6
1 كولّ وينّا ݣانين ئسمغان ئلين دّاو ن ـ ؤحالّاس ئخصّاياسن أد حاسبن ئيد بابين نسن واثان أوقّر ݣ ـ مايد ئݣان شا، حما أود يوك ؤر ئتّيني أوال ن ـ لوكوفر خف ييسم ن ـ ربّي د ـ ؤسّلمد نّخ.
2 د ـ وينّا غر لّان ئيد بابين نسن ݣانين ئمومنّ، ئخصّاياسن أد ؤر ثن تحقّارن غاس ئدّخ ݣان أيثماتسن، مشان أداسن خدّمن ؤݣار ئدّخ ئد بابين نسن نّا دا سّنفاعن س ـ لخدمث نسن ئمومنّ أيد ݣان ݣين ئمعزيزن. ئسكّين أد أغاسن ثسّلمدّ ثينيداسن أد ئسّن تݣّان.
أسّلمد ن ـ ثحلّال د ـ ؤطرّح أرسلي
3 داي مش ئلّا ؤنّا دا يسّلمادن شان ؤسّلمد ضنين نّا ؤر دا يتّمساسا د ـ ئواليون ئصحان ن ـ سيدنا عيسى لماسيح د ـ ؤسّلمد نّا داخ ئسنعاثن أنيدير ثودرث نّا خف ئرضا ربّي،
4 هاثين ئطّوفّي س ـ ثيخيثرث، ؤر ئفري شا. ئكشمث شا س ـ ئمغانّاثن د ـ ئمّنزاغن خف ئواليون دا ديتّادجّن غاس لحسد د ـ ئمنغان د ـ ميوݣّا ن ـ ئزوارن د ـ ݣار نّيث.
5 أياد دا ديتّادجان ئمراراثن ن ـ واوال ؤر ئلين لحدّ ئنݣر ن ـ ميدن نّامي خسرن وانّليثن أها أغولن ؤر غورسن ئقّيمي لحقّ، غالن ئد أتّيديرث ثودرث نّا خف ئرضا ربّي ثݣا شان ثاسبّابث ݣ ـ أسن ئلّا لفضل.
6 مشان أنيدير ثودرث نّاخف ئرضا ربّي ݣ ـ ئلّا ؤعناق هاثين لفضل أخاثار أيد ئݣا،
7 ئدّخ ؤر دّنيوي شا أݣيدنخ غر دّونيث، ؤلا ندّا أنيغي أناوي أݣيدنخ شا أدّاي تنفّغ.
8 داي مش غورخ ئلّا ووتّشي ييلي غورخ ؤعبان، ئخصّا أنعنق.
9 ئد وينّا رانين أد طرّحن، دا تّوجرّابن أها أتّوينن ݣ ـ ثسرافث د ـ شيݣان ن ـ شّهواث ثيحياض دا ضّارّانين، نّا دا يتّاوين ميدّن س ـ أرواس د ـ ثخلي،
10 ئدّخ ثايري ن ـ لفلوس أزݣ دا ديتكّا مايد ݣان أينّا يخّان. نّا خف مّوثن ييتس ن ـ ميدّن أها فّغن ضارث ن ـ ليمان، أدّجيند مشرضول أخاثار ئي يخفاون نسن.
ئمنغي ن ـ ليمان نّا يژيلن
11 ئد شݣّين أتيموثاوس، أيارݣاز ن ـ ربّي، تكّا س ـ تّيساع ئي وياد كولّ، أر تّثفارد س ـ وول نش أينّا يمنان أر تݣّاد أينا خف ئرضا ربّي، ييلي ديكّ ليمان د ـ ثايري أها ثدعند ئي مايد ئݣان شا ثاضفودّ د ـ ميدّن.
12 نّاغ ئمنغي نّا يژيلن ئݣان وين ليمان، ثامژد ݣ ـ ثودرث ن ـ وابدا نّا غر أش ئغرا ربّي، د ـ شݣين ثقرّاد أقرّا يژيلن ن ـ ليمان نش داث ن ـ شيݣان ن ـ ئنيݣان.
13 قدّمخاشنّ ربّي نّا دا ياكّان ثودرث د ـ سيدنا عيسى لماسيح نّا يݣان ئنيݣي داث ن ـ بيلاطوس لبونطي لّيݣ ئقرّا س ـ ؤقرّا يژيلن ن ـ ليمان،
14 أتّحضود لوصيث أد س ـ وار لعيب ؤلا ألامّا أر أس نّاݣ دّيتّضهير مولانا نّخ سيدنا عيسى لماسيح.
15 ئدّا أدّ ييضهير ݣ ـ لوقث نّا يزمّم ربّي،
يݣان أنبارش ئݣ أنبّاض أفرضي،
أݣلّيد ن ـ ئݣلّيدن د ـ مولانا ن ـ ئد مولانا،
16 نتا ئويل نس أيد ؤر دا يتّمثاثن،
ئزدغ ݣ ـ ؤسيدّ نّا غر ؤر ئتّيغي أود يوكّ أد ئحادا،
ونّا ؤر يانّاي أود يان بنادم أها ؤر ئتّيغي أثيانّاي،
أداس ييلي لعزّ د ـ ثيغيتّ ن ـ وابدا.
أمين.
17 نهو وينّا طرّحنين ݣ ـ دّونيث أد أد ؤر ديكسن تّيلي ثيخيثرث، ؤلا ݣان رّجا نسن ݣ ـ ؤطرّح ݣ ـ ؤر ئلّي لامين، مشان أد ݣين رّجا نسن ݣ ـ ربّي نّا داخ ياكّان مايد ئݣان شا س ـ شيݣان أد ئسّ نبرّع.
18 ئخصّاياسن أد ݣين أينّا يژيلن، ݣين ئمطرّحن ݣ ـ لفعايل نّا يژيلن، سخون ݣ ـ ثوكّي، وجدن أد بضون أينّا غورسن د ـ ويّاض.
19 أياد أس غا فّرن ئي يخفاون نسن يان لكنز غاسن ئݣين لساس ئصحان ئي ثين واغلّايين. س ـ ؤياد أد أمژن ثودرث ثارصليث.
20 أتيموثاوس، حضو لامانا نّا خف ثتّوسّيمند، ئكّ س ـ تّيساع ئي ئواليون يوران ؤر ئمساسان د ـ ليمان، ثكّد س ـ تّيساع ئي يمغانّاثن ن ـ ثوسنا ن ـ ثحلّال
21 نّا خف أر تّينين ييتس هاثين ثلّا غورسن أها فّغن ضارث ن ـ ليمان. أداش ئوش ربّي رّحمث.