3
1 أيا أيت غلاطيا آ ئد وار لعقل! ماون ئسحرن س واوال نّس فّيرن ماون سباينخ دات ن والّن نّون ميمش ئتّوصلب يسوع لمسيح؟
2 ريخ أد كون سالخ غاس خف يون ؤسكّين: ئس تقبلم رّوح ن ربّي ئدّخ تضاعم شّرع ماد ئتّخ تسلام س لينجيل أها تامنم ئسّ؟
3 ئس تفغم ئخفان نّون؟ ݣ-ؤمزوارو تعوّلم خف رّوح ن ربّي، دغي ترام أت تعوّلم خف جهد ن صّاحت نّون.
4 ئس تكّا غيفون شيݣان ن تمارا بلا لفايت؟ مش غيفون تكّا ستيت باطل!
5 هان ربّي نّاون ياكّان رّوح نّس أر ئتݣّا ݣ وامّاس نّون شيݣان ن لموعجزات، ئس دا ئتݣّا أياد ئتّخ دا تضاعم شرع ماد ئدّخ تسلام س لينجيل أها تامنم ئسّ؟
6 ئمشينّا ئتيارون ݣ لكتاب ن ربّي: «يومن إبراهيم س ربّي ئحاسبت د بنادم ئصلحن».
7 ئوا ئخصّاون أت تيسينم: كول وينّا ؤمنّين س ربّي تّوحاسبن زݣ ترّيكا نا ئحقّان ن براهيم.
8 زݣ زيك، ئنّا ربّي ݣ لكتاب نّس ئس ئدّا أد ئرار لݣنوس نّا ؤر ئݣين ؤداين صلحن خف ليمان نّسن. س-ؤياد أس ئبشّر براهيم قبل س لينجيل لّيݣ أس ئينّا: «س سباب نّش أس تّوبارشن لݣنوس كول».
9 ئوا هان كول وينّا ؤمنين دا تن ئتباراش ربّي ئمشينّا ئبارش براهيم نّا يومن.
10 ئد كول وينّا عولّين خف طّاعت ن شّرع هاثين تّونعلن، علا حقّاش ئتيارو ݣ لشثاب ن ربي: «كول ونّا ؤر دا ئتݣان أينا ئتيارون ݣ لشثاب ن شّرع ئتّونعل!»
11 دغي، ئباين ئس ؤر ئدّي أود يون أد ئصلح دات ن ربّي س طّاعت ن شّرع، ئتخ لشتاب ن ربّي دا ئتّيني: «بنادم نّا ئصلحن، س ليمان أس ئدّا أد ييدير».
12 ئتخ أبريد ن شّرع ئخالف وين ليمان، والاينّي «ونّا ئتݣّان س لوصيّات ن شّرع ئدّا أد ييدير ئسّن».
13 ئد لمسيح ئفوكّياخ زݣ نعلت ن شّرع أها ئتّونعل س سباب نّخ، ئتخ ربّي دا ئتّيني: «ئتّونعل ونّا ئتّوعلقن خف ؤحنيݣ».
14 ئجرا ؤياد حما أت تّوش لباراكا ن إبراهيم يي لݣنوس نّا ؤر ئݣين ؤداين س عيسى لمسيح، د س ليمان أس ندّا أد نقبل رّوح نّا ئقّاول ربي.
15 أيايتما، رعات غر ؤمصراف ن كوياس ئنݣر ن ميدّن: أدّاي ئوش بنادم يون ن لعاهد ئصحان. ؤر-ئتّيغيي أود يون أت تيسبطل نغد أد ديكس ئزايد شا.
16 أمشيد أس ئشا ربّي ئد لعاهد نّس يي براهيم د يون زݣ ترّيكت نّس، ربّي ؤر-ئنّي «ئ ترّيكات نّش» أمّي لّان شيݣان ن ميدّن، والاينّي ئنّا «يون زݣ ترّيكا نّش» ئتّخ دا ئساوال غاس خف يون، نتّا أݣان لمسيح.
17 هان أينّا ريخ أدينيخ: شّرع نّا ديدّان فّير ن ربعميّا وثلاثين ن-ؤسݣّاس، ؤر دا ئسبطال ؤلا ئمحو لعاهد نّا ئقّاول ربّي.
18 ئتّخ مش نكّا دان تّامز لورت س سباب ن طّاعت ن شّرع، هان أينّا س-ئواعد ربّي ؤر غورس أود يون ن نّفع، والاينّي ربّي ئواعد براهيم س لورت أها ئشاست.
19 ئوا ماخ ألّيݣ ديدّا شّرع؟ ئدّاد حما أد ئسباين دّنوب أر دتدّو ترّيكا نّا ئقّاول ربّي، سباينند لملايكا شّرع-اد خف ؤفوس ن يون ؤمازان ئنݣر ربّي د ميدّن.
20 أمازان دا ئتّيلي ئنݣر ن سين نغد ؤݣار، والاينّي ربّي غاس يون.
21 ئوا ئس ئݣا شّرع ضّض ن-ؤينّا س-ئعاهد ربّي؟ حاشا، ئتّخ أمور ئس ئغيي شّرع أد-ئش تودرت ئحقّان يي مدّن، تالي عايدن مدّن صلحن غر ربّي س طّاعت ن شّرع،
22 والاينّي لشثاب ن ربّي لا ئسبايان ئد دّونيت كول دا تعيش دّاو ن جهد ن دّنب، حما أد ئتّونشف يي ئمومن نّا يومنن س عيسى لمسيح أينّا ئقّاول ربّي.
23 والاينّي قبل أنامن س المسيح، نلاّ نشرف س شرع ن موسى، ؤر غورخ تلّي لحوريّا ألّيي-أخ د-ئسباين ربّي ليمان-اد.
24 س-ؤياد شّرع ئݣا أعسّاس نّخ أر دياوض لمسيح، حما أد نعايد نصلح دات ن ربّي س ليمان.
25 والاينّي زݣوس نومن نعايد نتّوحرر زݣ ؤعسّاس-اد.
26 هاتين كول نّون تݣام أراو ن ربّي ألّيݣ تومنم س عيسى لمسيح.
27 ئتّخ كول نّون تّوغبّژم د لمسيح، ها كنّي تاغولم تݣام أم لمسيح س-ئخف نس.
28 ؤر ئلّي بطّو ئنݣر ؤداي د ونّا ؤر ت-ئݣين، ؤلا ئنݣر ئسمغ د ونّا ؤر ت-ئݣين، ولا ئنݣر ؤرياز د تمطّوط، كول نّون يون أيد تݣام ݣ عيسى لمسيح.
29 ئوا مش تݣام زݣ لمسيح، هاتين تݣام زݣ ترّيكا ن براهيم، د ئورّاثن ن ؤينّا س ئقاول ربّي.