ثابراتّ ن ـ ؤمازان بولوس ئي يمومنّ ن ـ ثمدينث ن ـ كولوسّي
1
سّلام ن ـ ؤمازان بولوس ئي وݣراو ن ـ ئمومنّ ݣ ـ ثمدينث ن ـ كولوسّي
1 ثابراتّ أد زّيݣي نكّين بولوس، ئݣان أمازان ن ـ سيدنا عيسى لماسيح ئمشينّا يرا ربّي، ييلي أݣيدي ݣماثنخ ثيموثاوس،
2 ؤزنخاونتّين أوينّا ݣانين وين ربّي ݣ ـ كولوسّي، أيايثماثنخ نّا ؤمژنين ݣ ـ ليمان نسن أها زدين د ـ لماسيح. أداون ئوش ربّي يباثنخ رّحمث د ـ لهنا.
أمازان بولوس دا يتحماد ئي ربّي
3 ديما دا نتّحماد ئي ربّي، ئبّاس ن ـ مولانا نّخ عيسى لماسيح أدّاي نژّالّ زݣ ثنيلا نّون
4 ئدّخ هاثين نسلّا خف ليمان نّون س ـ سيدنا عيسى لماسيح، د ـ خف ثايري نّون ئي وينّا ݣانين وين ربّي كولّ.
5 ليمان أد د ـ ثايري ياد يودجّاونثنيد رّجا نّاون ئفّر ربّي ݣ ـ ييݣنّا. هاثين ئتّوسيولاون غيفس ياد ݣ ـ لينجيل ئݣان أوال ن ـ لحقّ،
6 نّا كونينّ ييوضن ئمشينّا ييوض أود دّونيث كولّ، دا ياكّا لغلّث أر ئتساقّا ݣ ـ مايد ئݣان أنسا، ئمشينّا ئݣا أود ئنݣراثون، زݣّوس أون ئتّوسيول خف رّحمث ن ـ ربّي أها ثيسينم ماي تيݣّان سثيتّ،
7 ئمشينّا ثلمدم زݣ أبافراس ئݣان أسمون نّخ ئعزّان ݣ ـ لخدمث ن ـ ربّي، ئݣ غيفنخ a أمزيلّز ئي لماسيح ݣ ـ ئلّا لامين.
8 هاثين ئقّيساخ خف ثايري نّون نّا ديݣون ئݣا رّوح ن ـ ربّي.
ثژالّيتّ ن ـ ؤمازان بولوس زݣ ثنيلا ن ـ أيث كولوسّي
9 أينّا خف مي زݣّوس نسلّا ئي وياد غيفون، ؤر دا نتبداد زݣ ثزالّيت زݣ ثنيلا نّون؛ أراس نتتّر ئي ربّي أداون يوش مايد ئݣان ثانژّي د ـ لفهم س ـ رّوح نس حما أد عمّرن وولاون نّون س ـ ثوسنا ن ـ ؤينّا يرا،
10 حما أتّيغيم أد تّيديرم يوث ن ـ ثودرث نّا دا يسّمغوران س ـ مولانا، نّاس غيفون ئتّرضو ݣ ـ مايد ئݣان شا؛ أر ثاكّام لغلّث ݣ ـ مايد ئݣان لخدمث ئژيلن أر تمغورم ݣ ـ ثوسنا ن ـ ربّي.
11 أراس نتتّر نتّا نّا غر ئلّا جّهد كولّ د ـ لعزّ أداون ئوش ثيغيتّ نّاون ئخصّان حما أتّيغيم أتدعنم أها ثصبرم ئي مايد ئݣان شا س ـ ؤفراح.
12 أر تحمادم ئي ربّي يبّاثنخ نّا كون b ئݣان د ـ وينّا غر ئلّا لحقّ أد غورسن ييلي ومور ݣ ـ ثكاسوتّ نّا يفّر ئي وينّا ݣانين وينس ݣ ـ ثݣلديتّ ن ـ ؤسيدّ.
13 هاثين ئفوكّاياخ زݣ ثنباطّ ن ـ ثيلّاس أها يسموتّياخ غر ثݣلديتّ ن ممّيس ن ـ ثاسا نس،
14 نّاس غيفنخ ئوشا دّيث، ئݣان لغوفران ن ـ لمعصيّاث نّخ.
