3
ترات يي ربّي زݣ تنيلا نّخ
1 غر تنݣيرا أيايتماتنخ، تّرات يي ربّي زݣ تنيلا نّخ، حما أد ياوض واوال ن مولانا ميدّن كول فيمرّا، ئتّواݣّاس لعزّ أم ؤينّا س تݣام.
2 أها تتّرم يي ربّي ألّو أد-اخ ئندجا زݣ ݣار ميدّن نّا ئݣان ئمخّان، ئدّخ ؤر ئد ميدّن كول أيدا ئتامن س ربّي.
3 والاينّي مولانا دا ئتݣّا دّيما أينّا ئقاول، نتّا ئدّا أد-اون ئوش لجهد أها ئحضوكون زݣ ئمخّيa.
4 د نكني، غورنخ لامان ݣ مولانا ئس دا تضاعم أينّا خف كون نتوصّا أها تدّام أت تقّيميم أد-ئس تݣّيم.
5 د مولانا أد ئݣوّد ؤلاون نّون غر تايري ن ربّي د صّبر ن سيدنا عيسى لمسيح!
ئخصّا أت تخدمم
6 أيايتماتنخ، دا كون نتوصّا ݣ-ؤدم ن مولانا عيسى لمسيح، أت توشيم تّاسيع يي أيتماتون (ئمومن) ئمعݣازن نّا ؤر دا تݣّين س لوصيات نّا كون نوصّا.
7 هاتين تسّنم مليح ئس ئخصّا أت تݣيم أينّا نݣا، ئدّخ لّيݣ نلّا غورون ؤر نݣي ئمعݣازن،
8 أها ؤر دجين نتّشي غر شا ن يون فابور، ماشان نخدم س-ئض د واسّ ݣ تمارا د-ؤخوب حما ؤر نتّݣ أݣّا خف أود يون زّيݣون.
9 يّيه، مغار غورنخ لحق أد-اخ تعاونم، ؤر-اون ت نتّير، ماشان نسنعتاون أبريد نّا ئخصّا أت تفارم.
10 داي لّيݣ نلّا غورون، أر كون نتوصا: «ونّا ؤر ئرين أد ئخدم، ئخصّا ؤر-ئتتّا!»
11 هاتين دا نتّيني أياد ئدّخ نسلّا ئس لّان ئتس ن ميدّن ئنݣراون ݣان ئمعݣازن ؤر دا تّيرين أد خدمن أها أر تّاكمن تينباضين ن ميدّن ياضن.
12 ميدّن-اد دا تن نتوصّا، أر تن نسزعيم ݣ-ؤدم ن مولانا عيسى لمسيح، كو يون أد ئݣ لخدمت نّس أها ئتّش أغروم نّا ئصوّر س تغراد نّس.
13 ئد كونّي أيايتماتنخ، أد ؤر توحيلات زݣ تيݣّي ن لخير.
14 مش ئلّا شا ن يون ؤر دا ئتضاع لوصييات نّا ئلّان ݣ تبرات-اد، عقّلات غيفس أها تكّيم-اس ئديس حما أد ئحشّم زݣ ئخف نّس.
15 بلحق أد ؤر ت تݣّيم د-أنضليب، والاينّي قژّراتّ أم شا زݣ أيتماتون.
لباركا د سّلام
16 دا تتّرخ يي مولانا نّا ياكّان لهنا، أد-اون ياكّا لهنا ݣ مايد ئݣان لوقت د مايد ئݣان لحالت. أر تترخ ألّو أد ييلي مولانا أݣّيدون كول نّون.
17 سّلام-اد ؤريخاونتين، نكّين بولوس، س تيرّا ن-ؤفوس ئنو تاد أيد ئݣان تاماتارت ݣ تبراتين ئنو كول، ئمشيد أس دا تّاروخ.
18 أداون ئوش مولانا عيسى لمسيح كول نّون رّحمت نّس.