2
أرݣاز بو توخّوت نّا ئدّان أد د-ئدّو دات مولانا نّخ
1 ئد أجبار ن مولانا عيسى لمسيح د-ؤجمّوع نّخ أݣّيتس، دا-اون نتتّر أيايتماتنخ:
2 أد-ؤر سّروْيات أنلي نّون فيمرّا، ؤلا أت تݣدم مش-اون نّان ميدّن هان أسّ ن مولانا ييوضد ياد. أد-ؤر تن تّامنم، مش-اون نّان ئݣا واوال-اد وين ربّي نغد أمي ئݣا شا ن واوال زݣ غورنخ نغد شا ن تبرات نّاݣ نوري أياد.
3 أد-ؤر تّادجات أود يون ن بنادم أد كون ئسخضو س مايد ئݣان شا. ئدّخ ؤر ئنّي واسّ نّا أد د-ئدّو أر ئساقّا لكوفر يي دّونييت ݣ-ؤمزوارو أها ئضهرد ؤرݣاز بو توخّوت نّا ئدّان أد ئتّوخلو ݣ جاهنّام.
4 ونّا ئدّان أد-ئݣ ضدّ أها ئݣ ئخف نّس نّيݣ ن وينّا تحسابن ميدّن ئس ئݣا أم شان ربّي أها أر ت تعبادن، أها ئدّا أد ئقّيم أود ݣ تادّارت ن ربّي أها يينّي يي ميدّن ئس ئݣا ربّي.
5 هاتين نّيخ-اون ت ياد لّيݣ غورون لّيخ، ئس تتّوم؟
6 تسّنم مايد-اس ئتحاطارن دغي ؤر-ئتضهار أر تاوض لوقت نّس،
7 ئدّخ لجهد ن توخّوت دا تخدّم س توفرا. ئخصّا غاس أد ئتواسي ونّا ئسول دا س-ئتحاطارن.
8 داي ئضهرد ؤرݣاز بو توخّوت، أها ئدّا مولانا عيسى أت تينغ س-ؤنفوس ن-ئمي نّس، ئخلوت أدّاي د-ئعايد س لعزّ.
9 أرݣاز بو توخّوت ئدّا أد د-ئدّو س لجهد ن شّيطان، ئدّا أد ئݣ تيميتار د لعجايب نّا ݣ ئلّا لغضر،
10 د-ئسكّين نّا ئخّان كول حما أد ئغرّا وينّا ئدّان أد خلون، علاحقّاش ؤر قبيلن أها ؤر رّين لحقّ نّا ئغيين أت تن ئفوكّا.
11 خف ؤياد، ئدّا اد-اسن يازن ربّي ئشكي أخاتار حما أد-امن س تحلّال،
12 ئمشيد دّان أد تّوحاكمن كول وينّا ؤر يومين س لحقّ، أها أر-اسن ئتّيعجيب أد ݣين لعار.
ربّي ئختاركون حما أت تفوكّام
13 ئد كونّي، أيايتماتنخ، كونّي نّا ئعزّين غر مولانا، ئلازم غيفنخ أد نحمد ربّي دّيما زݣ تنيلا نّون، ئدّخ ئختاركون ربّي زݣ تيزويريa حما أت تفوكّام س رّوح ن ربّي نّا كون ئسزديݣان د س ليمان نّون س لحقّ.
14 هاتين خف ؤياد أخف-اون ئغرا ربّي س لينجيل نّا خف-اون نسيول، حما أد غورون ييلي ؤمور ݣ لعزّ ن مولانا عيسى لمسيح.
15 ئوا أيايتماتنخ، تبتات مليح أها تحضوم أينّا أون نسّلمد س-واوال نغد س تيرّا.