2
1 داي فّير ن ربطاعش ن-ؤسݣّاس، عايدخ لمرت ياضن نكّ د برنابا غر تمدينت ن لقدس، أويخ ئدي أود ؤماتنخ تيطوس.
2 دّيخ س سّباب ن ؤينّا يي ئسباين ربّي ݣ يوت ن توارݣيت. جمعخ غاس نكّ د شا ن-أيتما نّا غر تلاّ تنباط ݣ لكانيسا، مسوالخ أݣّيدسن خف لينجيل نّا س تبشّارخ لݣنوس نّا ؤر-ئݣين ؤداين، حما ؤر تدّو لخدمت نّا ݣيخ د تنّا تݣّاخ دغي باطل.
3 ئد تيطوس أسمون ئنو نّا ئݣان زݣ أيت ليونان، أود يون ؤر-اس ئݣي درع أد ئزيّن.
4 واخّا كشمن شا ن-أيتماتنخ ئد بويحلال ݣ وامّاس نّخ س ؤخزّون، ران أد-سخصرن لحريا نّاخ د ييوي عيسى لمسيح، أها رارناخ أنݣ ئسمغان ن شّرع ن موسى.
5 ؤر دّجين أسن نسّغد أود يوت ن تاساعت، حما أد-ئقّيم واوال ن لينجيل ئصحا غورون.
6 ئد وينّا تحسابنين ئخفاون نّسن ئس ئخاتر وادّور نّسن، ؤر دا يي تهمّان ماتّا نيتني، ئتخ ربّي ؤر دا ئتݣّا تودماوين، داي ؤر ؤفين ماي زايدن خف ؤينّا س تبشّارخ.
7 والاينّي أنّاين ئس يي ئشفا ربّي تانباط أد بشّرخ س لينجيل يي لݣنوس نّا ؤر ئزيّين، أمشينّا ئشفا تانباط يي بطرس أد-ئس ئبشّر ووداين.
8 ئتخ ربّي نّا ئݣان بطرس د-امازان غر ووداين، نتا أيي ئݣان د-امازان غرلݣنوس نّا ؤر ݣينين ؤداين.
9 داي ألّيݣ ئسّن يعقوب د بطرس د يوحنّا، نّا ئݣّان ئخاتارن لكانيسا، ئس ئنعم ربّي غفي أد بشّرخ س لينجيل، داي سلمن خف برنابا د غيفي س-ؤفوس أفاسي، تاد أݣّان تاماتارت ئس نمسفهام أنشّار لخدمت، نكني أندّو أد نبشّر لݣنوس ؤر ݣيّين ؤداين ئد نيتني أد دّون أد بشّرن ؤداين.
10 د-ؤينّا زّيݣنخ تّرن كول، ؤر نتتّو أد نعاون ئمژلاض، د-ؤياد أيد ريخ أد ݣخ أود نكّ زݣ ؤل ئنو.
11 ولاينّي ألّيݣ ديدّا بطرس غر تمدينت ن أنطاكيا، لامّاخت ݣ ؤدم نّس ئتّخ ئخضا:
12 ݣ-ؤمزوارو أر ئتتّا د-ئمومن نّا ؤر ئݣين ؤداين، مشان لّيݣ ددّان شان ئرݣزن زݣ يعقوب ممّيس ن زبدي، ئبدّ زݣ ؤتشي، ئدّخ ئݣّد زݣ ئمومن نّا ئݣان ؤداين.
13 أها أمون أݣّيدس ئمومن نّا ئݣان زݣ ؤداين ݣ-ؤينّا ئݣا، أود برنابا س-ئخف نّس سخضونت س نّيفاق نّسن.
14 ألّيݣ تن أنّايخ ؤر دا تدّون ݣ-ؤبريد ئصفان ئمشينّا ئتّيني ؤبشّر ن مولانا نّخ، نّيغاس يي بطرس دات ن ميدن كول: «ئوا مش تݣيد ؤداي أر تعيشت أم وينّا ؤر ئݣين ؤداين، مّاخ ألّيݣ دا تݣات تامسومانت يي وينا ؤر يين ؤداين حما أد تفارن لعات ن ووداين؟»
15 نكني ؤداين زݣ لاصل، ؤر نݣي ئمودنيبن أم وينّا ؤر ئݣين ؤداين.
16 وخّا ئمشيس لا نتّيسين بنادم دا ئتعاياد ئصلح، ماشي س لفعايل ن شّرع ن موسى والاينّي س ليمان س عيسى لمسيح، أود نكني نومن ئسّ حما أد نتّوصلح س ليمان نّخ س لمسيح، ؤر-ئد س طّاعت ن شّرع، ئتّخ ؤر-ئتّيغيي أود يون أد ئتّوصلح خف لحساب ن شّرع.
17 مشان نكني ووداين مش دا نورزو أداخ ئرار نصلح س ليمان نخ س لمسيح، ئبان دا نتݣا دنوب، ئد لمعنا ن ؤياد لمسيح داخ ئسزعيم أنݣ دّنوب؟ حاشا!
18 هاتين مش عايدخ أد بنوخ منّاو جديد لعات ن دّين نّا خف دفاعخ ثيزويري، س ؤياد دا غدرخ ليمان ئنو س لمسيح أر تبّاتخ خف ئخف ئنو ئس ݣيخ أمونديب.
19 ئدّخ س سباب ن شّرع موتخ زݣ جيهت نّس، حما أد ئديرخ يي ربي. ئدّخ توصلبخ د لماسيح.
20 ؤر ئد نكّ أݣ تعيشن دغي، والاينّي لمسيح أݣ تعيشن ديّي. ئد تودرت نّا تعيشخ دغي، دا تعيشخ س ليمان س ممّيس ن ربّي نّا يي ئتّيرين أها ئشف تودرت نّس خف لحساب ئنو.
21 هاتين ؤر ريخ أد سبضلخ نّعمت ن ربّي، ئدخ مش عايدخ صلحخ غر ربّي خف لحساب ن شّرع، هان لموت ن لمسيح ؤر ديكس لفايت.