4
ثامونتّ ݣ ـ لماسيح
1 ئوا خف ؤياد كول داون تدمّامخ، نكّين ئݣان أحبّاس خف مولانا، أد تݣّام أينّا ثواثا ثودرث نّا غر أون ئغرا ربّي،
2 ؤر ثسخاثارم س ـ ئخفاون نّون، ثوهينم د ـ ميدّن، ثسّوسيعم لخاضر نّون د ـ وييّاض، أها ثمساعافم ئنݣراثون س ـ ثايري.
3 ݣاث ثامسّومانث أتّقّيميم ثمونم س ـ رّوح ن ـ ربّي، هاثين نتّا أي كون ئزدين س ـ لهنا نّا يݣا ئنݣراثون.
4 هاثين كونّي ثݣام أمّ يان صّاحث، ييلي ديݣون يان رّوح ن ـ ربّي، ئمشينّا ئكون ئسثي ربّي أود أد غورون ييلي يان رّجا،
5 يان مولانا أيد غورون ئلّان، د ـ يان ليمان، د ـ يان لغاراض أخف ثتّوغبّزم ݣ ـ وامان،
6 ييلي غورون يان ربّي ئݣّان ئبّاثنخ كول نّخ، دا يتّنباضن خف مايد ئلّان، أر ئخدّم ݣ ـ مايد ئلّان، أها ييلي ݣ ـ مايد ئلّان.
7 ماشان كّو يوكّ ديݣنخ يومژ أمور نّس نّا ثيد يوسان زݣ ثوكّي ن ـ ربّي ئمشينّا تّيبضا لماسيح.
8 أينّا خف دا يتّيني لشثاب ن ـ ربّي: a
«لّيݣ يولي سافلّا،
ئحري شايݣان ن ـ وينّا تّوامژنين،
أها يوش ثوكّيوين ئي ميدّن.»
9 ئي مايد ئݣان "يولي": غاس ئيس ئكّا يضرد أود غر سادّا س ـ أشال،
10 د ـ وادّخ نّا يضرن، نتّا س ـ ئخف نّس أيد يولين أود غر نّيݣ ن ـ ئݣنوان كول حما أد ئعمّر مايد ئلّان كول.
11 نتّا أيد ئوشان ئي ييتس أد ݣين ئمازانّ، د ـ ييتس أد سوالن س ـ ؤينّاسن ئسنعث ربّي، د ـ ييتس ضنين أد تبرّاحن س ـ ئنغميسن ژيلنين ن ـ لينجيل، د ـ وييّاض أد ݣين ئنبداد ن ـ ئݣراون ن ـ ئمومنّ ݣين ئسّلمادن نسن.
12 ئݣا أياد حما أد ئسّوجد ميدّن ن ـ ربّي ئي لخدمث نّس، ئمغور ؤݣراو ن ـ ئمومنّ ئݣان صّاحث ن ـ لماسيح أها يصحو،
13 أرد ناغول كول نّخ نݣا يوكّ ݣ ـ ليمان د ـ ݣ ـ ثوسنا ن ـ ممّيس ن ـ ربّي، أها نزايد أنثمير أرد نݣ ميدّن نّا شمّلين غاس أمّ لماسيح.
14 حما ؤر نتّغيما نݣا أمّ ئشيرّان أداخ ݣّارنث ثمزازين، أراخ ئحرّي ؤزوو ن ـ ميدّن نّا دا سّلمادنين ثيحلّال حما أد ݣّين ثاخندالّاسث ئي ميدّن أثن غرّان سّوفّغنثن ئي وبريد ن ـ ربّي.
15 ماشان ئلّا غيفنخ أنتبرّاح س ـ لحقّ س ـ ثايري، داي نمغور ݣ ـ مايد ئݣان شا أرد نݣ أمّ لماسيح نّا يݣان ئخف ن ـ ؤݣراو ن ـ ئمومنّ.
16 ئدّخ نتّا أس دا تّمياماژ صّاحث كول نّس أها ثميانّاض س ـ لمفاصيل، كّو لمفصل دا يتݣّا لخدمث نّس حما أد تّمغور صّاحث أها ثصحو س ـ ثايري.
أراو ن ـ ؤسيدّ
17 داي س ـ ثنباطّ نّا يي يوشا مولانا داون تّينيخ أد ؤر سار تّثفاراث أبريد ن ـ ميدّن نّا ؤر دا تّامنّين س ـ ربّي، وينّا دا تخمّامنين غاس ݣ ـ ئسكّينّ نّا يورانين.
18 سّولّسن وانّليثن نسن، بعدن خف ثودرث نّا دا ياكّا ربّي ئدّخ ؤر سّينن شا س ـ ثاغارث ن ـ وولاون نسن.
19 ؤر ديكسن ئقّيمي لحيا، داي وشينتّ ئي مايد ئݣان لفساد أها ؤر دا تّعناقن كول زݣ ؤينّا يݣان لعيب.
20 ئيد كونّي، ؤر ئيد أمّ ؤياد أي ثلمدم خف لماسيح،
21 مش ثسّغدم سثيتّ خف سيدنا عيسى، أها يتّوسّلمداون غيفس لحقّ نّا ديكس ئلّان.
22 ئخصّاياون أتحيدم ئي لافعايل ؤر حلينين نّا ثكّام أر تݣّام، ثكّسم بنادم أقديم نّا سخسرنث شّهواث نّا تغرّانين.
23 أدّجاث ربّي أد ئبدّل ؤلاون نّون د ـ لاعقّول نّون ئݣيثن د ـ ؤجديدن،
24 ثلسيم بنادم ؤجديد ئمشينّا ثيخلق ربّي يرويسث أها يمنو ئيݣ وينس سثيتّ.
25 ئوا كّساث زّيݣون ثيحلّال، أر تّميينيم لمعقول ئنݣراثون ئدّخ كول نّخ نݣا زݣ يوث ن ـ صّاحث.
26 داي مش أون ئطيّر، أد ؤر تݣّاواث لمعصيث. أد ؤر غيفون ثغلّي ثافوشث د ـ كونّي ثسولم ئطيّراون.
27 أد ؤر تّادّجاواث ئي شّيطان أبريد نّا زݣ أون ديتكّا حما أكون ئسّخضو.
28 ؤنّا دّيوفا لحال ئݣا أخوّان، ئخصّاياس أد ؤر سار ئتّاشر؛ ماشان ئخصّاياص أد ئوّث ثامارا س ـ ئفاسّن نّس أها يرارد س ـ ثغراض نّس أينّاس ئتّعيش، حما أد ييغي أد ئسعاون وينّا ييوض لحال.
29 أد ؤر ديتفّغ زݣ ئقما نّون أود يان واوال نّا ؤر ئحلين، ماشان غاس أوال نّا يژيلن نّا يسعاوانن ميدّن ئمشينّا حدادّجان أها يݣ لباراكا ئي وينّا دا غورس سّغادنين.
30 أد ؤر ثسنّيرياث ئي رّوح ن ـ ربّي، هاثين نتّا أيد ئݣان ثاماثارث ن ـ ئيس ثݣام وين ربّي أر أسّ نّاݣ ئكون ئتفوكّا زݣ لمعصيّاث نّون كول.
31 كّساث لحرّ زݣ وولاون نّون، ثكّسم زّيݣون أزعاف د ـ ؤطيّر د ـ ئغويّان د ـ ثرݣّام، د ـ ؤينّا يخّان كول.
32 ماشان مييژيلاث ئنݣراثون أر تميوݣّام ثاسا، أر تمساماحم ئنݣراثون ئمشينّا أون ئسامح ربّي س ـ لماسيح.