2
ثودرث ثوجديتّ س ـ لماسيح
1 د ـ كونّي ثكّام ثݣام أمّي ثمّوثم س ـ دّنوب نّون د ـ لمعصيّاث نّون،
2 نّاݣ أر تّيديرم أياد ئزرين، تّفارم ݣار أبريد أمّ أيث دّونيث كول، أر تّضاعم شّيطان ئݣان أنمغور ن ـ وادّجنونّ ئنݣر ن ـ ييݣنّا د ـ واشال، نتّا أيد ئݣان رّوح نّا دا يتّباضن دغي ݣ ـ وينّا عصانين ربّي.
3 أود نوكّني نكّا كول نّخ نݣا أمّ نيثني أر نتّثفار شّهواث ن ـ دّونيث، أر نتݣّا أينّا ران وولاون نّخ د ـ ؤينّاخ نّان ئخفاون نّخ. داي ئدّخ دنكّوسا لمعصيث لّيݣ دّنلولا أمّ ميدّن كول، نسطيّراث ئي ربّي أها نواثا لعيقاب نّس أمّ وييّاض كول.
4 ماشان ربّي رّحمث نّس ؤر ثلي لحدّ، داي ئدّخ داخ ئتّيري شايݣان،
5 ئوشاياخ ثودرث د ـ لماسيح مغار نكّا نݣا أمّي نمّوث س ـ لمعصيّاث نّخ. هاثين ثاسا ن ـ ربّي أس ثتّوفوكّام.
6 داي ئدّخ نݣا وين لماسيح، ئسكّراخدّ ربّي زݣ لموث أݣيدس أها يسغيماخ أننبض أݣيدس ݣ ـ ثݣلديتّ ن ـ ييݣنّا.
7 أياد ئݣاث ربّي حما أداسن ئسنعث ئي يايث زّماناث نّا ددّانين رّحمث نّس ثار لحدّ س ـ ثاسا نّاخ ئݣا س ـ سيدنا عيسى لماسيح.
8 هاثين رّحمث ن ـ ربّي أس ثتّفوكّام ئدّخ ئيسّ ثومنم. ؤرئيد خف ؤينّا ثݣام أخف ثومژم أفوكّا ياد، ماشان غاس ئوشاياونث ربّي.
9 ؤر ئيد خف لاعمال نّون، حما أود يوكّ ؤر ئتعنّا س ـ ئخف نّس.
10 ئدّخ نوكّني لخدمث ن ـ ؤفوس ن ـ ربّي أي نݣا، ئوشاخ ثودرث ثوجديتّ س ـ سيدنا عيسى لماسيح حما أنتݣّا لافعايل ژيلنين نّامي يحبّل ياد زݣ واهوّا حما أثن نتݣّا.
ئمومنّ كول ݣان يوكّ ݣ ـ لماسيح
11 كونّي نّا ؤر ئݣين ؤداين زݣ لاصل، كّان ووداين مشثا أياد أر غيفون تّينين ثݣام "أيث وار أزݣّن"، أر تعنّان س ـ ئخفاون نسن أر تّينين ݣان "أيث ؤزݣن"، مغار دا يتّوݣا وزݣّن غاس س ـ ؤفوس ݣ ـ صّاحث ن ـ بنادم. ئوا شثيياث
12 ئيس ثكّام لوقث نّا ؤر ثسّينم لماسيح، ؤر ثݣيم زݣ أيث إسرائيل أها ؤر ثامّوم ݣ ـ ؤينّاسن ئقّاول ربّي ݣ ـ ثاضيوين نّا يميوݣّا أݣيدسن، ثكّام أر تّيديرم ݣ ـ دّونيث ؤر غورون ئلّي رّجا ؤلا ثسّنم ربّي.
13 ماشان دغي ݣ ـ ثݣام وين سيدنا عيسى لماسيح، كونّي نّا يكّان مشثا أياد ثبعدماس ئي ربّي ثاغولم ثقرّبماس س ـ لموث ن ـ لماسيح خف ئحنيݣن ن ـ ؤطّورق.
14 ئدّخ نتّا أيد ئݣان لهنا ينݣراخ نوكني ؤداين د ـ كونّي نّا ؤر ثن ئݣين، أها يسمساسا ينݣراخ ئݣاخ د ـ يوكّ، ئكّس أݣادير ن ـ لعداوث نّاخ ئبضان. س ـ لموث نّس،
15 ئكّس لوصييّاث د ـ ثنباضين ن ـ شّرع ن ـ ووداين حما أد ئسمون ؤداين د ـ وينّا ؤر ثن ݣينين أد ݣين يان لݣنس ؤجديد ئݣان وينس، ييلي لهنا ينݣراتسن.
16 ئسمّعدالثن د ـ ربّي، ئݣّيثن د ـ يوكّ أها يكّس لعداوث نّا يلّان ئنݣراتسن س ـ لموث نّس خف ئحنيݣن ن ـ ؤطّورق.
17 هاثين ئدّاد ئبرّحاون س ـ ئنغميسن ژيلنين خف لهنا كونّي نّا ؤر ݣينين ؤداين نّا يكّان ثبعدماس ئي ربّي، ئبّرحاخ أود نوكني ؤداين نّا يكّان نقرّباس.
18 هاثين س ـ لماسيح أس نغي كول نّخ أنتّوحي غر ربّي يبّاثنخ س ـ رّوح نّس ئݣان يوكّ.
19 خف ؤياد، كونّي نّا ؤر ݣينين ؤداين ؤر ياد ثقّيميم ثݣام أمّ ئبرّانين نغد أمّ ئغريبن؛ ماشان ثاغولم ثݣام يوكّ د ـ ميدّن ن ـ ربّي أمّي ثݣام زݣ يوث ن ـ ثمازيرث، أها ثݣيم زݣ أيث ؤخام ن ـ ربّي.
20 كونّي ثݣام أمّ شان ثادّارث، ئمازانّ د ـ لانبيا أيد ݣان لّساس نّس، ئيݣ سيدنا عيسى لماسيح س ـ ئخف نّس أژرو ن ـ ثغمرث نّس.
21 نتّا أس دا يتّمزداي لبني س ـ ماس ئلّا أها أر ئتّالي حما أد ئيݣ يوث ثادّارث ئزدّيݣن ئتّوسثين ئي مولانا.
22 ئدّخ ثزديم د ـ لماسيح، ثامّوم أود كونّي ݣ ـ لبني ياد حما أتّݣيم كول نّون يوث ن ـ ثدّارث نّاݣ ئزدّغ ربّي س ـ رّوح نّس.