4
تودرت نّا ئسرضون ربّي
1 دغي أيايتماتنخ، هاتين تلمدم زيݣنخ ماكّاي تݣّيم أت تدّوم ݣ-ؤبريد نّا ئتّيعجيبن يي ربّي. د-ؤياد أغا تݣيم. والاينّي دا زّيݣون نتتّر أها أر كون سحوژّور ݣ-ؤدم ن مولانا عيسى أت تزايدم أت تݣيم ؤݣار،
2 ئدّخ تسّنم لوصيات نّا س كون نوصّا س لامر ن مولانا عيسى.
3 لموراض ن ربّي: أت تݣيم وينّس أها توشيم تّيساع يي لفساد،
4 د كو يون أد ييلي نّبض يي ئخف نّس، حما أد ييدير ݣ ؤينّا ئسرضون ربّي أها وقّرنت ميدّن،
5 ؤر غيفس تّنباض شّهوت نّس، أم ؤينّا تݣّين لݣنوس ن دّونيت نّا ؤر ئسّين ربّي،
6 أها ؤر ئتݣّا بنادم لعار يي ؤماس ؤلا أت تيغشّا ݣ-ؤياد. هاتين ننّاويت أها نعلماويت ياد ئس ئدّا ربّي أد يامژ لحقّ زݣ ونّا ئݣان لمعصييات-اد.
7 ئدّخ ربّي ؤر-اخ د-ئغر يي لعفن، والاينّي ئغراخد حما أد نݣ وينّس.
8 خف ؤياد، ونّا ؤر دا ئتّيرين لوصييات-اد، هاتين ؤر ئد بنادم أ-ؤر دا ئتّيري، ماشان ؤر دا ئتّيري ربّي نّا أون ياكّان رّوح نّس.
9 ئد تايري نّون يي ئمومن ياضن، هاتين ؤر تحدادجام أد-اون أريخ خف ؤياد، ئدّخ ربّي ئسلمد-اون أت تمييريم ئنݣراويت.
10 هاتين أينّا أيدا تݣّيم يي أيتماتون كول نّا دمي تزدغم ݣ تمازيرت ن مقدونيا. والاينّي داون ندمّام أيايتماتنخ أت تزايدم أت تݣيم ؤݣار ݣ تايري-اد،
11 ݣات لمجهود أت تيديرم ݣ لهنا، ؤر تتّاويم غاس ݣ لهمّ نّون، أها تصوّرم تاقشّوت ن-ؤغروم س لخدمت نّون أم ؤينّا كون نوصّا،
12 حما أد وقّرن وينّا ؤر دا ئتّامن س سيدنا عيسى لمعيشت نّون أها ؤر تعوّالم خف أود يون أد-اون ئݣ أينّا تحدادجم.
أعايد ويسّين ن عيسى لمسيح
13 أيايتماتنخ، نرا أت تيسينم ما غا ئجرون يي وينّا ئمّوتنa، حما ؤر-اون ئتطيّار أم ميدّن ياضن نّا غر ؤر ئلّي رّجا.
14 ئدّخ دا نتّامن ئس ئمّوت سيدنا عيسى أها ئكّر زݣ لموت، أر نتّامن ألّو ئد وينّا ئمّوتن أها ؤمنّ ئس، ئس ئدّا ربّي أد تن ئسكّر زݣ لموت حما أد-اغولن د سيدنا عيسى.
15 د-ؤياد نّا أون نتّيني ئݣا أوال ن مولانا: نكني نّا ئدّان أد نقّيم ألّو ندّر ݣ لوقت ناݣ ئدّا أد د-ئدو، ؤر ندّي أد نزوير وينّا ئمّوتن.
16 أدّاي تيلي ليمارت د واوال ن-ؤخاتار ن لمالايكا د-ؤغويّي ن لكرنيطا ن ربّي، مولانا س-ئخف نّس ئدّا أد ئسرّح زݣ ئݣنّا. وينّا ئمّوتن أها ؤمنّ س لمسيح دّان أد كّرن ئمزوورا.
17 فّيراس، نكني نّا ئسولّ ندّر ݣ لوقت نّا، ندّا أد نتواسي أݣّيتسن ݣ-ئسيݣناو حما أد نمناقّار د مولانا ݣ-ئݣنّا، ئمشيد ندّا أد نيلي د مولانا دّيما.
18 ئوا، مسزعيمات ئنݣراويت س واوال-اد.