2
لخدمت ن بولوس ݣ تمدينت ن تسالونيكي
1 ئوا، أيايتماتنخ، هاتين تسّنم ئس ؤر غورون نددّي باطل.
2 أها تسّنم ألو ئس-اخ ݣان أيت تمدينت ن فيلبّي شايݣان ن لعار أها رݣمن-اخ. ماشان ربّي ئوشاخ لجهد حما أد-اون نسيول خف لينجيل، واخّا ݣان-اخ شايݣان ن ميدّن تّاعرّوض.
3 ستيت، ألمّد نّخ ؤر ديكس أفرّوغ ؤلا طّمع ؤلا لغضر.
4 والاينّي، ربّي ئجرباخ، يافن ئس ديݣنخ لامان، أياد أخف-اخ ئوشا أد نبرح س لينجيل نّس. أدّاي دا نتݣا أياد، ؤر-ئد حما أد نسّرضو ميدّن، ماشان حما أن نسّرضو ربّي نّا ئتّانّاين مايد ئلّان جاج ن وولاون نّخ.
5 تسّنم ئس ؤر دجين نلحلح س واوال نّخ خف شا ن بنادم، د لموراض نّخ ؤر ئد أنسمون لفلوس، د ربّي ئݣا شّاهد.
6 ؤر دجين نرزي أد-اخ ݣين ميدّن لعزّ، ؤلا أد-اخ تݣيم كونّي ؤلا أد-اخ تݣين ميدّن ياضن.
7 مغار نݣا ئمازان ن لمسيح، ؤر غيفون نژيّر س تنباطّ نّا غورنخ ئلّان، والاينّي نݣا ئضرافيين أم ؤينّا تݣا تمطّوطّ ئسّوطوضن أراو نّس، لّيݣ نلّا أݣّيدون.
8 س تاضفي نّخ، نرا أد-اون نوش ؤر ئد غاس لينجيل ن ربّي، ماشان نرا أد-اون نوش ألو أود تودرت نّخ، ئدّخ تاغولم تعزّيم شايݣان غورنخ.
9 أيايتماتنخ، ؤر تتّوم لخدمت نّخ د تمارا نّخ: نخدم س-ئض د واس حما ؤر نتݣ أݣّا ئژّاين خف أود يون زّيݣون أها أر-اون نسّاوال ألّو ݣ لوقت نّا خف لينجيل ن ربّي.
10 كونّي، دا تشاهادم أها أر ئتشاهاد أود ربّي، ماكّا ݣّا صّرف نّخ أݣّيدون أئمومن، ئس ئصفا، ئݣ لحقّ أها ؤر ديكس لعيب.
11 أها تسّنم ألّو ئس أر-اون نتݣّا أم ؤينّا ئتّݣ ؤرݣاز يي واراو نّس.
12 أر كون نتوصّا، أر كون نسزعيم أها أر غيفون نتوكّاد أت تطفارم أبريد نّا ئسّمغوران س ربّي نّا أون ئقّار غر تݣلدييت نّس د لعزّ نّس.
13 دا نتحماد ربّي ألّو دّيما، ئدّخ لّيݣ تسغدم يي واوال ن ربّي نّا أون دنيوي، تقبلمت ؤر ئد أم واوال ن بنادم، ماشان أم واوال ن ربّي. يّيه ئݣا ستيت أوال ن ربّي نّا ديݣون ئخدّمن أئمومن.
14 أيايتماتنخ، هاتين تطفارم أبريد ن ئݣراون ن-ئمومن ن ربّي ݣ تمازيرت ن يهوذا، وينّا ئݣان (ݣانين) وين سيدنا عيسى لمسيح. ئدّخ ئمشينّا سكّين غيفسن ووداين تامارا، أود كونّي سكّين غيفون أيت تمازيرت نّون تامارا.
15 ؤداين-اد أيد-ئنغان سيدنا عيسى لمسيح د لانبييا، ژعناخ ألّو زݣ تمازيرت س دّرع. أر تݣّين أينّا ؤر دا ئتّيري ربّي، ݣين ئنضليبن ن ميدّن كول،
16 ؤر دا خ تدجان أد نبرّح س واوال ن ربّي يي وينّا ؤر-ئݣين ؤداين حما أد أفوكّان. خف ؤياد دا تزايادن كوتوال ݣ لمعصييات نّسن ألّيݣ ئوضن لحدّ. غر تنݣيرا، ئتوتّي غيفسن ؤقلّق ن ربّي.
بولوس ئرا أد ئكّ ألّو ئمومن ن تسالونيكي
17 أيايتماتنخ، ئد نكني، ئتواݣ-اخ دّرع أد-اݣّيدون نبضو شان لوقت، مغار تبعدم يي والّن نّخ تلّام ݣ وولاون نّخ. هاتين نݣا شيݣان ن لمجهود حما أد كون نانّاي ئدّخ-اخ ئنغا فاد نّون.
18 أينّا أخف نرا أد ناغول غورون. لومنّا نكّين بولوس ݣيخ تامسّومانت شيݣان ن يكّال، والاينّي شّيطان ئبّي غيفنخ أبريد.
19 مايد ئدّان أد ئݣ رّجا نّخ، لفرح نّخ د تّاج ن لعزّ نّخ دات ن مولانا عيسى أدّاي د-ئدّو؟ ئس ؤر ئد كونّي؟
20 يّيه، كونّي أيد ئݣان لعزّ نّخ د لفرح نّخ.