3
1 خف ؤياد ؤر نغي أد نصبر ؤݣار. داي نخمّم ئس ييف أد نقّيم وحدنّخ ݣ تمدينت ن أثينا،
2 أها نوزناون ؤماتنخ تيموثاوس نّا ئخدمّن يي ربّي، أر-اخ ئتعاوان ݣ-ؤبرّح س لينجيل ن لمسيح، حما أد كون ئستبت خف ليمان نّون أها ئسزعيمكون.
3 ئمشيد، أود يون ؤر ئتزعزاع زݣ ليمان نّس خف نّيرت ن تماريوين نّا غيفون ئتكّين. هاتين تسّنم كونّي س-ئخفاون نّون ئس كتابنت أم تماريوين-اد خف ئمومن كول.
4 لّيݣ نلّا غورون، أر-اون نتّيني تيزويري ئس دّان أد-اخ أغن تماريوين. هاتين أينّا ئجران أها تسّنمت.
5 أياد أخف، ؤر غييخ أد رژنخ، كّرخ أزنخ تيموثاوس حما أد ئسينخ ماكّا ئݣا ليمان نّون. ݣّدخ أد ييلي شّيطان ئغرّا كون ياد أها تاغول تݣ تازلا نّخ كيف والو.
6 ماشان دغي، تيموثاوس ياغولد زݣ غورون، ياوياخد لخبار ئغودان ن ليمان نّون د تايري نّون. ئنّاخ ئس دا خ تكتّيم دّيما س لخير أها ترام أد-اخ تانّايم أم ؤينّا نرا أكون نانّاي أود نكني.
7 خف ؤياد أيايتماتنخ، هان ليمان نّون داخ ئسزعيم، مغار نلّا ݣ مكرضول د تماريوين.
8 دغي، ئعايداخ رّوح، ئدّخ تسولم ثومژم مليح ݣ مولانا.
9 ئوا، ماكّاي نتّݣ أد نحمد ربّي زݣ ثنيلا نّون خف نّيرث ن-ؤفراح أخاثار نّاخ تسفرحم دات ن ربّي؟
10 هاثين دا س ندمّام دّيما، ئض د واسّ، حما أكون نانّاي ألّو أها نسّلمداون أينّاون ئخصّان يي ليمان نّون.
11 دا نتتّر يي ربّي، ئبّاتنخ س-ئخف نّس د مولانا عيسى أد-اخ سّوهينّa أبريد حما أكون نّاوض!
12 أها أر نتتّر يي مولانا أد ئسعدّو ئسخاتر شيݣان تايري ئنݣراويت د تايري نّون يي ميدّن كول، أت تݣ أم تايري نّا كون نتّيري،
13 حما أت تبيتن وولاون نّون، تݣيم زݣ ميدّن نّا ݣ-ؤر ئلّي لعيب بنيد ن ربّي ئبّاتنخ أها تݣيم وينّس، أدّاي د-ئدّو سيدنا عيسى د وينّا ئݣان كول وينّس.