ثابراتّ ثامزواروتّ ن ـ ؤمازان بولوس ئي تيموثاووس
1
1 ثابراتّ أد زّيݣي، نكّين بولوس، ئݣان أمازان ن ـ سيدنا عيسى لماسيح س ـ ثانباطّ ن ـ ربّي أمفوكّو نّخ د ـ سيدنا عيسى لماسيح رّجا نّخ.
2 ؤريخاشتينّ أتيموثاووس، شݣين ئݣان سثيتّ أمّ ممّي ݣ ـ ليمان: أداش ئوش ربّي يبّاثنخ د ـ سيدنا عيسى لماسيح مولانا نّخ لباراكا د ـ رّحمث د ـ لهنا.
ئسّلمادن ن ـ ثحلّال
3 ليݣ ؤمژخ أبريد غر ثمازيرث ن ـ ماكيدونيا، قّرفاخ غيفش أتقّيمد ݣ ـ ثمدينث ن ـ أفاسوس أتّنهرد ييتس أد ؤر سّلمادن شان ؤسّلمّد ضنين ؤر دا يتّمساسان د ـ وينّخ،
4 أها ؤر تّعمّارن ؤلاون نسن س ـ لخورافاث د ـ واوال خف ئسالاثن ؤر ئلين ثينݣيرا، أياد دا ديتّادجا غاس أمغانّا ئنݣر ميدّن أها ؤر دا يتّادجّا لخدمث ن ـ ربّي ئبنان خف ليمان أتّزايد غر داث.
5 ئد ما خف أش نّيخ أثن ثنهرد، حما أتّيلي ئنݣر ميدّن يوث ن ـ ثايري نّا ديكّان زݣ وول أزدّاي د ـ لخاضر ئهنّان د ـ ليمان ݣ ـ ؤر ئلّي نّيفاق.
6 ييتس ن ـ ميدّن ؤنفن زݣ ؤياد كولّ أغولن فّغن أبريد أر ساوالن خف ئسكّين ؤرانين.
7 ران أد ݣين ئسّلمادن ن ـ شّرع د ـ نثني ؤر فرين شا ݣ ـ ؤينّا دا تّينين ؤلا ݣ ـ ؤينا دا صّوحان.
8 مشان نوكني نسّن ئس ئژيل شّرع ن ـ ربّي مش دا ييسّ ئتّݣا بنادم ئمشينّا ئلازمن.
9 نوكني نلّا نسّن ئس ؤر ئتّواݣ شّرع ن ـ ربّي ئي وينّا منانين، مشان ئي وينّا غر ؤر ئلّي شّرع د ـ وينّا فّغنين أبريد ن ـ ربّي، د ـ ئي وينّا ؤر دا تّعبادنين ربّي د ـ وينّا ثعصانين، د ـ ئي وينّا ؤر زدّيݣنين داث ن ـ ربّي د ـ وينّا غر ؤر ئواثا ربّي شا، ئي وينّا دا نقّانين ئد بّاتسن د ئد مايتسن، ئي وينّا نقّانين ميدّن،
10 ئي وينّا دا تّفسادنين، د ـ ئي ئوثمان نّا دا ݣّانين د ـ ئوثمان ضنين، د ـ ئي يسبّابن ن ـ ئسمغان، د ـ ئي أيث ثحلّال د ـ وينّا دا تݣالّانين خف لباطل، د ـ وينّا دا تݣّانين كولّ أينّا ؤر دا يتّمساسان د ـ ؤسّلمد ئصحان،
11 ئمشينّاس ئلّا ݣ ـ لينجيل نّا خف ئي ئسّيمن ربّي، نّا دا يساوالن خف لعزّ ن ـ ربّي ئݣان أنبارش.
بولوس دا يتّحماد ربّي خف رّحمث نس
12 لفضل ئي سيدنا عيسى لماسيح مولانا نّخ نّا يي يوشان ثيغيتّ، ئدّخ ئي يوفا واثاخ أد ديݣي يݣ لامين لّيݣ ئي ئسثي أد ݣخ لخدمث نس.
13 نكّين نّا يكّان داث ن ـ ؤياد أر غيفس ساوالخ س ـ لكوفر أر تّكرفاصخ ئمومنّ ݣخ أرݣاز ئتعدّان، مشان ئرحميي مولانا ئدّخ أينّا ݣيخ ݣيخث ئدّخ ؤر سّينخ شا لّيݣ سولخ ؤر ؤمينخ س ـ لماسيح.
14 أها ئسّنݣيد غيفي مولانا نّخ رّحمث نس س ـ شيݣان ئسمونتّيد د ـ ليمان د ـ ثايري نّا يلّان ݣ ـ ؤزدّوي د ـ سيدنا عيسى لماسيح.
15 هاياون أوال ئݣان سثيتّ أها يخصّا أثيقبل كّو يوكّ: سيدنا عيسى لماسيح ئدّاد غر دّونيث أد ئفوكّو وينّا عصانين د ـ نكّين ؤݣرخثن كولّ.
16 مشان ئرحمي مولانا، حما أد ديݣي ئسباين سيدنا عيسى لماسيح، نكّين نّا ثن يوݣرن كولّ، صّبر نس ؤر ئلين لحدّ. ئصبر أݣيدي ئمشيد حما أد أنّاين وييّاض أها أمنن ئسّ ثيلي غورسن ثودرث ن ـ وابدا.
17 دغي أداس ييلي وادّور د ـ لعزّ أبدا ن ـ ئبيدان ئي وݣلّيد ن ـ وابدا نّا ؤر دا يتّمثاثن، ؤنّا ؤر دا يتّويانّاين، ئݣان ربّي أفرضي. أمين.
18 هاثين سّيمنخش أتيموثاوس أممّي خف ؤياد نّاس ئش كلّفخ، نّا دا يتّمساسان د ـ ئواليون نّا غيفش نّان ئمومنّ داث ن ـ ؤياد ئمشينّا أسن ئسنعث ربّي. ئݣ ئواليون ݣ ـ لبال نش حما أتنّاغد ئمنغي يژيلن،
19 د ـ شݣ ثومژد ݣ ـ ليمان س ـ لخاضر ئهنّان، أياد أيد زرين ييتس أها يرژ ليمان نسن أمّ ؤغرّابو يغلين ݣ ـ لبحر،
20 زّيكسن هيمانايوس د ـ أليسكاندار نّا ؤدّجيخ ئي شّيطان حما أد لمدن أد ؤر سار تّعاوادن أد سيولن خف ربّي س ـ لكوفر.