ثابراتّ تيسّنات ن ـ ؤمازان بولوس ئي تيموثاووس
1
1 ثابراتّ أد زّيݣي، نكّين بولوس، ئݣان أمازان ن ـ سيدنا عيسى لماسيح ئمشينّا يرا ربّي. ئسثيي أد برّحخ س ـ ثودرث نّا يقّاول ئي وينّا زدينين د ـ سيدنا عيسى لماسيح.
2 ؤريخاشتّين أتيموثاوس أممّي أمعزيز: أديكّ ئݣ ربّي يبّاثنخ د ـ سيدنا عيسى لماسيح مولانا نّخ لباراكا ئوشاش رّحمث د ـ لهنا.
بولوس دا يتّحماد ئي ربّي خف تيموثاووس
3 دا تقرّاخ س ـ لفضل ئي ربّيa نّا دا تّعبادخ س ـ لخاضر ئهنّان ئمشينّا أر تݣّان ئمزوورا نو، أر شيد شتّيخ أبدا ݣ ـ ثژيلّا ئنو س ـ واسّ د ـ ييض.
4 دا دّشتّيخ ئمطّاون نش (لّيݣ نبضا)، ئنغيي ؤمارݣ نش ئريخ أش أنّايخ حما أد ئعمّر وول ئنو س ـ ؤفراح.
5 ئمشينّا دا دشتّيخ ليمان ن ـ سثيتّ نّا ديكّ ئلّان، نّا يكّان أبعدا ݣ ـ نانّا نش لوئيس د ـ مايش أفنيكي، أها ؤر غوري يلّي شّكّ ئس ديكّ ئلّا أود شݣين.
6 أياد أخف داش سّكثايخ أتّعاودّ أتسنهيرّيد ثوكّي نّا ديكّ ئݣا ربّي لّيݣ غيفش سيرسخ ئفاسّن ئنوb،
7 ئدّخ ربّي ؤراخ ئوشي رّوح نّاس نتݣّا ئمدّولّا، مشان رّوح نّاس غورخ تّيلي ثيغيتّ د ـ ثايري د ـ رّژانث.
8 ئوا أد ؤر تكروكور أتّݣد ئنيݣي ن ـ مولانا نّخ، ؤلا ثكروكرد أتّينيد ئس ئي ثسّند نكّين ئݣان أحبّاس خف لخدمث نس، مشان أمّو أݣيدي ݣ ـ ثامارا خف لينجيل س ـ ثيغيتّ نّا داش ياكّا ربّي.
9 هاثين ئفوكّاياخ أها يغراخ أنݣ وينس،
ؤر ئد س ـ لفضل ن ـ لافعايل نّخ نّا يژيلن،
مشان خف لحساب ن ـ ؤينّا خف ئعوّل نتّا أثيݣ.
ئسول ربّي ؤر ئخليق دّونيث،
ئعوّل أداخ ئوش رّحمث نس
د ـ نوكني نزدي د ـ سيدنا عيسى لماسيح.
10 أها يسنعثاخ دغي رّحمث أد
لّيݣ دّيضهر ؤمفكّو نّخ سيدنا عيسى لماسيح،
نّا يكّسن ثانباطّ ئي لموث
أها يسّيدّا خف ثودرث ن ـ وابدا س ـ لينجيل،
11 نّا مي تّوسثيخ أداس ݣخ أبرّاح ݣخاس أمازان د ـ أسّلماد.
12 أياد نّيث أخف دا غيفي يتّكّا أود ؤياد، مشان ؤر كروكيرخ ئدّخ سّنخ مايد ئمس ؤنّا س ـ ؤمنخ، ئسينخ ئس ؤر ديكس شّكّ ئغي أد ئحضو أينّا خف ئي يسّيمن أرد ياوض واسّ نّا (ݣ ـ ديتّاغول لماسيح).
13 ݣ ـ منيداش ئواليون ئصحان نّا مي ثسلّاد زّيݣي، تّفارتن س ـ ليمان د ـ ثايري ئدّخ ثزديد د ـ سيدنا عيسى لماسيح.
14 حضو لامانا ئژيلن نّا خف ثتّوسّيمند س ـ رّوح ن ـ ربّي نّا يزدغن ديݣنخ.
أيّوز ئي ݣماثنخ أونيسيفوروس
15 هان شݣّ ثسّند ئد ئمومنّ كولّ نّا لّانين ݣ ـ ثمازيرث ن ـ أسيا فّغن ضاري، زّيكسن فيجالّوس د ـ هارموجانيس.
16 أدّ ئسوݣز مولانا رّحمث خف أيث ؤخام ن ـ أونيسيفوروس، ئدّخ مشثا ن ـ ثيلمرّات أيد أر ئي ئسفجّاج أها ؤر ثيسّحشيم لحبس نّاݣ لّيخ،
17 مشان لّيݣ دّييوض غر ثمدينث ن ـ روما، ئرزايي ئݣ ثامسّومانث ألّيݣ ئي يوفا.
18 أداس ئݣ مولانا رّحمث زݣ غورس ݣ ـ واسّ نّا ݣ ـ دّياغول.c أها مشثا أيد أر ئسعاوان ݣ ـ ثمدينث ن ـ أفاسوس د ـ شݣ س ـ ئخف نش ثلّيد ثسّند أياد.