5
1 ستيتّ ئفوكّاياخ لمسيح، دغي ئخصّاخ أد نقّيم ݣ لحوريا أها ؤر نتعاياد أد نݣ ئسمغان ن شّرع لمرت ياضن.
2 نكّين بولس داون تّينيخ: مش تتّوزيّنم، ؤر ئنّي لمسيح أد كن ئنفع.
3 دا غيفون توكّادخ تيكلت ياضن هان ونّا ئتّوزيّن ئلازم أد-ئضاع لفارايض ن شّرع كول.
4 كنّي نّا يورزّون أت تّوحاسبم تصلحم غر ربّي س طّاعت ن شّرع ن موسى، تبضام د لمسيح ئدّخ تزريم نّعمت ن ربّي.
5 والاينّي نكني زݣ وولاون نّخ دا نتݣّا رّجانخ ݣ ربّي، نّا ئدّان أد-اخ ئرار نصلح س ليمان د س جهد ن رّوح.
6 ئ دّخ دا نتّامن س عيسى لمسيح ؤر داخ ئتنفاع مش نزيّن نغد لاّ، والاينّي أينّا ئتنفاعن أنسباين ليمان س تايري.
7 قبل تلّام دا تمزوارم مليح، ئوا ما كن ئغرّان أك أت تفغم أبريد ن لحقّ؟
8 أغرّا-ياد ؤر ديدّي زݣ ربّي نّاون ئغران أد غيرس تدّوم.
9 ئمشينّا ئنّا بو واوال: «شوي زݣ تانّونت دا ئسّمتان أركتي كول».
10 دا ئسّون تّامنخ س سباب ن مولانا ئس ؤر تدّيم أت تفارم شا ن رّاي ياضن. والاينّي ونّا ئسكّارن تيريتّ ئنݣراون دوك ماتّا نتّا، ئدّا أت تيامژ ؤموتّل.
11 ئد نكّين أيايتما، مور-ئد ئس سولخ دا تبشّارخ س-ؤزيّن، مّاخ أليݣ سولن ؤداين دا غيفي تعدّان أر دغي؟ مش سولخ دا تبشّارخ س-ؤياد، ئوا هان لعترت ن لموت ن لمسيح خف صّليب تبطل.
12 ئنيات يي وينّا ئسكّارن تيريتّ ئنݣراون ؤر-ئد غاس أد زيّن، والاينّي واخا أت تبّيم
13 أيايتما هان ربّي ئغرياون حما أت تݣيم ئحورّيين. ئوا غوراون أت تستاغلّم أحرّر غاس أت تݣيم أينّا ترا دّات، والاينّي خدمات ئنيراون س تايري.
14 ئتّخ شّرع ئتّوجمع غاس ݣ يوت ن لوصيت: «ئري ونّا ش-ئقربن أمشينّا دا تّيريت ئخف نّش».
15 والاينّي مش دا تميوتشام أرتمفراسم ئنݣراون أم لوحوش، رارات لبال نّون هاتين تدّام أت تمسخلوم.
16 أياد أخف داون تّينيخ: عيشاث س-وينا ئرا رّوح لقدس، س ئمشي ؤر تنّيم أت تتفورم شّهوات ن دّات.
17 هان أينّا تّيري دّات ؤر دا ت ئتّيري رّوح لقدس د-ؤينّا ئتّيري رّوح ؤر دا ت تّيري دّات، دّات د رّوح دا تمغانّان ئنݣراسن حما ؤر تّيغييم أت تݣيم أَينّا ترام أت تݣيم.
18 والاينّي مش دا تعيشم س-وينا ئرا رّوح، هاتين ؤر تقّيميم دّاو ن تنباطّ ن شّرع ن موسى.
19 ئد لفعايل ن دّات بايننت نيتنتي أݣّان: لفساد، د ئسكّين ئحرمن، د زّنا،
20 د لعيبادا ن لاصنام، د سحور، د-ئمنغان، د لعداوت، د لغيرا، د سّخط، د ونّا ئتّيرين ئخف نّس، بطّو ئنݣر ن ميدّن، د-ؤحقّر،
21 د لحسد، د منغيوت د تسي شيݣان شراب د ݣار أوال، د كول ئسكين أم ويد، ها نك داون علمخ ئمشي نّاون علمخ ياد زݣ قبل أراون تّينيخ: هان وينّا تݣّانين ئمشي ؤر غورسن ئتيلي ؤمور ݣ تݣلّيت ن ربي.
22 ئد لغلت نا ياكّا رّوح لقدس نتّات أݣان: تايري د ؤفراح د لهنا د صبر د لّطف د لفعايل ن لخير د ليمان،
23 تاضفي د رژن، أود شّرع ؤر دا ئضّادا ئسكّين-اد.
24 ئد وينّا ݣانين وين لمسيح صلبن دّات نّسن د شهوات نّس د ؤينّا تّيري.
25 ئدخ داخ ياكّا رّوح القدس تودرت، ئخصّاياخ أت تنضاع.
26 أها ؤر ديݣنخ ئتّيلي لكيبر د لحسد ؤلا نمشراه ئنݣراخ.