4
1 أياد أخف داون تّينيخ، ماحد أورّات ئسول ئمژّي هاتين ؤر ئلّي شا ن لفرق ئنݣراس د-ئسمغ واخّا غورس لحق أد ياوي لورت كول.
2 ئتّخ ئسول دّاو ن لحشام ن وينّا غيفس تنباضنين أر تكلاّفن ئسّ أر تّاوض لوقت نّا ئݣا ئبّاس.
3 أود نكني ئمشيس، ألّيي نسول نݣا ئشيران ئمژيان، نكّا نݣا ئسمغان ن ئسكّين خوانين ن دّونيت.
4 والاينّي ألّيي تيوض لوقت، يوزند ربّي ممّيس نّا ئتييرون زݣ يوت ن تمطّوط، ئعيش دّاو ن لحشام ن شّرع،
5 حما أد ئفوكّا مدّن نّا ئتعيشن دّاو ن تنباط ن شّرع، أها نعايد أد نݣ أراو ن ربّي.
6 ئوا ئدّخ تعايدم تݣام أراو ن ربّي، يوزند رّوح ن ممّيس يي وولاون نّون. د رّوح-اد دا ئسغويّو أر ئتيني: «آبابا! آيبانو».
7 س-ؤياد ؤر تقّيميت تݣيد ئسمغ والاينّي تعايت تݣيد ممّيس، ئوا مش تݣيت ممّيس، هان ربّي ئݣاش د-اورّات نّس.
8 والاينّي ݣ تيزويري، تكّام ؤر دا تّيسينم ربّي أر تعبادم شا ؤر ئݣين أم ربّي.
9 ئد دغي تعايدم تسّنمت، س تّحقيق هاتين نتّا أيد كون ئسّن، ئوا مّاخ ألّيݣ تاغولم ألتو غر ئسكّيناد خوانين ن دّونيت ؤر-ئواتان والو، أها ترام أت تݣيم ئسمغان نّسن ئمشينّا تݣام تيزويري؟
10 كنّي دات تتّاويم غاس ݣ شا ووسّان، شا ن-ئيّورن، د لاعياد شا ن-ئسݣاسن أها أر ئسّن تفرّحم!
11 هاتين ݣدخ أت تدّو تمارا نّا وتخ زݣ جّيهت نّون باطل.
12 آيايتما، داون سّوتورخ أت تعايدم أم نكّ علاحقّاش أود نكّ عايدخ أم كنّي، أود يون زيݣون ؤر يي ئݣي لعارأر دغي.
13 هاتين تسنم ئد س سباب ن ئغنشا نو أس كون بشّرخ س لينجيل زݣ تيزويري.
14 واخّا كن عدبخ س ئغنشا نو، ؤر يي تحقّيرم ؤلا تكرهميي، والاينّي تقبلمييي أم يون لملاك ن ربي، نغد أمّي د نكّ أݣان عيسى لمسيح.
15 ئوا ماني لفراحييت نّون؟ هاتين لاّ غيفون تشهادخ أمّور ئد-ئس تغيم أت تقلّعم ألّن نّون، تالي تقلعمتن أها تفمييي تن.
16 ئس عايدخ دغي ييخ أعداو نّون ألّيي داون تّينيخ لحق؟
17 هان مدّن نّا تيتاوين ديݣون ؤر ديݣسن لمعقول، دا تّيرين أد كون سبعدن زّيݣي حما أد تن تتفورم.
18 هاتين ئژيل مور ئس دا تتّاوين ديݣون ديما س نّيت، ماشي غاس أدّاي ئليخ غورون.
19 أيارّاو ئنو، هايي سولخ دا تعدّابخ زݣ جّيهت نّون أم يوت ن تمطّوط نّا يومژن س-وسقّن، أرتعايدم أم لمسيح.
20 دا تمنّاخ أمّور ئس لّيخ دغي غورون أد بدلخ أوال ئنو، ستيت ؤر سّينخ ماي تݣاخ زݣ جّيهت نّون.
21 ئنياتييي، كنّي نّا ئران أت تيليم دّاون لحشام ن شّرع: ئس-ؤر دا تسلام يي مايد ئتّيني شّرع؟
22 ئتوارو ݣ لشثاب: لّان غر براهيم سين ئشيرّان يون زݣ تسمغت نّس، ئد يون زݣ تمطوط نّس تاحوريت.
23 ممّيس ن تسمغت هاجر ئلال خف لحساب ن دّات، ئد ممّيس ن تمطّوط نّس تاحوريت صارا ئلال خف لحساب ن لعاهد نّا س-ئقاول ربّي.
24 أياد كول غورس سنات ن لمعنات، تيعيالين نّا سّنات لمعنا نسنت سين ن-ئد لعاهد، لعاهد أمزوارو لاّ د-ئتدّو زݣ يون عاري ئسم نّس سيناء، لعاهد-اد لاّ ياكّا أراو نّس أر تعيادن ݣان ئسمغان، لعاهد-اد نتّا أݣّان هاجر.
25 ئتّخ ئلا عاري ن سيناء ݣ تمازيرت ن واعرابن، ئد هاجر لمعنا نّس لقدس ن دغي. نتّات د وراو نّس سولن ݣان ئسمغان أر أسّ-اد.
26 ئد لعاهد ويسّين لمعنا نّس لقدس ئلاّن ݣ ئݣنوان نّا ئݣان تاحوريت تݣ مّاتنخ.
27 لشتاب ن ربّي داي ئتّيني: «فرح أتنّا ؤر دجين يورون. تسغورت س-ؤفراح تهلّلت أتنّا ؤر دجين ئسّين أقضاع ن تاروا، ئتّخ تامطّوط نّا ئزري ؤرياز نّس دّان أد غورس عدّون ئشيران ؤݣار ن تنّا غر ئقّيما».
28 ئد كنّي أيايتما، أراو ن ربّي خف نّيرت ن-ؤقاول نّس ئمشينا ئݣا إسحاق.
29 زݣ قبل ئكّا ممّيس ن تسمغت نّا ئلالن خف لحساب ن دّات دا ئتعدّا خف لعيل نّا ئلالن خف لحساب ن رّوح، هان أياد ئسول دا ئتجرو أود لوقت-اد.
30 والاينّي مايدا ئتّيني لشتاب ن ربّي؟ دا ئتّيني: «ژّع تيسمغت د ممّيس، ئتّخ ممّيس ن هاجرتيسمغت ؤر ئنّي أد ئورت د ممّيس صارا تحورّيت».
31 ئوا أيايتما، نكني ؤر نݣي أراو ن تسمغت، والاينّي أراو ن تحورّيت.