5
أسّ ن-ؤعايد ن سيدنا عيسى
1 ئد لوقت د زّمان ن-ئسكّين-ادa، ؤر تحدادجام، أيايتماتنخ، أداون أريخ غيفسن،
2 ئدّخ كونّي س-ئخفاون نّون تسّنم س تّحقيق ئس ئدّا واسّ ن مولانا أد ئدّو س-ؤخوتّل أم شا ؤشفّار ݣ-ئض.
3 أدّاي دا تّينين ميدّن: «ئلّا لهنا د لامان!» لوقت نّا، ئدّا ؤنّستم أد غيفسن ياتوي فيمرّا أم ؤقضاع ن تاروا أدّاي يامژ تامطّوطّ ئلّان س لعضر أها ؤر دّين أد راحن.
4 والاينّي كونّي، أيايتماتنخ، ؤر تلّيم ݣ تالّست حما أد كون ئخوتّل واسّ نّا أم شا ؤشفّار.
5 ئدّخ كونّي كول نّون، ثݣام زݣ واراو ن-ؤسيد د زݣ واراو ن واسّ. نكني ؤر نݣي زݣ واراو ن-ئض د تالّست.
6 أياد أخف-اخ ئخصّا ؤر ندّجان أم ميدّن ياضن، والاينّي ئلازم أد نقّيم نوكي أها نرار لبال.
7 وينّا ئدّجان، دا دّجان ݣ-ئض، د-وينّا ئسّان شيݣان ن شّراب، دا تسكارن ݣ-ئض.
8 ئد نكني نّا ئݣان أراو ن واسّ، ئخصّاخ أد نرار لبال، نلس ليمان د تايري أم تبانكا ن ووزّال نّا يوحطّون ئدمارّن د رّجا نّا زݣ د-ئتدّو ؤفوكّا أم طّاݣييّا ن ووزّال.
9 ئدّخ ربّي ؤر-اخ ئختار حما أد ئعاقب س ؤقلّق نّس، ماشان أد غورنخ ييلي ؤفوكّا س مولانا عيسى لمسيح،
10 نّا ئمّوتن غيفنخ حما أد نيدير أݣّيتس أدّاي د-ئدّو، مش ندّر نغد مش نمّوت.
11 ئوا، مسزعيمات أها تمعاوانم ئنݣراويت حما أت تمغورم ݣ ليمان، أم ؤينّا دا تݣّيم دغي.
لوصييات تينݣّورا د سّلام
12 أيايتماتنخ، دا زّيݣون نتتّر أت توقرم وينّا ئكّاتن تامارا ئنݣراويت، أر كون تݣوّادن أها أر كون تنهون س لامر ن مولانا.
13 ستحيات زّيكسن شايݣان أها تيريمتن خف نّيرث ن لخدمت نّسن. ييلي لهنا ئنݣراويت.
14 أر-اون ندمّام أيايتماتنخ أت تقژرم ئفنيان، تسزعيمم وينّا تݣدنين، تعاونم ئموحال، تساعفم ميدّن كول.
15 رارات لبال، ؤر ئترارا أود يون لعار س لعار، والاينّي ݣات لمجهود كول أت تميوݣّام لخير ئنݣراويت دّيما د يي ميدّن كول.
16 فرحات دّيما،
17 ژّالّات كوتوال،
18 حمدات ربّي ݣ مايد ئݣان شا. أياد أيد ئݣان لموراض ن ربّي، ݣات كونّي نّا ئݣان وين سيدنا عيسى لمسيح.
19 أد ؤر تݣّات تّاعرّوضb يي رّوح ن ربّي،
20 أد ؤر تحقّارات أوال ن وينّا مي ئسيول ربّي، أدّاي دا ساوالن س-ؤينّا سن ئسنعت.
21 والاينّي، جربات مايد ئݣان شا أها تامژم أينّا ئغودان.
22 كّات ئديس يي مايد ئݣان لعار.
23 دا تتّرخ يي ربّي نّا ياكّان لهنا، نتّا س-ئخف نّس أد كون ئعاون أت تيديرم تودرت نّا س-ئتّعجيبن أر لحدّ، ئندجا رّوح نّون د وولاون نّون د صّاحت نّون حما ؤر ئتّيغي أود يون أد كون ئلامّا أدّاي د-ئدّو مولانا عيسى لمسيح.
24 ونّاون ئقّارن ئلّا ديكس لامان أها ئدّا أد ئݣ أياد كول.