ثابراتّ ثامزواروتّ ن- ؤمازان بولوس ئي ئمومن ن - ثمدينث ن - تسالونيكي
1
سّلام
1 زݣ بولوس د سلوانس د تيموثاوس، أيدا يارين تابراتّ-اد يي ؤݣراو ن-ئمومن ن تمدينت ن تسالونيكي، وينّا ݣانين وين ربّي ئبّاتنخ د مولانا عيسى لمسيح. أد-اون ئوش ربّي رّحمتa د لهناb!
2 دا نتحماد يي ربّي دّيما زݣ تنيلا نّون، أر كون بدّرخ ݣ تژيلّا نّخ كوتوال.
3 ؤر دا نتتّو أدّاي نيلي دات ن ربّي ئبّاتنخ: تاووري ن ليمان نّون، لخدمت نّون نّا ئسّنعاتن تايري نّون د تّباتّ ن رّجا نّون ݣ مولانا عيسى لمسيح.
4 أيايتماتنخ ئعزّين، أوينّا ئتّيري ربّي، نسّن ئس كون ئختار،
5 لاحقّاش، لّيݣ أون ندّيوي لينجيل، ؤر-ئد س واوال هيلّي، والاينّي س لجهد د رّوح ن ربّي د ليقين ئصحان. هاتين تسّنم ماكّا ئݣا صّرف نّخ أݣّيدون، أينّا أر نتّݣ ئس أون ئژيل.
6 ئد كونّي تلمدم أت تݣيم أم نكني د-ام مولانا، ئدّخ ݣ تمارا ترحبم س واوال ن ربّي، والاينّي س-ؤفراح نّا أون ئوشا رّوح ن ربّي.
7 خف ؤياد ئمومن كول ن تمازيرت ن مقدونيا د تمازيرت ن أخائيا أغولن دا تݣّين أم كونّي.
8 ستيت، زݣ غورون أيد ئفّغ واوال ن مولانا، ؤر-ئد غاس ئس-اس سلين أيت تمازيرت ن مقدونيا د تمازيرت ن أخائيا، والاينّي ييوض ألّو ماݣّان أنسا ؤنغميس ن ليمان نّون س ربّي. ئوا هاتين ؤر ئقّيم شا ؤسكّين أت تنيني خف ؤياد،
9 ئدّخ ميدّن دا تقّيسن خف ؤرحاب نّا ئسنخ ترحبم لّيݣ دندّا غورون، د ميمشي تݣام تزريم لاصنام حما أت تطفارم أبريد ن ربّي أها تعبدم ونّا ئدّرن أها ئݣ أحقاقي.
10 أر تراجام أد ديدّو زݣ ئݣنّا، ممّيس نّا د-ئسكّر زݣ ئنݣر ن-ئمتّين، ئدّا أداخ ئفوكّا زݣ ؤقلّق ن ربّي ݣ واسّ ن لحساب نّا ئدّان أد ديدّو.