2
1 هاثين ريخ أتّيسينم مشثا ن ـ ثمارا أي دا كّاثخ غيفون د ـ خف ئمومن نّا لّانين ݣ ـ ثمدينث لاودوكيّا، د ـ خف وينّا ؤر ئي سّينين كولّ س ـ وودم.
2 دا تݣخ أياد حما أد هنّان وولاون نّونa د ـ كونّي ثزديكون ثايري ثݣام أمّ يوكّ، أها ثيلي غورون صّاحث ن ـ واول ݣ ـ ؤر ئلّي شكّ س ـ لفهم ئشمّلن؛ حما أتّيغيم أتّيسينم سّرّ نّا يفر ربّي: نتّا لماسيح.
3 ديكس أݣ فّرن لكنوز ن ـ ثانژّي د ـ ثوسنا كولّ.
4 داون تّينيخ أياد حما أد ؤر كون ئسّخضاو أود يوكّ س ـ واوال ياثفوضن.
5 داي مغار ؤر نلّيخ أݣيدون، ئلّان لعقل ئنو غورون؛ د ـ نكّين فرحخ ئدّخ أنّايخ ئس ئمساسا مايد ئݣان شا غورون أها ثزݣّام ݣ ـ ليمان نّون س ـ لماسيح.
لماسيح، ثانژّي ثارسليث
6 داي ييمشينّا ثقبلم سيدنا عيسى لماسيح أد ئيݣ مولانا نّون، ئوا دّوياث ݣ ـ ؤبريد نس،
7 د ـ كونّي ثݣرام ديكس ئژوران، ثݣامث د ـ لّساس ن ـ ثودرث نّون، أها ثزݣّام ؤݣار د ـ ووݣار ݣ ـ ليمان ئمشينّا أون ئتّوسلمدن، أها ثعمّرم ؤلاون نّون س ـ لحمد ئي ربّي.
8 أوياث بعيتّ، غوراون شا أداون ئتّش أنّلي س ـ ؤديدا د ـ واوال يوران نّا دودّجان ميدّن د ـ ويدّخ نّاخ ئسّنثل ربّي ݣ ـ دّونيث أد، ؤر ئيد أينّا ديودّجا لماسيح.
9 ئدّخ هاثين ݣ ـ لماسيح، ݣ ـ صّاحث نس ئݣان ثين بنادم، أݣ ئزدغ ربّي س ـ ثامونت نس.
10 د ـ كونّي ثݣام وينّا شمّلنين ئدّخ ثزديم أݣيدس، نتّا نّا دّيكّان نّيݣ ن ـ مايد ئݣان أنمغور د ـ مايد ئݣان أنبّاض ن ـ وينّاخ ئسّنثل ربّي.
11 د ـ ئدّخ ثزديم أݣيدس ألثو ثݣام أمّي ثتّوزݣنم، ؤر ئيد أزݣن نّا دا يتّواݣن س ـ ئفاسّن ن ـ بنادم؛ مشان أمّي أون ئزݣن لماسيح أد زّيݣون ئكّس بنادم أقبور ئعمّرن س ـ لمعصيّاث.
12 د ـ كونّي لّيݣ ثتّوغبّزم ݣ ـ وامان، ثݣام أمّي ثتّومضلم أݣيدس أها ثتّوسكّرمد ديخ أݣيدس ئدّخ ثومنم ݣ ـ ؤينّامي يغي ربّي نّا ثيد ئسكّرن زݣ ئمتّين.
13 د ـ كونّي ثكّام ثݣام أمّي ثمّوثم س ـ لمعصيّاث نّون د ـ طّبيعث نّون ئعصان ثسول ؤر زّيݣون ثكّيس، مشان ئسّيدركونيد ربّي د ـ لماسيح لّيݣ أخ ئغفر كولّ نّخ لمعصياث نّخ،
14 لّيݣ ئسفض أرّا ن ـ ؤمرواس نّا غيفنخ ئلّان زݣ ثنيلا ن ـ شّرع، ئكّسث أها يسمّرث خف ئحنيݣن ن ـ ؤطّورق.
15 س ـ ؤطّورق ن ـ لماسيح، ئكّس ربّي ثانباطّ ئي ينمغورن د ـ ئنبّاضن ن ـ ويدّخ نّاخ ئسّنثل ربّي، ئݣيثن د ـ لفضيحث س ـ طّايطاي، أها يݣيثن د ـ ئحبّاسن ئحريثن ݣ ـ ؤشابار نس.
لفرايض ؤر ئواثان شا
16 ئوا أد ؤر تادّجاياث أود يوكّ أكون ئحاسب خف ماي دا تتّام د ـ ماي دا ثسّام، نغد خف ماي دا تݣّام ݣ ـ شان لعيد نغد ݣ ـ ثلاليت ن ـ وايور نغد ݣ ـ واسّ ن ـ سّبث.
17 أياد كولّ غاس ثيلي ن ـ ئسكّين نّا غا ديدّون، ئيد صّاحث ن ـ واوال لماسيح أي تيݣان.
18 أد ؤر تادّجاياث أود يوك أكون ئسمّزݣال د ـ ثسمغورث نّون، زݣ ويدّخ نّامي دا يتّيعجيب ؤبندق ن ـ ثحلّال، أر تعبادن لمالايكاث، أر تّيغالن ئس داسن أكّانث ثويرݣا نسن ثانباطّ. أمّ ويد طّوفّين ݣ ـ ئخفاون نسن باطل س ـ ئخمّيمن نسن ݣانين وين دّونيث،
19 ؤر قّيمين ؤمژن ݣ ـ لماسيح ئݣان ئخف (ن ـ ؤݣراو ن ـ ئمومنّ ئݣان صّاحث نس). نتّا أس دا تصحو صّاحث أر تّمياماژ س ـ ثكشريرين د ـ ئسمّزداين، أر تّمغور ئمشينّا يرا ربّي.
20 ئوا مش ئد ئس ثكّام ثݣام أمّي ثمّوثم د ـ لماسيح أها ثفّغم دّاو ن ـ ثنباط ن ـ لارواح نّا لّانين ݣ ـ دّونيث أد، ماخ ألّيݣ دا تّيديرم غاس أمّي تّفارم دّونيث أد أر تضاعم لفرايض أمّ ثيد:
21 "أد ؤر تّاسي أياد، أد ؤر تّارم أياد، أد ؤر تّاژض غر أياد"؟
22 أياد كولّ دا يساوال خف ئسكّين نّا دا يتّقضون أدّاي ثن نسّخدم نغد ئثن نتّشا، نثني غاس لفرايض ن ـ بنادم د ـ ئلمّودن نس أيد ݣانث.
23 سثيتّ، ݣانث أمّي ديكسنث ثلّا ثانژي ݣ ـ دّين أد ن ـ دّرع، د ـ ؤبندق ن ـ ثحلّال، د ـ ؤمرّث ن ـ صّاحث؛ مشان ؤر واثانث شا أينّامي ؤر غينث أد تّباضنث ݣ ـ شّهواث ن ـ بنادم.