ثابراتّ ن ـ ؤمازان بولوس ئي يمومنّ ن ـ ثمدينث ن ـ أفاسوس
1
سّلام ن ـ بولوس
1 ثابراتّ أد زّيݣي نكّين بولوس، ئݣان أمازان ن ـ سيدنا عيسى لماسيح ئمشينّا يرا ربّي، أريخاونتّين أوينّا ݣانين وين ربّي نّا لّانين ݣ ـ ثمدينث ن ـ أفاسوس، a كونّي نّا يقّيمان ݣ ـ ليمان نّون س ـ سيدنا عيسى لماسيح أر أسّا.
2 أداون ئوش ربّي يبّاثنخ د ـ مولانا عيسى لماسيح رّحمث د ـ لهنا.
لباراكاث نّا داخ ياكّا ربّي ئدّخ نزدي د ـ لماسيح
3 أنبارش أيد ئݣا ربّي يبّاس ن ـ مولانا نّخ عيسى لماسيح، نّاخ ئوشان مايد ئݣان لباراكاث ن ـ رّوح نّس نّا لّانين ݣ ـ ئݣنوان ئدّخ نزدي د ـ لماسيح.
4 أود لّيݣ ئسول ألّثو ؤر ئخليق دّونيث، ئسثيياخ س ـ لماسيح حما أنݣ وينس، ؤر ديݣنخ ئتّيلي أود يان لعيب منيداس. ݣ ـ ثايري نّس،
5 يوفاثيد لحال ئزمّم زݣ ثيزويري أداخ ئيݣ د ـ أراو نّس س ـ سيدنا عيسى لماسيح، ئدّخ أياد أيد ئرا س ـ لخاضر نّس أد ئيݣ،
6 حما أثنتّحماد خف رّحمث نّس ئݣان لعجب نّاخ ئݣا س ـ شايݣان ݣ ـ وودم ن ـ لماسيح نّا غورس ئعزّين.
7 نتّا أيد غيفنخ ئوشان دّيث س ـ ئدامّن نّس أها يغفراخ لمعصيّاث نّخ. س ـ ؤياد، ئسنعثاع ربّي رّحمث نّس ؤر ئلين لحدّ
8 نّاس أخ ئغمس، ئسمونتّيد د ـ مايد ئݣان ثانژّي د ـ لفهم.
9 ئسنعثاخ أينّا يعوّل أد ئيݣ نّا ؤر ئسنعيث ألثو ئي ياود يوكّ، ئمشينّا يرا س ـ لخاضر نّس أثيݣ س ـ لماسيح.
10 حما أدّاي ثاوض لوقث نّا يزمّم، أد ئسمون أينّا يلّان كول ݣ ـ ئݣنوان د ـ واشال دّاو ن ـ ثنباطّ ن ـ لماسيح.
11 داي ئدّخ نݣا وين لماسيح ئسثياخ ألثو أنامژ أينّاخ ئقّاول ئمشينّا يزمّم زݣ ثيزويري. نتّا دا يتݣّا أينّا خف ئعوّل كول س ـ ييمشينّا يرا.
12 ئݣا ربّي أياد حما أنسّمغورا س ـ وادّور نّس، نوكنّي نّا يݣان ديمزوورا رّجا نّخ ݣ ـ لماسيح.
13 أود كونّي، لّيݣ ثسّغدم ئي واوال ن ـ لحقّ، ئي ينغميسن ژيلنين نّاݣ أون ئلّا وفوكّا، ثومنم س ـ لماسيح؛ داي يݣ غيفون ربّي ثاماثارث ن ـ ئيس ثݣام وينس لّيݣ أون ئوشا رّوح نّس نّا يقّاول.
14 رّوح ن ـ ربّي أيد ئݣان لعربون ن ـ ئيس ندّا أنامژ أيناخ ئقّاول ربّي، أرد ئفوكّا وينّا ݣانين وينس كول حما أثنتمجّاد خف لعزّ نّس.
ثاژالّيتّ ن ـ بولوس
15 هاثين ئتّوقيسي خف ليمان نّون س ـ سيدنا عيسى د ـ خف ثايري نّون ئي يمومنّ كول، أينّا خف مي
16 دا تّحمادخ ئي ربّي غيفون أبدا، د ـ داكّ مانيݣ ژّولّيخ دا كونيد بدّرخ،
17 أر تتّرخ زݣ ربّي ن ـ مولانا نّخ عيسى لماسيح، ربّي يݣان باب ن ـ لعزّ، أداون ئوش رّوح نّس، نّا غاون ئوشين ثانژّي أها يسنعثاون مايد ئمس حما أتّيسينم سثيتّ.
18 أها يرژم ؤلاون نّون حما أتّيسينم ماتّا رّجا نّا غر أون ئغرا، د ـ ماتّا لباراكاث عدّانين نّا يقّاول أثنث ئوش ئي ميدّن نّس،
19 ثيسينم ماتّا ثيغيتّ نّس ثاخاثارث نّا يوݣرن مايد ئݣان شا، نّا دا يسّخدام غيفنخ نوكني ييمومنّ. ثيغيتّ أد نّس نّيث ثاخاثارث
20 أس ديسكّر ربّي لماسيح زݣ لموث، أها يسغيمث خف ؤفاسي نّس ݣ ـ ئݣنوان،
21 داي يكّد نيݣ ن ـ مايد ئݣّان ئخاثارن د ـ مايد ئݣان ئنبّاضن د ـ مايد ئݣّان ئنمغورن نّا ؤر دا نتّانّاي د ـ وينّا غر ثلّا شان ثنباطّ كول، ئسّمغور ثانباطّ نّس خف مايد ئݣان ثانباطّ نّا يلّان ؤر ئيد غاس دغي ماشان أود ݣ زّمان نّا دّيتدّون.
22 أها يݣ ربّي مايد ئݣان شا دّاو ن ـ ئضارّ ن ـ لماسيح، ئݣيث د ـ ئخف ن ـ ؤݣراو ن ـ ئمومنّ ييلي نّيݣ مايد ئݣّان شا.
23 أݣراو ن ـ ئمومنّ أيد ئݣان صّاحث ن ـ لماسيح، لماسيح أي دا ثيتشمّالن أر ئتشمّال مايد ئݣان شا ݣ ـ مايد ئݣان أنسا.