5
ئديراث ݣ ـ ؤسيدّ
1 ئوا ئدّخ ثݣام أراو ن ـ ربّي نّا غورس عزّنين، ݣاث ثامسّومانث حما أد تّݣّام أمّ نتّا.
2 ثيديرم يوث ن ـ ثودرث ئعمّرن س ـ ثايري ييمشينّا أخ ئرا لماسيح نّا غيفنخ ئوشان ثودرث نّس، ئيݣ ئخف نّس د ـ ثوكّي د ـ ثامغروصث ئي ربّي نّامي ثژيل رّيحث أها ثيعجيباس.
3 ئيد لفساد د ـ ؤينّا ؤر ئزدّيݣن كول د ـ طّمع، ؤراون ئلاق كونّي ݣانين ميدّن ن ـ ربّي أود أثنيد ثبدرم.
4 أود أينّا يݣان حشوما، د ـ ئواليون ئحياض، د ـ ثقرفيتّ ئمسخن ؤراون ئلاق أثن تّينيم؛ ماشان تّينياث غاس ئواليون نّاس تّحمادم ربّي.
5 ئخصّاياون أتّيسينم سثيتّ ئيس ؤسار ئلّي وانسا ݣ ـ ثݣلديتّ ن ـ لماسيح د ـ ثين ربّي غر ؤنّا دا يتّفسادن كول، نغد ؤنّا دا يتّݣّان أينّا ؤر ئزدّيݣن، نغد ؤنّا يݣان أضمّاع، ئدّخ هاثين ؤنّاݣ ئلّا طّمع ئݣا أمّي دا يتّعباد لاصنام.
6 أود يوكّ أد ؤر كون ئتغرّا س ـ ئواليون ؤرانين، ئدّخ خف ئسكّين أد أخف دا ديتّضار ؤطيّر ن ـ ربّي خف وينّا ثعصانين.
7 غوراون أتّاموم أݣيدسن ݣ ـ ؤينّا دا تݣّان.
8 ئدّخ أياد ئزرين ثكّام ثݣام أمّ ثالّسث، ماشان دغي ݣ ـ ثزديم د ـ مولانا ثاغولم ثݣام أمّ ؤسيدّ، ئوا ييديراث ثودرث نّا دّيوسان خف واراو ن ـ ؤسيدّ.
9 ئدّخ لغلّث ن ـ ؤسيدّ ئݣاتّ غاس ؤينّا يژيلن كول د ـ ؤينّا يمنان د ـ ؤينّا يݣان لحقّ.
10 ئوا تݣّاواث ثامسّومانث أتّيسينم أينّا دا يتّيري مولانا.
11 أد ؤر تّامّوياث ݣ ـ لافعايل ن ـ أيث ثيلّاس ݣ ـ ؤر ئلّي نّفع؛ ماشان ئخصّاياون أتسنعثم ئي ميدّن ئيس ئخّا ؤينّا دا تݣّان.
12 ئدّخ أينّا دا تݣّان س ـ ثوفرا، حشوما أود أثيد ئبدر شا.
13 ماشان ئسكّين كول نّا خف ياغ ؤسيدّ دا تّبايانن ماتّا نثني؛
14 ئدّخ كول أينّا دا يتّبايانن ئݣا أسيدّ، أياد أخف ئتيينّا:
"أونّا يݣّن فافاد،
ثكّرددّ زݣ لموث،
داي يدّا لماسيح أد غيفش ديسيدّ".
15 ئوا راراث ثاغضفث نّون عنوݣا ئي وينّا دا تݣّام ݣ ـ ثودرث نّون، أد ؤر تݣاواث ئحياض ماشان ݣاث ؤنژّيژن،
16 داكّ مانيݣ ثوفام أتݣيم أينّا يژيلن ثݣيمث، ئدّخ هاثين ثخّا لوقث.
17 ئوا أد ؤر تݣّاواث أود ئميقّ س ـ وار أخمّم، ماشان ئسيناث مايد ئرا مولانا.
