3
ثوخّيث ن ـ ووسّانّ ئنݣّورا
1 هاثين ئخصّاياش ألثو أتّيسند أياد، ئد ݣ ـ ووسّانّ ئنݣّورا دّانث أدّ دّونث ييتسث ن ـ لاوقّاث ئوعرن،
2 ئدّخ دّان ميدّن أد تّيرين غاس ئخفاون نسن، أر تّمثاثن خف لفلوس، أر تعنّان س ـ ئخفاون نسن، ثيلي ديكسن ثيخيثيرث، أر ساوالن س ـ لكوفر، ؤر تّضاعن لوالدين نسن، ؤر تقّران س ـ ؤجميل، ؤر تتّاوين ݣ ـ ربّي.
3 ؤر دّين أديكسن ثيلي ثاسا، ؤر تّسماحن ئي وييّاض، أد ساوالن س ـ لعيب خف ميدّن، ؤر تّباضن ݣ ـ ئخفاون نسن، دّان أد خّون، أها ؤر تّيحميلن أينّا يژيلن.
4 دّان أد ݣين ئغضّارن، أد تّزريبن ݣ ـ مايد ئݣان شا، طّوفّين ݣ ئخفاون نسن، أر تّيرين شّهواث ن ـ دّونيث ؤݣار ن ـ ربّي،
5 دّان أد تّبايانن ئي ميدّن أمّي دا تّيديرن ثودرث نّا خف ئرضا ربّي، ئميل ؤر دا تقرّان س ـ ؤينّامي يغي ليمان. أمّ ويد كّاسن س ـ تّيساع.
6 ويد لّان ديكسن ئرݣزن نّا دا كتّشمين ثادّروين س ـ شان ثسعديرث أر تتّان أنّلي ئي ثوثمين ؤر ئغين ئي شا، ثينّا ژّيژينث لمعصيّاث أر ثنث حرّينث مايد ئݣان شّهواث.
7 ديما دا تݣّانث ثامسّومانث أد لمدنث، أها ؤر سار غينث أد أوضنث ثوسنا ن ـ لحقّ.
8 داي ييمشينّا ئكّر يانّيس د ـ يامبريس (ݣانين ئسحّارن ن ـ فرعون) أر تّنالان سيدنا موسى مشثيد أياد، ئرݣزن أد أود نثني دا تّنالان لحقّ. أنّليثن نسن فرغن، د ـ ليمان نسن ؤر ئواثا شا.
9 مشان ؤر دا تّزايادن غر داث ئدّخ ثدّا ثيحيطّ نسن أتّيضهير ئي ميدّن كولّ ئمشينّا ثضهر أود ثين يانّيس د ـ يامبريس.
لوصياث ن ـ بولوس ئي تيموثاووس
10 ئد شݣين أتيموثاووس هاثين ثحسيد أسّلمد ئنو، ميمش ثݣا ثودرث ئنو، د ـ مايد ريخ أد ݣخ، د ـ ليمان ئنو، د ـ صّبر ئنو، د ـ ثايري نو، د ـ ؤينّامي دعنخ،
11 ثحسود ئكّرفيصن د ـ ثيماريوين نّا غيفي يكّان ݣ ـ ثمدينث ن ـ أنطاكيا د ـ أيقونيا د ـ ليسترا. شيݣان ن ـ ئكّرفيصن أمي دعنخ! مشان مولانا ئفوكّايي زّيكسن كولّ.
12 هاثين كولّ وينّا زدينين د ـ سيدنا عيسى لماسيح ئرين أد ئديرن ثودرث نّا خف ئرضا ربّي ئقّنثنين أد تّوكرفصن.
13 مشان ميدّن نّا خّانين ݣانين ئغشّاشن دّان أد تّزايادن غاس ݣ ـ ثيخّوتّ، أد سّيشكان وييّاض أر ثنسّيشكان وييّاض.
14 ئد شݣّين أمژ ݣ ـ ؤينّا ثلمدّ أها ثامند نّيث ئس ئݣا سثيتّ، د ـ شݣّين ثسّند وينّاش سّلمدنين.
15 د ـ زݣّوس ثمژّيد أي ثسّند أرّاثن ن ـ ربّي (تّوراث د ـ ژّابور) ئزدّيݣن، يغين أداش ئوش ثانژّي نّا دا ئتّاوين غر أفوكّا س ـ ليمان س ـ سيدنا عيسى لماسيح.
16 أرّا ن ـ ربّي س ماس ئلّا ئكّاد زݣ رّوح ن ـ ربّي، ئلّا ديكس نّفع: داخ ئسّلماد أر غيفنخ ئتفقّاع خف ؤينّا ݣ ـ نخضا، أراخ ئسربّا أر زّيكس نتّلماد أندّو ݣ ـ ؤبريد ئمنان،
17 حما كولّ ؤنّا يݣان وين ـ ربّي أد ييلي يغي أها يوجد ئي مايد ئݣان لخدمث ئژيلن.