ثابراتّ ن ـ ؤمازان بولوس ئي يمومنّ ن ـ ثمازيرث ن ـ غلاطية
1
سّلام
1 زݣ بولس: نّا ئݣان أمازان ؤر-ئد س تنباطّ ن ميدّن ؤلا س لامر ن شان بنادم، والاينّي س لامر ن عيسى لمسيح د ربّي ئبّاتنخ نّا ثيد ئسكّر زݣ ئنݣر ئمتين.
2 د زݣ كول أيثما ئمومن نّا ئلاّن ئدي داد، يي لكنايس نّا ئلاّن ݣ ثمازيرث ن غلاطيّا.
3 دا تتّرخ يي ربّي ئباتنخ د مولانا عيسى لمسيح أداون وشين نّعمت د لهنا.
4 نّا ئشان تودرت نّس خف دّنوب نخ، حما أد-اخ ئسّوفغ زݣ دّونيثا نّا ؤر-يحلين ئمشينا ئرا ربي ئݣان بّاتنخ،
5 نا غر ئلا لعزّ أبدا، آمين.
6 هان ربي ئغراون غر نّعمت ن لمسيح، خف ؤياد تعجبخ شيكان دزربم فيمرا تسامحم ديكس حما أت تامنم س لينجيل ياضن
7 ستيت ؤر ئيلّي شان لينجيل ياضن، ولاينّي لاّن شان ميدّن دا كن زلاّن ران أد بدّلن لينجيل ن لمسيح.
8 والاينّي مش كون ئبشّر شا ن يون، واخّا نكني نغد شا ن لملاك زݣ ئݣنّا، س ووال ياضن ئخالفن لينجيل نّاس كون نبشّر، ئدّا أد-ئتونعل.
9 نكني ننّاياون ياد أوالاد أر ت نتعاواد ألتو: مش ئلا شا ن يون ئتبشّارن س لينجيل ئخالفن ونّا ثقبلم ئدا أد-ئتونعل.
10 ئد دغي مامي تݣخ لخاضر ئد يي ميدّن ماد يي ربي؟ ماد لا سّوتورخ أد يخ لخاضر يي ميدن؟ مش سولخ دا تݣخ لخاضر يي ميدّن، هاثين ؤر ييخ أخدّام ن لمسيح.
11 ريخكن أت تّسينم أيايتما لينجيل نّا س كون بشّرخ ؤر ديدّي زݣ مدّن.
12 ؤلا ييوضييد زݣ شا ن بنادم ؤلا غريخت غر شا، والاينّي عيسى لمسيح أيد تيد ئسباين.
13 كنّي تسلام خف تودرت ئنو، زݣ قبل كّيخ أر ت تفارخ دّين ن ووداين، أر تعدّاخ شيݣان خف لكنايس ن ربّي أر تن خلّوخ.
14 ئليخ تفارخ دّين ن ووداين ؤݣار ن ووداين نّا ݣّان ئقرين ئنو ݣ لعمر، تيلي دييّي لغيرا ؤيار نّسن خف لعادات ن لاجدود ئنو.
15 والاينّي ربّي ئختارييي زݣ ماي لّيخ ݣّ ؤعدّاس ن مّانو، أها ئغراييي غر نّعمت نّس أت تخدمخ، ئتّخ ئرا،
16 ئسباينيي ممّيس حما أد سيولخ غيفس يي لݣنوس نّا ؤر-ئݣين ؤداين، هاتين ؤر مشوارخ د-أود يون.
17 ؤر دّيخ غر تمدينت ن لقدس أد مشاوارخ د-ئمازان نّا يي ئزوورن، والاينّي دّيخ غر تمازيرت ن واعرابن، فّير ن-ؤينّا عايدخد غر تمدينت ن دمشق.
18 داي فّير ن شراض ن-ئسݣّاسن، دّيخ غر لقدس حما أد ميوسّانخ د بطرس، قّميخ غورس خمسطّاعش ن واسّ.
19 والاينّي ؤر أنّايخ أود يون زݣ ئمازان ياضن غاس يعقوب ئماس ن مولانا زݣ مريم د يوسف.
20 أينّا داون تّاروخ ئݣا لحقّ، أها أر تݣالّاخ دات ن ربّي ئس ؤر دا سحيلّيلخ.