4
1 أييد بابين ن ـ ئسمغان، أينّا ثݣام ئي يسمغان نّون ثݣيمث س ـ لحقّ د ـ س ـ وار ثودماوين، ثݣيم ݣ ـ لبال نّون ئد أود كونّي ئلّا غيفون يان باب نّون ݣ ـ ييݣنّا.
ئوصّاثن ئنݣّورا
2 أد ؤر بطّوياث د ـ ثژالّيتّ، راراث غورس لعقل نّون أر تحمادم ئي ربّي،
3 ثژّالّيم زݣ ثنيلا نّخ أود نوكني أداخ ئرژم ربّي لباب حما أنبرّح س ـ واوال نس خف لماسيح نّا يكّان ئݣا سّرّ. هاثين خف ؤياد أخف لّيخ ݣ ـ لحبس.
4 تژالّاياث حما أد ئغيخ أد ئسّ برّحخ أها سّفروخث ئي ميدّن ئمشينّا غيفي يلّان.
5 تّمصارافاث د ـ وينّا ؤر ݣينين زݣ ؤݣراو ن ـ ئمومنّ س ـ ثانژّي، د ـ داكّ مانيݣ ثوفام لوقث أد ؤر ثتسراحاث؟؟.
6 ئخصّا أد ياثفوض واوال نّون ديما ثيلي غيفس ثيسينث، حما أتّيسينم أتّراريم خف كّو يوكّ ئمشينّا يلاقن.
ئنغميسن ئنݣوّرا د ـ سّلاماث
7 ئنغميسن ئنو ئدّا أداون ثن ئقّيس ݣماثنخ أمعزيز تيخيكوس، ئݣان أمزيلّز ݣ ـ ئلّا لامين دا يخدّمن أݣيدي لخدمث ن ـ مولانا.
8 ؤزنخاونثينّ خف لحساب ن ـ ؤياد نّيث حما أداون ييني مايداخ ئݣا لحال أها يسهنّا يولاون نّون.
9 هاثين ؤزنخثينّ د ـ ݣماثنخ ؤنيسيموس أمعزيز ݣ ـ ئلّا لامين، ئݣان يوكّ زݣ ؤݣراو نّون. دّان أداون قّيسن مايدا يجرّون غورخ كولّ.
10 أريستارخوس أسمون ئنو ݣ ـ لحبس داون ئتبلّاغ سّلام، د ـ مارقوس نّاس ئمسن ئي برنابا، نتّا أخف أون تّرخ ياد أديسّ ثرحبم مش نيدّا غورون.
11 أر غيفون ئتسلّام أود ياشوع نّامي دا قّارن يوسطوس. زݣ ووداين نّا ؤمنّين س ـ لماسيح غاس ئرݣزن أد س ـ شراض أي دا يخدّمن أݣيدي خف ثݣلديتّ ن ـ ربّي. هاثين بدّان أݣيدي شيݣان.
12 أبافراس داون ئتبلّاغ سّلام، ئݣان يوكّ زݣ ؤݣراو نّون ئݣ ئسمغ ن ـ سيدنا عيسى لماسيح. دا غيفون ئتݣ ثامسّومانث ݣ ـ ثژيلّا نس أر ئتتّر زݣ ثنيلا نّون س ـ وول نس حما أتزݣّام أها ثيثميرم ݣ ـ ليمان نّون ؤر غورون ئتّيلي أود يان شّكّ ݣ ـ ؤينّا يرا ربّي.
13 هاثين دا يكّاث شيݣان ن ـ ثامارا ݣ ـ لخدمث غيفون د ـ خف ئمومنّ نّا لّانين ݣ ثمدينث ن ـ لاودوكيّا د ـ هيرابوليس، د ـ نكّين ݣيخ ئنيݣي خف ؤياد.
14 أسمون نّخ أمعزيز لوقا أضبيب نتّا د ـ ديماس داون تبلّاغن سّلام.
15 بلّغاث سّلام ئي أيثماثنخ ئمومنّ نّا لّانين ݣ ـ ثمدينث ݣ ـ لاودوكيّا، ثبلّغم سّلام ئي نيمفاس د ـ ؤݣراو ن ـ ئمومنّ نّا دا يتّمݣراون ݣ ـ ثدّارث نس.
16 أدّاي غيفون ثتّوقرا ثبراتّ أد، ثزّريمتّ أود ئي ؤݣراو ن ـ ئمومنّ ݣ ـ لاودوكيّا ثبدّيم غيفس أد غيفسن ثتّوقرا، ثقرام أود كونّي ثابراتّ نّاسن ؤزنخ.
17 ئنيياثاس ئي أرخيبّوس:«رار لبال نش غر لخدمث نّاس ئيش ئكلّف مولانا حما أتتشمّلد».
18 سّلام أد ؤريخاونثينّ، نكّين بولوس، س ـ ثيرّا ن ـ ؤفوس ئنو. أد ؤر ئي تتّوياث هاثين ثسّنم ئس لّيخ ݣ ـ لحبس. أداون ئوش ربّي رّحمث.