لعزّ ن ـ لماسيح
15 هاثين لماسيح أيد ئسنعثن ݣ ـ ئخف نس
ميمش أيد ئݣا ربّي نّا ؤر دا يتّويانّاين،
ئلّا داث ن ـ مايد ئݣان شا
أها يكّد نّيݣ ن ـ ؤينّا يخلق ربّي كولّ.c
16 ئدّخ نتّا أس ئخلق ربّي مايد ئݣان شا:
مايد ئلّان ݣ ـ ييݣنّا د ـ مايد ئلّان خف واشال،
أينّا دا يتّويانّاين د ـ ؤينّا ؤر دا يتّويانّاين،
ئݣلّيدن نغد ئنبّاضن نغد ئنمغورن نغد ئيد لمخزن (ن ـ وينّاخ ئسّنثل ربّي).
مايد ئݣان شا نتّا أس ئتّوخلق د ـ غيفس أخف ئتّوخلق.
17 نتّا يلّا دا ث ن ـ مايد ئݣان شا،
د ـ نتّا أس مياماژ مايد ئݣان شا ݣ ـ وانسا نس.
18 نتّا أيد ئݣان ئخف ن ـ ؤݣراو ن ـ ئمومنّ ئݣان صّاحث نس.
د ـ نتّا أيد ئݣان ثيزويري،
ئݣ أمنزو ن ـ وينّا دكّرنين زݣ ئمتّينd
حما أد ئݣ أمزوارو ݣ ـ مايد ئݣان شا.
19 ئدّخ ربّي يوساياسد خف لخاضر أد ييلي ݣ ـ لماسيح س ـ ثامونت نس.
20 د ـ نتّا أس ئرا أد ئسمصالاح ئخف نس د ـ مايد ئݣان شا،
مايد ئلّان خف واشال د ـ مايد ئلّان ݣ ـ ييݣنّا،
س ـ لهنا نّا يݣا
س ـ ئدامّن ن ـ لماسيح يوزّلان خف ئحنيݣن ن ـ ؤطّورق.
21 د ـ كونّي ثكّام أياد ئزرين ثݣام ئبرّانين خف ربّي، ثݣيم ئنضليبن نس س ـ ئخمّيمن نّون د ـ س ـ ݣار لفعايل نّون.
22 مشان دغي يمصالاح ربّي أݣيدون س ـ لموث ن ـ ممّيس نّا يوشان صّاحث نس ن ـ بنادم حما أكونيد ياوي غر داثاس ثݣام وينس، ئفّغكون لعيب أها ؤر غيفون ئتّيلي أود يان ؤلامّا.
23 مشان ئخصّايون أتّزايدم أتّامژم ݣ ـ ليمان نّون، أها ثزݣّام خف لساس ئصحان، ؤر تّانفم زݣ رّجا نّا يلّان ݣ ـ لينجيل نّامي ثسلّام أها يتّوبرّح ئسّ ئي لمخلوقاث كولّ نّا يلّان دّاو ن ـ ييݣنّا. لينجيل أد أمي ݣيخ، نكّين بولوس، أمزيلّز.
لخدمث ن ـ ؤمازان بولوس خف ؤݣراو ن ـ ئمومنّ
24 دغي، نكّين فرحخ س ـ ئمرّيثن نّا دا غيفي يتكّان غيفون. أها أر تّومرّاثخ ݣ ـ صّاحث ئنو حما أد أمّوخ ݣ ـ ثماريوين أمّ ثينّا يكّان خف لماسيح خف ؤݣراو ن ـ ئمومنّ ئݣان صّاحث نس،
25 نّامي ݣيخ أمزيلّز ئدّخ ربّي ئكلّفي (ئسثييي) أد ݣخ لخدمث أد غيفون، حما أد برّحخ س ـ واوال نس س ـ ماس ئلّا.
26 سّرّ أد ئكّا يفّر مشثا ن ـ زّماناث د ـ مشثا ن ـ ثسوثا، مشان ئسنعتّ ربّي دغي ئي وينّا ݣانين وينس.
27 نثني أمي يعوّل ربّي أد ئسنعث مشثا أيد ئمقّور لعزّ ن ـ سّرّ أد نّامي يحبّل ئي وينّا ؤر ݣينين ؤداين: سّرّ أد نتّا هاثين لماسيح ئلّا ديݣون، أياد أخف غورون ئلّا رّجا ن ـ ئس ثدّام أتّامّوم ݣ ـ لعزّ نّا غا ديدّون.
28 نتّا أس دا نتبرّاح نوكني، أراسن نعلّم ئي ميدّن كولّ، أر ثنسّلماد س ـ مايد ئݣان ثانژّي، حما أدّناوي كّو يوكّ ئثمر غر داث ن ـ ربّي، د ـ نتّا يزدي د ـ لماسيح.
29 أياد نّيث أخف دا تّازّلاخ أر كّاثخ ثامارا، س ـ لفضل ن ـ ثيغيتّ ن ـ لماسيح نّا دا ديݣي يخدّمن س ـ جّهد.