3
أبريد ن-ئمومن
1 سّكتي يي ئمومن أد وقّرن ئنمغورن د-ئنبّاضن، ئلازم أت تن ضاعن أها وجيدن دّيما أد ݣين لخير.
2 ؤر ساوالن ݣ-أود يون س ݣار أوال، ؤر تناغن، ماشان ئخصّا أد ݣين ئضرافيين أها مصارفن د ميدّن كول س تاضفي.
3 هاتين أود نكني، مشتيد أياد، نكّا نݣا ئحياض، ؤر دا نتضاع ربّي، نفّغ أبريد نّس، دا نتتفار مايد ئݣان شهوات د-ؤينّا خ ئتّيعجيبن، نزّري ؤسّان نّخ ݣ تيخّوت، نݣا ئمحسادن، دا نكرّه ميدّن أها أر-اخ كرّهن.
4 ماشان لّيݣ ئسضهر ربّي أمفوكّو نّخ تاضفي نّس د تايري نّس يي ميدّن،
5 ئفوكّاياخ، ؤر ئد ئدّخ نݣا شا ئسكّين غودانين، والاينّي ئݣا أياد س رّحمت نّس. ئفوكّاياخ س رّوح نّس نّا خ ئوشان تالالييت تيسّ سنات أها ئرار تودرت نّخ د توجديت س-ؤغبّژ ݣ وامان.
6 ربّي ئزلّع غيفنخ س وازّور رّوح-اد س سّباب ن سيدنا عيسى لمسيح أمفوكّو نّخ.
7 هاتين ئمشيد أس-اخ ئرار د ميدّن منانين س رّحمت ن لمسيح أها نورت تودرت ن وابدا نّا ئݣان رّجا نّخ.
8 هان أوال-اد ئݣا س-تيتّ، خف ؤياد ريخ أت توكّتّ خف ئسكّين-اد، حما وينّا يومن س ربّي أد ݣين لجهد نّسن باش أد ݣين لخير. أياد ئژيل أها ديكس نّفع يي ميدّن كول.
9 والاينّي كّ ئديس يي ؤمغانّا أحيوض، د ترزي ن لاصل ن لوالدين نّا غر ؤر ئلّي لحدّ، د-ئمنغان، د-ؤمخيلاف خف شّرع (ن موسى)، ئدّخ أياد ؤر دا ئتنفاع أها ؤر ديكس لفايت.
10 د بنادم نّا ئسكّارن بطّو ئنݣر ن ئمومن، علماس لمرت تامزواروت، لمرت تيسنات، داي فّيراس وشاس تّاسيع.
11 تسّند ئد بنادم أم واد ئفّغ أبريد ن لحقّ، ئسول دا ئتݣّا لمعصييات أها ييويد لحكام ن ربّي يي ئخف نّس.
لوصييات تينݣّورا
12 داي أدّاي أزنخ أش أرتيماس نغد تيخيكس، سربا ئخف نّش، أدّود غوري غر تمدينت ن نيكوبوليس، ئدّخ داد أي عوّلخ أد زّريخ لمشتوت.
13 ݣّ دّرع، أت تعاوند يي زيناس، نّا ئݣان بوݣاضو د-أبولوس، حما ؤر-اسن ئتخصّا والو ݣ سّفرت نّسن.
14 ميدّن نخ ئمومن ئخصّاسن أد علمّن أت تݣّين أينّا ئژيلن، حما أد عاونن ميدّن ݣ ؤينّا حدادجان، أها ؤر تݣّين وار نّفع.
15 دا غيفش تسلّامن وينّا ئلّان أݣّيدي. بلّغ سّلام ئنو يي وينّا خ ئتّيرين نّا ئتّامن س لمسيح أم نوكني. أد-اون ئوش ربّي رّحمت نّس كول نّون.