2
أعسكري ن ـ سيدنا عيسى لماسيح ݣ ـ ئلّا لامين
1 ئد شݣين أتيموثاوس أممّي، زايد صّحو ليمان نش س ـ رّحمث نّا داخ ياكّا ربّي د ـ نوكني نزدي د ـ سيدنا عيسى لماسيح.
2 د ـ ئواليون نّامي ثسلّاد زّيݣي داث ن ـ شيݣان ن ـ ئنيݣان، سّيمن غيفسن ئرݣزن ݣ ـ ئلّا لامين غينين أود نثني أد سّلمدن وييّاض.
3 أمّو أود شݣين ݣ ـ ثماريوين أمّ ؤعسكري يژيلن ن ـ سيدنا عيسى لماسيح.
4 أعسكري أدّاي دا يتّݣّ لخدمث نس أد ؤر يسطّواعار ئخف نس ݣ ـ ئسكّين ن ـ كّوياسّ مش ئرا أد ياوي رّضا ن ـ ؤنّا ثيسݣاجان.
5 أود ݣ ـ ؤمنّزاغ ن ـ رّياضا، ؤر دا يتّاوي ؤنّا يرّان ثاسمغورث مش ؤر ئرّي س ـ لقانون.
6 أمكراز نّا دا يكّاثن ثامارا ئخصّا أد ياوي أمور أمزوارو زݣ لغلّث.
7 خمّم ݣ ـ ؤينّا دا تّينيخ، د ـ مولانا ئدّا أداش ئوش لفهم ݣ ـ مايد ئݣان شا.
8 أد ؤر تتّو سيدنا عيسى لماسيح نّا ديسكّر ربّي زݣ ئمتّين، ئݣان زݣ ييرو ن ـ داوود ئمشينّا دا يتّيني لينجيل نّاس دا تبرّاحخ،
9 أر غيفس تّوكرفاصخ أها تّوݣرينثي أود ثيفرين أمّ ؤنّا يجّران شا. مشان أوال ن ـ ربّي ؤر داس تّوݣرانث ثيفرين.
10 ئوا هايي دعنخ ئي مايد ئݣان شا خف وينّا يسثي ربّي، حما أد أمژن أود نثني أفوكّا د ـ لعزّ ن ـ وابدا نّا دا ياكّا سيدنا عيسى لماسيح ئي وينّا زدينين أݣيدس.
11 ئدّخ أوال أد ئݣا سثيتّ:
مش نكّا نمّوث أݣيدس،
هاثين ندّا أود أنيدير أݣيدس.
12 مش ندعن،
هاثين ندّا أننبض أݣيدس.
مش ئي ثنّاشر،
ئدّا أود نتّا أداخ ئناشر.
13 مش نݣا وينّا ݣ ـ ؤر ئلّي لامين،
نتّا دا يتّغيما ديكس لامين
ئدّخ ؤر ئتّيغي أد ئناشر ئخف نس.
أخدّام نّا خف ئرضا ربّي
14 سّكثاياسن ئي ئمومنّ ئسكّين أد كولّ، ثنهوتّن داث ن ـ ربّي أد ؤر تّناغن خف ئواليون. أياد ؤر ئنفيع ئي شا، غاس دا خلّون وينّا دا غورسن سّغادنين.
15 ݣ ـ ثامسّومانث أتّسنعدّ ئي ربّي ئس ثواثاد رّضا نّا غيفش ئرضا، ئݣ أخدّام نّا ؤر دا ثسّحشام لخدمث نس، دا يسّفرون أوال ن ـ لحقّ أسّفرو يصحان.
16 ئد ئواليون يوران ؤر ئمساسان د ـ ليمان كّاسن س ـ تّيساع، ئدّخ وينّا ثن ثفارنين دا تّفّغن أبريد ن ـ ربّي ؤݣار.
17 د ـ ئواليون نسن دا تّساقّان أمّ ؤسرو دا يتتّان صّاحث، زّيكسن هيمينايوس د ـ فيليتّوس،
18 نّا ؤنفنين ئي ؤبريد ن ـ لحقّ، أر تّينين: «هان ثانشرا ن ـ ئمتّين ثجرا ياد» أها برّمن شان ييتس زݣ ليمان.
19 مشان لساس ئصحان نّا يݣا ربّي ئزݣّا، ثتّونقّش غيفس ثماثارث أد: «مولانا يسّن وينّا ݣانين وينس» د ـ : «كولّ ؤنّا دا يتّعبادن مولانا أد ئكّ س ـ تّيساع ئي ؤينّا ؤر ئحلين».
20 هاثين ݣ ـ ؤخام أخاثار ؤر دا نتّافا غاس ئفشكا ن ـ وورغ نغد وين نّقّرث نّا دا يتّوسّخدامن غاس ݣ ـ واسّ ن ـ لعزّ، مشان دا نتّافا أود وين ؤكشّيض د ـ وين ئثقّي ݣانين غاس وين ؤكّرفص.
21 ئوا ؤنّا يسّيزديݣن ئخف نس زݣ ئسكّين أد كولّ ؤر حلينين، ئدّا أد ئݣ أمّ ؤفشكو ن ـ واسّ ن لعزّ، ئتّوسثين ئي ربّي، ئلاقن ئي باب نس، ئوجدن ئي مايد ئݣان لخدمث ئژيلن.
22 ئد شّهواث ن ـ ثمژي رول زّيكسنث، تّفارد أينّا يمنان د ـ ليمان د ـ ثايري د ـ لهنا، شݣّين د ـ وينّا دا قّارنين ئي مولانا س ـ وول أزدّاي.
23 د ـ ئمغانّاثن ئحياض ؤر ئبونان تّانفاسن، د ـ شݣ ثسّند ئس دا دتّادجّان ئمنغان.
24 هان ئسمغ ن ـ مولانا ؤراس ئخصّا أد ئتّناغ، مشان أد ئساعف ميدّن كولّ، ييسين أد ئسّلمد، ئݣ أمصّبر،
25 ئسربّا غاس س ـ تّاويل وينّا دا ثتّنالانين، بار أد ديكسن ئخدم ربّي أد ثوبن حما أد ئسينن لحقّ،
26 بار أدّ أغولن ئخفاون نسن أها فوكّان زݣ ثژقّورث ن ـ ئبليس نّاس ئي ثنيومژ حما أد ئلين دّاو ن ـ ثنباط نس.a