّن كول،
12 نّاخ ئسّقران أن نبضو د-ؤينّا ؤر ئحلين د شّهوات ن دّونييت، نݣ ؤرژينّ أها نݣ زݣ ميدّن منانين نّا ئتدّون ݣ-ؤبريد ن ربّي ݣ زّمان-اد.
13 أر نتعايان أسّ أمبارك نّا ئݣان رّجا نّخ، أد-ئضهير لعزّ ن سيدنا عيسى لمسيح، نّا ئݣان ربّي نّخ أخاتار د ؤمفوكّو نّخ.
14 ئوشا تودرت نّس غيفنخ، حما أد-اخ ئفوكّا زݣ دّنوب كول. ئسزديݣاخ، أها ئݣاخ زݣ ميدّن نّس نّا ئدّان أد ݣين لجهد نّسن حما أد ݣين لخير.
15 ئوا، سقرا ئسكّين-اد يي ئمومن، أت تن توصات أها أت تن تقژرد س تنباطّ ئشمّلن نّا غورش ئلّان أها ؤر ش-ئتحقّار أود يون.