6
1 أيايتما، مش ئݣا زيݣون شان يون دّنوب، ئواجب غيفون كني نّا غر ئلاّ رّوح لقدس أت ترارم غر أبريد س لخاضر ئغّودان. تحضوم ئخفاون نّون، حما ؤر تن تݣّيم أود كني.
2 معاوانات أساي ن تقل ئنݣراون، ئمشيد أس تدّام أت تضاعم شّرع ن لمسيح.
3 ونّا ئغالن ئس ئمقّور وادّور نّس د نتّا ستيت ؤر ئواتا والو، هاتين دا ئتغشّا ئخف نّس.
4 والاينّي ئخصّا يي كويون أد-ئحقّا أينّا ئتݣا، مش ئژيل ؤينّا ئتݣا، تاسّاعت نّا غورس لحقّ أد-ئفرح أها ؤر ئسمساسا أينّا ئتݣّا د-ؤينّا تݣّان ميدن ضنين.
5 ئتّخ كويون ئدّا أد ياسي أݣّا نّس.
6 ونّا ئتعلّامن أوال ن ربّي، ئلازم غيفس أد-ئشف زݣ لخير نّس يي ونا ت-ئتعلامن.
7 أد ؤر تغشّاث ئخفاون نّون، ربّي ؤر دا ئتادجا ئ ماي غيفس ئتقبّاضن. أينّا دا ئزرّع بنادم أݣ مݣّر.
8 ئتّخ ونّا دا ئزرعن أينّا ترا دّات نّس، دا ئمݣّر زݣ دّات أهلاك، ئد ونّا دا ئزرعن أينّا ئرا رّوح لقدس، دا ئمݣّر زݣ رّوح لقدس تودرت ن دوام.
9 خف ؤياد ئخصّا ؤر نتوحيل أد نزايد أد نݣ لخير، ئتّخ مش ؤر نبدي زݣ تيݣيت لخير، أدّاي تاوض لوقت ندّا أد نصيّف يوت ن لغلتّ ئژيلن.
10 ئوا ماحدّ غورخ لوقت ئخصّا أد نݣ لخير يي ميدّن كول لومنّا أيتماتنخ ئمومن.
11 راعايات مشحال أي مقّورنت تيرّا-ياد نّاون أروخ س ؤفوس ئنو!
12 هان وينّاون ئتݣّان دّرع أت تزيّنم، دا تّيرين أد سباين ئخفاون نّسن أها توقبلن غر ميدّن، ئد لمور-اد نّسن ران غاس ؤر تن تعدّابن ميدّن خف سباب ن صاليب ن لمسيح.
13 ئدّخ وينّا ئدّافاعن خف ؤزيّن، س-ئخفاون نّسن ؤر دا تضاعن شّرع ن موسى، والاينّي ران غاس أت تزيّنم حما أد فرحن ئدّخ تݣام س واوال نّسن.
14 ئد زݣ جّيهت ئنو نكّ، هات ؤر ديخ أد تعنّاخ س-أود يون ؤسكين غاس س صّاليب ن مولانا نّخ عيسى لمسيح. نّاس تّموت دّونيت زݣ جّهت ئنو، د نك مّوتخ زݣ جّيهت ن دّونيت.
15 علاحقّاش، عيسى لمسيح ؤر دا ت-ئتهما أد ئزيّن بنادم نغد ؤر ئزيّين، والاينّي أينّا تيتهمّان أد ئتّوخلق بنادم منّا-وجديد.
16 ييلي لهنا د رحمت غر ميدّن كول نّا ئتضاعن أوال-اد، ئتخ ويد أيد ئݣان شّعب ن ربّي ستيت.