3
ربّي ئسثي بولوس ئي لخدمث نّس
1 نكّين بولوس لّيخ ݣ ـ لحبس ئدّخ داون تبرّاحخ س ـ ئنغميسن ژيلنين خف لماسيح كونّي أوينّا ؤر ݣينين ؤداين.
2 ثلّاكونينّ ثسلّام ماتّا لخدمث ثاخاثارث نّا يي يوشا ربّي غيفون ئدّخ ديݣي يحنّا.
3 أها يسنعثي أينّا يعوّل أد ئيݣ نّا ؤر دّجين ئسنعيث ئي أود يوكّ داث ن ـ ؤياد. هاثين أريخاوننّ ݣ ـ ثيزويري ن ـ ثبراتّ أد شا يدروسن خف ؤياد،
4 داي أدّاي ثقّرام أياد نّا ياريخ، ثدّام أتّيغيم أتّفروم ئيس سّنخ خف لماسيح ئسكّين نّا ؤر ئسّين أود يوكّ.
5 أياد نّا يفّرن ؤر ثيسنعيث ربّي ئي ياود يوكّ ݣ ـ زّماناث نّا زرينين؛ ماشان ئسنعتّ دغي س ـ رّوح نّس ئي وينّا يسثي، ئي يمازانّ نّس د ـ ئي وينّا دا ساوالنين س ـ وينّاسن ئسنعث.
6 د ـ ؤياد نّا ؤر ئسنعيث ئي أود يوكّ نتّا أياد: ئدّخ زدين د ـ لماسيح، دّان وينّا ؤر ݣينين ؤداين أد أمّون د ـ ووداين ݣ ـ ثكاسوتّ ݣين أمّ يان صّاحث، ييلي غورسن ؤمور كول نسن ݣ ـ ؤينّا يقّاول ربّي س ـ لفضل ن ـ ئنغميسن ژيلنين.
7 نكّين أغولخ ݣيخ أنبداد ن ـ ئنغميسن أد ژيلنين، أد ئسّن تبرّاحخ س ـ لفضل نّس د ـ ثيغيتّ نّس.
8 داي مغار كّيخ دّاو ن ـ ئنادّاثن ݣ ميدّن ن ـ ربّي كول، ئرضا غيفي حما أد تبرّاحخ ئي وينّا ؤر ݣينين ؤداين س ـ لخير ن ـ لماسيح نّا ؤر ئلين لحدّ،
9 أها سّفروخ ئي ميدّن كول أينّا يعوّل ربّي أد ئيݣ، نّا يخلقن مايد ئݣان شا. ؤر دّجين ئسنعيث أياد ئي أيث زّماناث نّا زرينين.
10 ماشان دغي، س ـ ؤݣراو ن ـ ئمومنّ، دّان ئنمغورّ د ـ ئنبّاضن ن ـ ثݣلديتّ ن ـ ييݣنّا أد ئسينن ثانژّي ن ـ ربّي ݣ ـ مايد ئݣان شا.
11 أها يݣّيث س ـ سيدنا عيسى لماسيح مولانا نّخ ئمشينّا يزمّم زݣ ثيزويري.
12 داي ئدّخ نزدي د ـ لماسيح أها نامنّ ئيسّ، نغي أنتّوجي غر ربّي أها نزعم ؤر نتݣّد شا.
13 أياد أخف دا زّيݣون تتّرخ أد ؤر تدهيشم س ـ ثماريوين نّا دا غيفي ئتكّان غيفون، ئدّخ ݣ ـ ثينݣيرا أداوند أدّجينث لعزّ.
ثژالّيتّ ن ـ بولوس زݣ ثنيلا ن ـ أيث أفاسوس
14 خف ؤياد أخف ؤثخ خف ئفادّن ئنو أر تبنداقخ ئي ربّي يبّاثنخ،
15 نّا زݣ دا ديتكّا ييسم أرصلي ن ـ ئخامن كول ݣ ـ ئݣنوان د ـ خف واشال،
16 أر زّيكس تتّرخ أد ئصّحو شايݣان ئمان نّون س ـ رّوح نّس منيد ن ـ لباراكاث نّس نّا يعدّان شايݣان،
17 حما أد ئزدغ لماسيح ݣ ـ وولاون نّون س ـ ليمان نّون ئيسّ. داي أدّاي ثݣيم ئژوران ݣ ـ ثايري أها ثزݣّام ديكس،
18 أتّيغيم أتّفروم كونّي د ـ وينّا يسثي ربّي كول مشثا أي ثلا ثايري ن ـ لماسيح ݣ ـ ثيروث د ـ ثاغزي د ـ ثيدّي د ـ ثيغبي.
19 أها ثيسينم ثايري ن ـ لماسيح يوݣرن مايد ئݣان ثوسنا، داي ثعمّرم س ـ ؤينّا يلّان ݣ ـ ربّي كول.