ثابراتّ ن ـ ؤمازان بولوس ئي يمومنّ ن ـ ثمدينث ن ـ كولوسّي
ثازوارايث
كولوسّي يوث ن ـ ثمدينث ثامژّيانث ديوسان خف يير ن ـ واسيف ن ـ لوكيوس ݣ ـ ثمازيرث ن ـ أسيا ثانامّاسث (ݣ ـ ثمازيرث نّامي دا قّارن دغي توركيا)، ثاساسد ئي ثمدينث ن ـ ؤفسوس ݣ ـ ؤنقّر ثيلي ئنݣراتسنث أمّ 160 ن ـ كيلوميتر.
أݣراو ن ـ ئمومنّ نّا يكّان ݣ ـ كولوسي أمّون ديكس أيث ثمازيرث، د ـ ووداين د ـ ئيونانين نّا زدغنين ديسّ. داي سكّرن ئسّلمادن ن ـ ثحلّال يوث ن ـ ثروايث ݣ ـ ؤݣراو: مشد وين ووداين أر تّينين ئخصّاياصن ئي يمومنّ س ـ لماسيح أد ؤر بطّون د ييتسث ن ـ لقاعيداث ݣ ـ شّرع، ئد ئسّلمادن ضنين أر تّامنن س ـ ويدّخ نّاخ ئسّنثل ربّي د ـ لمالايكاث أر ثن تّعبادن أر تّينين هاثين نثني أيد ئخلقن دّونيث د مايد ديكس ئلّان أها تّون ربّي د ـ لماسيح نّا غر ثلّا ثنباطّ خف مايد ئلّان كولّ.
لّيݣ يانّاي أبافراس، ئݣان أنبداد ن ـ ؤݣراو ن ـ ئمومنّ ݣ ـ كولوسّي، أياد ئطيّراس شيݣان أها يكّر ئعيّن بولوس غر لحبس ݣ ـ روما أها يقّيساس أينّا يجران كولّ ئدّخ بولوس ؤر دجّين ديكّي كولوسّي.
داي يازن بولوس ثابراتّ أد ئي ؤݣراو ن ـ ئمومنّ ݣ ـ كولوسّي دا ديكس يتّرارا خف ئواليون ن ـ ئسّلمادن ن ـ ثحلّال أراسن ئصّوحا ئد ربّي د ـ لماسيح يوكّ أيد ݣان، د ـ هاثين س ـ لماسيح أس ئخلق ربّي مايد ئلّان كولّ. د ـ س ـ لموث ن ـ لماسيح خف ئحنيݣن ن ـ ؤطّورق، ئغفراخ ربّي لمعصيّاث نّخ أها يݣاخ د ـ ميدّن نس.
ئسيولاسن بولوس ألثو ݣ ـ ثثبراتّ أد خف ميمش أيداس ئخصّا ئي ومومن س ـ لماسيح أد ييدير: أد زّيكس ئكّس بنادم أقبور أها ينس بنادم أماينو. بولوس ݣ ـ ثبراتّ أد ئسيول ئي واراو د ـ ئد بّاتسن، ئي يرݣزن د ـ ثوثمين نسن، د ـ أود ئي ئسمغان د ـ ئد باين نسن، كّو يوك د ـ مايد غيفس ئلّان أثيݣ.