5
ئوصّاثن ن ـ بولوس خف ثينّا مي مّوثن ئرݣزن د ـ ئخاثار د ـ ئسمغان
1 أد ؤر تفقّاع س ـ واوال ئقسحن خف ئرݣزن ئخاثارن، مشان مساوال أݣيدسن س ـ تّاويل أمّي دا ثساوالد ئي يبّاش، ثݣد ئمژّيانّ د ـ أمّ أيثماش،
2 د ـ ثوثمين ثيخاثارين أم مايش، د ـ ثمژّيانين أم ئسثماش س ـ ثونݣيمث ئزدّيݣن ݣ ـ ؤر ئلّي لعيب.
3 ݣاث لخير ئي ثينّا مي مّوثن ئرݣزن، ثينّا سخصّانين سثيتّ أها ؤر غورسنث مايد ثنث ئسعاوانن.
4 ئد ثنّا غر لّان وارو نس نغد أراو ن ـ واراو نس، هاثين نثني أمي يخصّا أد لمدن بعدا أد ئديرن يوث ن ـ ثودرث نّاخف ئرضا ربّي أدّاي دا توقّارن أيث ؤخام نسن، أها راريناسن ئي لوالدين نسن شا زݣ ؤينّاسن ݣان. س ـ ؤياد أس غيفسن ئتّرضو ربّي.
5 ثنّا مي يمّوث ؤرݣاز أها ثيلي سثيتّ ئويل نس دا تݣّا رّجا نس ݣ ـ ربّي، أها ؤر دا ثبطّو د ـ ثوثرا ئي ربّي د ـ ثژالّيتّ س ـ واسّ د ـ ييض.
6 ئد ثنّا يبرّعن ئخف نس ݣ ـ ؤينّا ثرا، هاثين ثݣا أمّي ثمّوث مغار ثدّر.
7 وصّا س ـ ؤياد حما أد ؤر ئتّيلي خف ئمومنّ أود يان ؤلامّا.
8 مشان ؤنّا ؤر دا تّيتّاوين ݣ ـ لاهل نس، لومعنّا أيث ؤخام نس، هاثين ئناشر ليمان نس أها ياݣر ؤنّا ؤر ئݣين أمومن.
9 حما أد تّوحاسب ثنّا مي يمّوث ؤرݣاز ݣ ـ ثينّا دا تّامژنين لمعاوانا، ئخصّا أد غورس ثيلي ؤݣار ن ـ ستّين ن ـ ؤسݣّاس، ثيلي ثكّا ثيول غاس يان ؤرݣاز،
10 أها ثتّييسّن س ـ ؤينّا يژيلن نّا ثݣا كولّ: أتّيلي ثسّݣما أراو نس أسّݣمي ئژيلن، ثرحب ئي ينبݣاون، ثسّيريد ئضارّ ئي وينّا دا تّݣنين لخدمث ن ـ ربّيa، أها ثسعاون وينّا خف يوسّا لحال، أتّيلي ثݣا ئخف نس ݣ ـ ؤينّا يژيلن كولّ.
11 ئد ثينّا مي مّوثن ئرݣزن نّا سولنين مژّينث أد ؤر ثنث تّحاساب زّيكسنث، ئدّخ أدّاي ثنث ئكشم باضاض ؤر دا سّادّانث لماسيح، ئرينث أد أولنث،
12 ئدّا ربّي أثنث ئحاسب خف ؤياد ئدّخ زرينث لقيوال نسنث أمزوارو.
13 أر تّلمادنث ألثو أد ݣينث ثيمعݣازين، أر سّارانث زݣ ثادّارث غر ثادّارث. ؤر ئد غاس ݣانث ثيمعݣازين مشان دا ساوالنث أود ݣ ـ ميدّن، أر كتّشمنث أينّا سنث ئبعدن، أر تّينينث ئواليون نّا ؤر ئلاقن.
14 أينّا خف مي دا تّينيخ يوف أد أولنث ثينّا مژّينين، أرونث أراو نسنث قّابلنث ثيخامين نسنث، حما أد ؤر دتّادّجانث ماخف أخ ئتّݣ ؤنضليب أزوار.
15 ئدّخ دّانث ييتسث فّغنث ياد أبريد ن ـ ربّي أها ثفارنث شّيطان.
16 ثامومنث نّا غر لّانث ݣ ـ لاهل نسن شان ثينّا مي مّوثن ئرݣزن، ئخصّاياص أثنث سعاون ؤر ثژّيژي خف ؤݣراو ن ـ ئمومنّ، حما أد ييغي ديخ نتّا أد ئسعاون ثينّا مي مّوثن ئرݣزن، ثينّا سخصّانين سثيتّ أها ؤر غورسنث ماي ثنث ئسعاوانن.
17 ئد ئخاثارن ن ـ ؤݣراو ݣانين ثامسّومانث ݣ ـ لخدمث نسن، واثان أديكسن ثطهلّام خف سينّ ن ـ ييلان، لومعنّا وينّا دا كّاثنين ثامارا ݣ ـ ؤبرّح د ـ ؤسّلمد ن ـ واوال ن ـ ربّي،
18 ئدّخ لشثاب ن ـ ربّي دا يتّيني: "أد ؤر تݣّ أسݣرسb ئي وزّݣر نّا دا يسرواثن" أر ئتّيني ديخ: "أخدّام ئواثا ثيغراض نس."
19 مش ئلّا مايد ئشثوان خف شان ؤخاثار ن ـ ؤݣراو، أد ؤر تّقبال دّعوث نس مش ؤر لّين سينّ ن ـ ئنيݣان نغد شراض.
20 وينّا دا تݣّانين لمعصيث ثفقعد غيفسن داث ن ـ ئمومنّ كولّ حما أد ݣدن وييّاض.
21 قدّمخاشنّ ربّي د ـ سيدنا عيسى لماسيح د ـ لمالايكاث نّا يسثي ربّي أتّحضود أياد نّاش نّيخ بلا أتّݣد زݣ شان ثمناط، ؤلا ثݣيد شا س ـ ثودماوين.
22 أد ؤر تزريب أتّسرسد ئفاسّن نش خف أود يوكّ (أداس ثتّرد ئي ربّي أد ديكس ئݣ لباراكا ݣ ـ لخدمث نّا خف ئتّوسثي)، د ـ أد ؤر تّامّو ݣ ـ لمعصيّاث ن ـ وييّاض. أدّج ئخف نش ثزدّيݣد.
23 باراكا ثسّاد غاس أمان، سّا شوي ن ـ وامان ن ـ واضيل ئي لمعدا نش د ـ ييغنشاثن نّا دا غيفش ديتّكرن.