4
بولوس دا يتتّر زݣ تيموثاوس أد ئݣ لخدمث نس س ـ وول نس
1 ئوا قدّمخاشنّ ربّي د ـ مولانا نّخ سيدنا عيسى لماسيح، نّا غا يحاسبن وينّا دّرنين د ـ وينّا مّوثنين ݣ ـ واسّ نّاݣ ديتّيضهير أد ئنبض ݣ ـ ثݣلديتّ نس،
2 برّح س ـ واوال ن ـ ربّي، ثيليد ثوجدّ ئي ؤياد داكّ مايد ئݣا لحال. لامّا، فقّع، ثسزّعيمد س ـ مايد ئݣان صّبر د ـ ؤسّلمد.
3 ئدّخ ثدّا أدّ ثدّو يوث ن ـ لوقث نّا ݣ ـ ؤر تّيحميلن ميدّن أسّلمد ئصحان. دّان أد تّثفارن شّهواث نسن، سمونن غيفسن ئسّلمادن نّاسن ئتّينين أينّامي ران أد سّغدن،
4 دّان أد برّمن ئمجّان نسن ؤر سّغادن ئي لحقّ أها أوينتّ ݣ ـ لخورافاث.
5 ئد شݣّين تّباض ݣ ـ ئخف نش ݣ ـ مايد ئݣان شا، ثدعند ئي ثمارا. ئݣ لخدمث ن ـ ؤنّا يتبرّاحن س ـ ئنغميسن ژيلنين ن ـ لينجيل. ئخصّاياش أتّݣد أينّا غيفش ئلّان كولّ داث ن ـ ربّي.
6 ئدّخ ئدامّن ئنو ݣان ياد أمّ وامان ن ـ واضيل نّا دا يتّونّغلان خف ثمغروصث ئي ربّي،
د ـ واسّ نّاݣ تّفغخ زݣ دّونيث أد ييوض.
7 مشد ئمنغي ئژيلن ݣيخث،
ثازّلا ئنو شمّلختّ،
د ـ ليمان حضيخث،
8 زݣ دغي هان مولانا، نّا دا يتّحاسابن ميدّن س ـ وار ثودماوين،
ئلّا ئفّري ثاسمغورث نّا دا ياكّا ئي وينّا منانين داثاس،
ئدّا أد ئي تّيوش ݣ ـ واسّ ن ـ لحساب،
ؤر ئد غاس ئي نكّين مشان أود ئي وينّا دا ثتعايانّين كولّ س ـ وولاون نسن أدّيضهير.
ئوصّاثن ئنݣّورا ئي تيموثاوس
9 أتيموثاوس، ئݣ ثامسّومانث أد غوري تثدّود دغيا،
10 ئدّخ ديماس ثزويراسد دّونيث أد أها ئزريي يدّو غر ثمدينث ن ـ تاسالونيكي، كريسكيس ئدّا غر ثمازيرث ن ـ غلاطيا، د ـ تيطوس ئدّا غر ثمازيرث ن - دالماطا.
11 غاس لوقا أيد ئقّيمان أݣيدي. زري غر مارقوس ثاويتّيد أݣيدش ئدّخ ئدّا أد ئي ينفع ݣ ـ لخدمث.
12 ئد تيخيكوس هاثين ؤزنخثينّ غر ثمدينث ن ـ أفاسوس.
13 أدّاي تثدّود ثاويديد أژنّار ئنّو نّا نّزريخ غر كاربوس ݣ ـ ثمدينث ن ـ تارواس، ثاويديد أود أرّاثن لومنّا وين ؤݣليم.
14 أليسكاندر أمزيل ئصرّف ديݣي شيݣان ن ـ لعيب، مولانا ئدّا أداس ئخلّص خف ؤينّا يݣا.
15 ئوا أوياس بعيتّ أود شݣ، ئدّخ هاثين أر ئتّنالا ئواليون نّخ عنوݣا.
16 لّيݣ بدّيخ ݣ ـ لمݣليس أد سيولخ خف ئخف ئنو لمرث ثامزواروتّ أود يوكّ ديدّان أد ئبدّ أݣيدي، كولّ نسن زريني. ؤر ثن ئتّحاساب ربّي خف ؤياد.
17 مشان مولانا يبدّا أݣيدي أها يوشي ثيغيتّ حما أد برّحخ س ـ واوال نس س ـ ماس ئلّا أداس سلّان وينّا ؤر ݣينين ؤداين كولّ، أها يسراحي زݣ ؤقمو ن ـ ئزم.
18 أها يدّا مولانا أد ئي ئسراح زݣ ؤينّا ئخّان كولّ أها يصّيوضي س ـ لمان غر ثݣلديتّ نس ن ـ ييݣنّا. أداس ييلي لعزّ أبدا ن ـ ئبيدان. أمين.
سّلاماث ئنݣّورا
19 سلّم خف بريسكيلا د ـ ؤرݣاز نس أكيلا د ـ أيث ؤخام ن ـ ؤنيسيفوروس.
20 مشد أراستوس ئقّيمانّ ݣ ثمدينث ن ـ كورينثوس، ئد تريفيموس ياغث شا زريخثينّ ݣ ـ ميليتوس.
21 ݣ ـ ثامسّومانث، سدّرف أد غوري تثدّود داث ن ـ ثݣرسث. دا غيفش ئتسلّام أفبولوس د ـ بوديس د ـ لينوس د ـ كالافيديا د ـ أيثماثنخ كولّ نسن.
22 أد أݣيدش ييلي مولانا، ئوشاون رّحمث كولّ نّون.