ثابراتّ ن ـ ؤمازان بولوس ئي تيطوس
1
سلام
1 تابرات-اد زݣ بولوس، نّا ئݣان ئسمغ ن ربّي د-ؤمازان ن سيدنا عيسى لمسيح. هاتين تّوازنخد غر ميدّن نّا ئختار ربّي حما أد ئخاتر ليمان نّسن أها ييسين لحقّ نّا سن ئسنعاتن ميمشي أد دّون ݣ ؤبريد نّا ئتّيري ربّي.
2 ئمشيد أد غورسن ييلي رّجا ن تودرت ن وابدا. ربّي، نّا ؤر دا ئسحلّيلن أبدا، ئقاولت دات ن لبدو ن دّونييت.
3 داي لّيݣ تيوض لوقت نّا ئعيّن ربّي أمفوكّو نّخ، ئسضهرد أوال نّس نّا س يي ئكلّف أها يومّر أد-ئسّ برّحخ.
4 دا تّاريخ تابرات-اد يي تيطوس، نّا ئݣان أم ممّي أحقاقي ݣ ليمان نّا خ-ئسمون. دا تتّرخ يي ربّي، ئبّاتنخ د سيدنا عيسى لمسيح أمفوكّو نّخ أد-اك وشين رّحمت د لهنا.
أعيّن ن-ئخاتارن ن-ئݣراون ن-ئمومن
5 زريخك ݣ تݣزيرت ن كريت، حما أت تشمّلد لخدمت نّا نبدا أها تعيّند ئرݣزن ن غا ئݣين ئخاتارن ن-ئݣراون ن-ئمومن ݣ مايد ئݣان تامدينت أم ؤينّا ش وصّاخ.
6 أخاتار ن-ؤݣراو ن-ئمومن، ئخصّا ؤر غيفس ئتّيلي أود يان ؤلامّا، يووْل غاس يوت ن تمطّوطّ، د واراو نّس دا تّامن س لمسيح أها ؤر تّينين ميدّن غيفسن دا فسّدن ؤلا ؤر دا توقّارن أود يون.
7 ئدّخ أنمغور ن-ؤݣراو ن-ئمومن أيد ئكلّفن س-ئسكّين ن ربّي، خف ؤياد، ئخصّا ؤر غيفس ئتّيلي أود يان ؤلامّا، ؤلا ديكس لكيبر، ؤر دا س-ئتطيّار فيمرّا، ؤر دا ئسّا شّراب أر ئدوّخ، ؤلا أد ئݣ بويمنغان أها ؤر دا يورزّو رّبح ن لحرام أبدا.
8 ئخصّاس أد ئترحاب س-ئنبياون، أر ئتّيري أينّا ئژيلن، أد ئݣ ؤرژين، ئمنا، ئصفا، ييلي نبض يي ئخف نّس.
9 ئخصّا أد يامژ ݣ واوال ن لحقّ ئمشينّا س ئتّوسقرا، ئمشيد أد ييغي أد ئسزعم ميدّن س-ؤسقرا نّا ئصحان أها ئقژّر س لبيّينا وينّا ت-ئتضاضّان.
10 دا تّينيخ أياد، ئدّخ عدّان ئمعصان نّا ئتغرّان ميدّن س واوال ئخوان، لومنّا وينّا ئران أد ݣين دّرع يي ميدّن أد زيّن.
11 ئخصّا أد أسن تقّند ئقما، ئدّخ دا سّوفوغن شايݣان ن-ئخامن يي ؤبريد ن لحقّ س-ؤسّقرا ن-ئتس ن-ئسكّين نّا مي ؤر ئخصّا أد سّقران حما أد-أمژن رّبح ن لحرام.
12 هاتين ئسيول يون زݣ أيت تݣزيرت ن كريت، دا ت تحاسابن أم يون زݣ لانبيا نّسن، ئنّا:
«أيت كريت دّيما ݣان ئد بو ئحلّالن،
لوحوش ن لخلا،
دا تخمّامن غاس ݣ ؤتشي أها ݣين ئمعݣازن».
13 د واوال-اد ئصحا. أياد أخف، ئخصّا أت تن تقژّرت شايݣان، حما أد ئمنو ليمان نسن،
14 أها ئخصّاصن ؤر تخمّامن ݣ لقيسات تيقديمين ن ووداين د لوصيات ن ميدّن نّا ئفّغن أبريد ن لحقّ.
15 ئسكّين كول زدّيݣن غر ميدّن نّا ئسزديݣ مولانا، ماشان ؤر ئلّي شا ؤسكّين ئزدّيݣن يي وينّا ئخنونسن نّا ؤر دا تّامنين، ئدّخ ئخمّيمن نّسن د لعقول نّسن خنونسن.
16 ستيت، دا تّينين سّن ربّي، والاينّي س لفعايل نّسن دا سّضهارن ئس ؤر دا ئسّ تقرّان. هاتين ئشرّهتن ربّي، غْوغن أها ؤر دا تّيغين أد ݣين شا ؤسكّين ئژيلن.