4
ئسّلمادن ن ـ ثحلّال
1 رّوح ن ـ ربّي دا يتّيني أينّا يلّان: ݣ ـ ووسّان ئنݣورا، دّان ييتس أد فّغن ضارث ن ـ ليمان س ـ لماسيح، أوينتّ ݣ ـ لارواح دا يتّغوون د ـ ݣ ـ ئسّلميدن ن ـ شّاياطين.
2 أدّجين ئخفاون نسن أثن غرّان أيث سين ن ـ وودماون نّا دا سحيلّيلنين، نّامي مّوثن ييمان أمي ثن قّدن س ـ ووزّال،
3 نّا ؤر ؤدّجينين ميدّن أد تّاولن، أها أر ثن تّنهارن زݣ ييتس ن ـ ووتّشيثن. مشان ربّي ئخلق ؤتّشيثن أد أثن تتّان وينّا ؤمنّين نّا سّنّين لحقّ أها أر غيفسن تّحمادن ربّي.
4 ئدّخ أينّا يخلق ربي كولّ ئژيل، ؤر نتّيني ئهي خف أود ئميقّ، مشان أثنامژ نحمد غيفس ربّي،
5 ئدّخ دا يتّزديݣ س ـ واوال نس د ـ ثژالّيت.
بولوس دا يتوصّا تيموثاوس
6 مش ثودّجيد أيثماش د ـ ئسثماش ئمومنّ أد رارين ثاغضفث ئي وياد، أتّݣد أمزيلّز ئژيلن ئي سيدنا عيسى لماسيح، د ـ شݣين ثݣميد خف واوال ن ـ ليمان د ـ ؤلمّود ئژيلن نّا تّفارد.
7 ئد لقيساث ثيحياض ن ـ ثمغارين ؤر ئمساسان د ـ ليمان حيداسنث، ثدرّبد ئخف نش أتّيديرد يوث ن ـ ثودرث نّا خف ئرضا ربّي،
8 ئدّخ رّياضا ن ـ صّاحث نّفع نس ئدروس، ئد مش دا تّيديرد ثودرث نّا خف ئرضا ربّي ديكس نّفع ئي مايد ئݣان شا. هاثين ئقّاول ئسّ ربّي ثودرث ن ـ دغي د ـ ثنّا غا ديدّون.
9 أوال أد ئݣا لحقّ أها يخصّا أثيقبل كّو يوكّ.
10 هاثين دا نخدّم أر نكّاث ثامارا ئدّخ نݣا رّجا نّخ ݣ ـ ربّي نّا يدّرن ئݣان أمفوكّو ن ـ ميدّن كولّ، لومعنّا وينّا ييسّ ؤمنّين.
11 وصّا س ـ ئسكّين أها ثسلمدتّن.
12 أد ؤر تّادجا أود يوك أش ئحقّر ئدّخ ثمژّيد، ݣ ـ أرݣاز نّا تّثفارن ئمومنّ: ݣ ـ واوال، د ـ لفعايل، د ـ ثايري، د ـ ليمان د ـ ثودرث ئزدّيݣن.
13 سيا غر نتدّوخ أد ؤر بطّو د ـ ثغري ن ـ واوال ن ـ ربّي ئي ؤݣراو ن ـ ئمومنّ أر ثن تنبّاهد، أر ثن تسّلمادّ.
14 أد ؤر تفرّاض ݣ ـ ثوكّي نّا غورش ئلّان، نّاش ئتّوشان لّيݣ غيفش سيولن ئمومنّ س ـ ؤينّاسن ئسنعث ربّي، أها سرسن غيفش ئخاثارّ ن ـ ؤݣراو ئفاسّن نسن (أداش دعون س ـ لباراكا).
15 أويتّ ݣ ـ ؤياد نّاش نّيخ، ثݣد ديكس ئخف نش، حما أد أنّاين كولّ نسن ئس دا تّزايادّ غر داث.
16 رار لبال ئي ئخف نش د ـ ئي وسّلمد نّش أها ثسدامد أياد، ئدّخ مش ثݣيد أياد ثدّيد أتّفوكّود ئخف نش ثفوكّاد وينّا دا غورش سّغادنين أود نثني.