18 أد ؤر سّاواث شّراب أرد ثفّغم ئخفاون نّون، ئدّخ ؤفوغ ن ـ ئخف س ـ شّراب ئدّا أكون ياوي س ـ أرواس؛ ماشان أدّجاث رّوح ن ـ ربّي أكون ئعمّر،
19 أر تّمّزعيمم ئنݣراثون س ـ ئواليون ن ـ ژّابور، د ـ ثيفرين د ـ ثمديازين نّا دا سمغورنين س ـ ربّي؛ أر تهلّالم، أر تنشّادم ئي مولانا س ـ وولاون نّون.
20 أرتّحمادم أبدا ئي ربّي يݣان ئبّاثنخ خف مايد ئݣان شا س ـ ييسم ن ـ مولانا نّخ عيسى لماسيح.
ثيوثمين د ـ ئرݣزن نسنث
21 ئخصّاياون أتمّسّغادم ئنݣراثون حما أتّسنعثم ئيس دا ثسّمغورم س ـ لماسيح.
22 أثيوثمين، ئخصّاياكونث أد تسّغادمث ئي ئرݣزن نكونث ئدّخ س ـ ؤياد دا توقّارمث مولانا،
23 ئدّخ أرݣاز أيد ئݣان ئخف ن ـ ثمطّوط نّس ئمشينّا يݣا أود لماسيح ئخف ن ـ ؤݣراو ن ـ ئمومنّ؛ د ـ نتّا س ـ ئخف نّس أيد ئݣان أمفوكّو ن ـ ؤݣراو ن ـ ئمومنّ ئݣان صّاحث نّس.
24 داي ييمشينّا دا يسّغاد ؤݣراو ن ـ ئمومنّ ئي لماسيح، ئخصّاياصنث أود ئي ثوثمين أد سّغادنث ئي ئرݣزن نسنث ݣ ـ مايد ئݣان شا.
25 أييرݣزن، ئخصّاياون أد تّيريم ثيوثمين نّون ئمشينّا يرا لماسيح أݣراو ن ـ ئمومنّ أها يوش ثودرث نّس غيفس،
26 داي يسثيث ئݣيث د ـ وين ربّي فّير ن ـ مايد ثيزّديݣ س ـ وامان د ـ واوال ن ـ ربّي،
27 ئݣا أياد حما أدّياوي ئي يخف نّس أݣراو ن ـ ئمومنّ ئݣا أمّ شان ثسليتّ ئغودان، ئزدّيݣن، ئݣان ثين ربّي ݣ ـ ؤر ئلّي أود يان لعيب ؤلا شا نّا ؤر ئحلين داكّ ماتّا نتّا.
28 أمّ وامشيد أيداسن ئخصّا أود ئي يرݣزن أد ئرين ثيوثمين نسن أكيسّ دا تّيرين صّواحاث نسن. كول ونّا دا يتّيرين ثامطّوط نّس، ئخف نّس أي دا يتّيري.
29 هاثين ؤر دجّين ئلّي ونّا ؤر ئحميلن صّاحث نّس، ماشان داس ياكّا ؤتّشي أر ديكس ئتنهلّا، ئمشينّا دا يتنهلّا أود لماسيح ݣ ـ ؤݣراو ن ـ ئمومنّ.
30 ئدّخ كول نّخ نݣا زݣ صّاحث نّس.
31 ئمشينّا دا يتّيني ربّي ݣ ـ لشثاب نّس: a «أياد أخف دا يتّادجا ورݣاز ئبّاس د ـ مايس أها يمّزداي د ـ ثمطّوط نّس، أغولن سّينّ نسن ݣين يوث ن ـ صّاحث».
32 ئواليون أد نّا بحرا نّيخ خف لماسيح د ـ ؤݣراو ن ـ ئمومنّ ديكسن يان لمعنا اخاثار ئنثلن.
33 ئوا أود كونّي، كّو يوكّ ديݣون ئخصّاياص أد ئتّيري ثامطّوط نّس أمّ ئخف نّس؛ ئيد ثامطّوط ئخصّاياص أد تّوقّار أرݣاز نّس.