4
ئوصّاثن ن ـ بولوس ئي يايث فيليبّي
1 أيايثما د ـ ئسثما، هاثين ثعزّم غوري أها ينغي ومارݣ نّون. دا يي ثسّفراحم أها ثسبورزمي شايݣان داث ن ـ مولانا. ئوا يخصّاياون أتّزايدم أتشبّرم ئمشيد ݣ ـ مولانا أمّ ؤينّاون نّيخ أييمعزيزن ئنو.
2 دا سحوژّورخ أفوديا د ـ سينتيخي أد مساسانث ئنݣراتّسنث ئدّخ ݣانث ثين مولانا.
3 أر زّيكش تتّرخ أود شݣّين أياسمون ئنو نّاݣ دا تّامنخ أثنث ثسعاوند، هاثين ؤثنث أݣيدي ثامارا ݣ ـ ؤبرّح س ـ لينجيل، نثنثي د ـ كليماندوس د ـ وييّاض ضنين كول نّا يي يسعاونن، وينّامي تّوزمّمن ييسماون نسن ݣ ـ وارّا ن ـ ثودرث.
4 تّفراحاث كّوياسّ ئدّخ ثݣام وين مولانا، أراون تّنيخ ديخ: أوي تّفراحاث.
5 أدّجاث ميدّن كول أد ئسينين ئيس ديݣون ئلّا صّبر. هاثين ئدّجاور مولانا أدّ ياغول.
6 أد ؤر سار تّاسياث أنزݣوم ئي أود ئميقّ، ماشان تژّالّاواث ئي ربّي زݣ ثنيلا ن ـ مايد ئݣان شا، أراس تتّرم أينّاون ئخصّان كول، أر ثتّحمادم.
7 د ـ لهنا ن ـ ربّي، نّا يوݣرن أينّامي ئغي كول بنادم أث ئفرو، يدّا أد ئحضو ؤلاون نّون د ـ ئخمّيمن نّون س ـ سيدنا عيسى لماسيح.
8 ݣ ـ ثينݣيرا أيايثما د ـ ئسثما، داون تّينينخ ديما تعمّاراث لعقل نّون س ـ ؤينّا يژيلن كول د ـ ؤينّا دا يسّمغوران س ـ ربّي: س ـ ؤينّا يݣان كول لحقّ د ـ ؤينّا يواثان أوقّر، د ـ وينّا يمنان كول د ـ ؤينّا يزدّيݣن، د ـ وينّا دا يتّيري ربّي كول د ـ ؤينّا مي يژيل وادّور.
9 أها أرتݣّام س ـ ؤينّاون سقّراخ د ـ س ـ ؤينّا زّيݣي ثلمدم كول، د ـ س ـ ؤينّامي ثسلّام زّيݣي د ـ ؤينّا يي ثانّايم كول أر ثتݣاخ، د ـ ربّي نّا يݣان باب ن ـ لهنا يدّا أد ييلي ديدون.
بولوس دا يسنيمّير أيث فيليبّي خف ثرزّيفين نسن
10 هاثين فرحخ شايݣان س ـ مولانا ئدّخ ثاغولم ديخ دا تتّاويم ديݣي، أها سّنخ ئيس ؤر ئي ثتّوم، ماشان غاس ؤر ثوفيم ميمش أي ثݣّام.
11 ؤر ئيد ئيس ئي يخصّا شا أخف دا تّينيخ أياد، ئدّخ لمدخ أد عنقخ س ـ ؤينّا غوري يلّان.
12 نكّين سّنخ أد عيشخ أمّ ئخصّايي أمّ ئشايض غيفي. هاثين لمدخ أد عنقخ داكّ مايد ئݣا لحال، أمّ دّجيونخ أمّ ئنغايي لاژّ، أمّ ئشايض غيفي أمّ ئخصّايي.
13 نكّين غيخ ئي مايد ئݣان شا س ـ لماسيح نّا دا يي ياكّان ثيغيتّ.
14 واخّا أمشيسّ ئژيل ؤياد نّا ثݣام لّيݣ ثبدّام أݣيدي ݣ ـ ثمارا نو.
15 أود كونّي س ـ ئخفاون نّون أيايث فيليبّي ثلّام ثسّنم ئيد لّيݣ فّغخ زݣ ثمازيرث ن ـ ماكيدونيا ݣ ـ لوقث نّاݣ بحرا أر تبرّاحخ س ـ ئنغميسن ژيلنين، أود يان ؤݣراو ن ـ ئمومنّ نّا يي يسعاونن ݣ ـ لماصاريف ئنو غاس كونّي.
16 ئدّخ أود لّيݣ نلّيخ ݣ ثمدينث ن ـ تسالونيكي، ثوزنمينّ أينّا يي يخصّان ؤر ئيد غاس يوث ن ـ ثيلمرت ؤلا سناث.
17 ؤر ئيد ئيس داون تّينيخ أياد حما أد ئي ثاكّام، ماشان ريخ أداون ئعدّو لاجر غر ربّي.
18 دغي يلّا غوري ؤينّا يي يتقدّان أها يشايض غيفي كول، زݣّوس ؤمژخ زݣ أبافروديتوس أينّا يي دّثوزنم ؤر ئي يخصّا شا. هاثين أياد نّا يي ثوشام ئݣا أمّ شان ثوكّي ئي ربّي نّامي ثغودا رّيحث د ـ شان ثمغروصث نّا يرا أها يرضو غيفس.
19 مشثا أيد ئمقّور لعزّ ن ـ ربّي، نتّا يدّا أداون ئوش أينّاون ئخصّان كول ݣ ـ وودم ن ـ سيدنا عيسى لماسيح.
20 أداس ييلي لعزّ ئي ربّي ئݣان ئبّاثنخ أبدا ن ـ ئبيدان، أمين.
21 بلّغاث سّلام ئي وينّا ݣانين وين ربّي كول س ـ سيدنا عيسى لماسيح. أيثماثنخ نّا لّانين أݣيدي داون تبلّاغن سّلام.
22 أر غيفون تسلّامن وينّا ݣانين وين ربّي كول، لومعنّا وينّا لّانين ݣ ـ لقصر ن ـ ؤݣلّيد قايصار.
23 أد غيفون ديسوݣّز مولانا عيسى لماسيح رّحمث نّس.