3
ئخاثارن ن ـ ؤݣراو ن ـ ئمومنّ
1 هاياون أوال ئݣان سثيتّ: "ؤنّا دا ينژّغن س ـ وول نس أد ئݣ أنمغور ن ـ ؤݣراو ن ـ ئمومنّ، هاثين لخدمث ئژيلن أيد ئرا."
2 أينّا خف مي أنمغور ن ـ ؤݣراو ئخصّا أد ؤر غيفس ئتّيلي أود يان ؤلامّا، أد غورس ثيلي غاس يوث ن ـ ثمطّوط، ييلي ݣ ـ ئخف نس، ئݣ أرݣاز ئرژّنن، ييلي ديكس لوقر، أر ئتّرحاب ئي ئنبݣاون أها ييسين أد ئسّلمد أوال ن ـ ربّي،
3 أد ؤر ئتݣّا بو شّراب، ؤلا أس حمان ئدامّن، مشان أداس ئوسيع لخاضر، ؤر ئتݣّا بو يمنغان ؤلا ونّا ئتّمثاثن خف لفلوس.
4 ئخصّا أد ييغي أد ئقّابل ثخامث نس مزيان أها ئلين واراو نس دا تّضاعن ثانباطّ نس أر ثتوقّارن.
5 ئي ؤنّا ؤر ئسّينن أد ئقّابل ثخامث نس، ئد أد ييغي أد ئتنهلّا ݣ ـ ؤݣراو ن ـ ئمومنّ ن ـ ربّي؟
6 ئخصّا أد ؤر ئتّيلي بحرا أيد يومن س ـ لماسيح حما أد ؤر ئتطّفّوي س ـ ثيخيثرث (خف لخدمث أد) أها ياغث ؤينّاس ئعاقب ربّي شّيطان.
7 ئخصّاياس ألثو أداس ييژيل وادّور ئنݣر ن ـ وينّا ؤر ݣينين ئمومنّ حما أد ؤر ديتّرارا أوال خف ئخف نس أها ياغنّ ثاسرافث نّاس ئغزا شّيطان.
ئنبدادن ن ـ ؤݣراو ن ـ ئمومنّ
8 ئنبدادن ن ـ ؤݣراو ن ـ ئمومنّ أود نثني أمّ ئخاثارن نس، ئخصّا أد ئلين ميدّن دا ثن توقّارن، ݣين لمعقول، ؤر ݣين أيث شّراب، ؤلا دا تضميعن أدّ رارين لفلوس س ـ لغشّ.
9 ئخصّاياسن أد أمژن ݣ ـ سّرّ نّاسن ئسنعث ربّي خف ليمان س ـ لخاضر ئهنّان.
10 أها يخصّا ألثو أد توستّسان بعدا، داي مش ؤر ئلّي ما خف تّولامّان ثݣيمثن د ـ ئنبدادن.
11 أود ثيوثمين ن ـ ئنبدادن (نغد: ثيوثمين ݣانين ثينبدادين) ئخصّا أد ئلين ميدّن دا ثنث توقّارنث، ؤر دا ساوالنث س ـ لعيب خف وييّاض، ئلينث ݣ ـ ئخفاون نسنث، ييلي ديكسنث لامين ݣ ـ مايد ئݣان شا.
12 ئنبدادن ئخصّا أد غورسن ثيلي غاس يوث ن ـ ثمطّوط، قّابلن أراو نس د ـ ثخامين نسن مزيان،
13 ئدّخ ئنبدادن نّا عدلنين ئي لخدمث نسن، دّان أداسن ييژيل وادّور أها ثيلي غورسن زّعامث ݣ ـ ليمان نسن س ـ سيدنا عيسى لماسيح.
سرّ أخاثار ن ـ ليمان نّخ
14 دا شنّ تّاريخ ئسكّين أد د ـ نكّين نّورزخ أنّدّوخ غورش دغيا.
15 أود مش عطّرخ، أتّافد أتّيسند ميمش ئخصّا ئي ميدّن أد ݣين ݣ ـ أيث ؤخام ن ـ ربّي، ئݣان أݣراو ن ـ ئمومنّ ن ـ ربّي يدّرن، أݣراو أد أيد ئݣان ثارسلث د ـ لّساس ن ـ لحقّ.
16 د ـ واوال أقورار ݣ ـ ؤر ئلّي شّكّ، هاثين ئمقّور شيݣان سّرّ نّاخ ئسنعث ربّي خف ميمش نتّيدير ثودرث نّا خف ئتّرضو:
ئضهرد ݣ ـ صّاحث ن ـ بنادم،
د ـ رّوح ن ـ ربّي ئصّوحاياخ ئس ئمنا،
أنّاينتّ لمالايكاث،
ئتّوبرّح ئسّ ئنݣر ن ـ لݣنوس ضنين ؤر ݣينين ؤداين،
ؤمنن ئيسّ ميدّن ݣ ـ مايد ئݣان أنسا ݣ ـ دّونيث،
ئتّواسي سافلّا غر أر أنسا ن ـ لعزّ.